ފަހު ވަގުތު ޕޮލެންޑު ބަލިކޮށް، ސްކޮޓްލެންޑުން ޕްލޭ އޮފްގެ ޖާގަ ހޯދައިފި

ޔުއެފާ ނޭޝަންސް ލީގު އޭގެ ގުރޫޕު އެކެއްގައި ޕޮލެންޑާ ދެކޮޅަށް ކުޅުނު މެޗުން މޮޅުވެ، ސްކޮޓްލެންޑުން މުބާރާތުގެ ރެލިގޭޝަން ޕްލޭ އޮފްގެ ޖާގަ ހޯދައިފި އެވެ.

ހޯމަ ދުވަހުގެ ރޭ ޕޮލެންޑާ ދެކޮޅަށް ކުޅުނު މެޗު ސްކޮޓްލެންޑުން ކާމިޔާބު ކުރީ 2-1ންނެވެ. އެ މެޗާ ކުރިމަތިލީއިރު ވެސް، ފަސް މެޗުން ދެ ޓީމަށް ވެސް ލިބެނީ ހަތަރު ޕޮއިންޓެވެ. އެހެންވެ އެ މެޗުން މޮޅުވާ ޓީމަކަށް ޕްލޭ އޮފްގެ ޖާާގަ ލިބެން އޮތެވެ. މެޗުގައި ސްކޮޓްލެންޑުން ލަނޑު ޖަހައި ކުރި ހޯދާފައި ވަނިކޮށް، ޕޮލެންޑުން ނަތީޖާ ހަމަހަމަ ވެސް ކުރި އެވެ. ނަމަވެސް ސްކޮޓްލެންޑުން ވަނީ ފަހު ވަގުތު ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން ތިން ވަނަ މިނެޓުގައި ސްކޮޓްލެންޑުން ވަނީ ޕޮލެންޑު ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޖޯން މެކްގިން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ބެން ޑޯކް އެވެ. މެޗުގެ ދެ ވަނަ ހާފު ފަށައިގެން 14 ވަނަ މިނެޓުގައި ޕޮލެންޑުން ނަތީޖާ ހަމަހަމަ ކުރީ ކަމިލް ޕިއަޓްކޮވްސްކީ ޖެހި ލަނޑުންނެވެ. އެއީ ޕިއޮޓް ޒިއެލެންސްކީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެވެ. މެޗުން ސްކޮޓްލެންޑު މޮޅުވީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެންޑީ ރޮބާޓްސަން ޖެހި ލަނޑުންނެވެ. އެއީ ޑިފެންޑަރު ޖޯން ސޯޓާ ތަނަވަސްކޮށްދިން ފުރުސަތެއްގައި ރޮބާޓްސަން ޖެހި ލަނޑެކެވެ.

މޮޅާއެކު ސްކޮޓްލެންޑުން ވަނީ މި ގުރޫޕުގެ ތިން ވަނަ މަގާމު ހޯދައި، ޕްލޭ އޮފްގެ ޖާގަ ހޯދައިފަ އެވެ. އެއީ ގުރޫޕުގައި އެ ޓީމު ކުޅުނު ހަ މެޗުން ހަތް ޕޮއިންޓާ އެކު އެވެ. ގުރޫޕުގައި ކުޅުނު މެޗުތަކުގެ ތެރެއިން ދެ މެޗުން ސްކޮޓްލެންޑު މޮޅުވެފައިވާއިރު، އެއް މެޗުން ވަނީ އެއްވަރުވެފަ އެވެ. އަނެއް ތިން މެޗުން އެ ޓީމު ވަނީ ބަލިވެފަ އެވެ. ޕޮލެންޑު ވަނީ މި ގުރޫޕުގައި ކުޅުނު ހަ މެޗުގެ ތެރެއިން ހަތަރު މެޗުން ބަލިވެފަ އެވެ. އެއް މެޗުން މޮޅުވެފައިވާއިރު، އަނެއް މެޗު ވަނީ އެއްވަރުވެފަ އެވެ.