ޔުއެފާ ނޭޝަންސް ލީގު އޭގެ ގުރޫޕު ދޭއްގައި އިޓަލީއާ ދެކޮޅަަށް ކުޅުނު މެޗުން މޮޅުވެ، ފްރާންސް އިން ގުރޫޕުގެ އެއް ވަނަ އަށް ޖެހިލައިފި އެވެ.

އާދީއްތަ ދުވަހުގެ ރޭ އިޓަލީއާ ދެކޮޅަށް ކުޅުނު މެޗު ފްރާންސް އިން ކާމިޔާބު ކުރީ 3-1 އިންނެވެ. އެ މެޗާ ކުރިމަތިލީއިރު އެއް ވަނައިގައި އޮތީ އިޓަލީ އެވެ. އެ މެޗުން ބަލި ނުވެ ފަރު ޖައްސާލައިގެން އެއް ވަނަ މަގާމު ދެމެހެއްޓުމުގެ ފުރުސަތު އިޓަލީ އަށް އޮތްއިރު، ފްރާންސް އިން ވަނީ އިޓަލީ ބަލިކޮށް އެއް ވަނަ ޖާގަ ހޯދައިފަ އެވެ.

މެޗު ފަށައިގެން ދެ ވަނަ މިނެޓުގައި ފްރާންސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ފްރާންސް އަށް ޖަހައިދިނީ އެޑްރިއަން ރާބިއޮޓް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ލޫކަސް ޑިގްނޭ އެވެ. އޭގެ ފަހުން މެޗުގެ 33 ވަނަ މިނެޓުގައި ފްރާންސް އަށް ދެ ލަނޑުގެ ލީޑެއް ލިބުނީ އިޓަލީގެ ގޯލު ކީޕަރު ޖުލިއެލްމޯ ވިކާރިއޯ އަތުން ބައި ކޮޅަށް ވަތް ލަނޑުންނެވެ.

އޭގެ ދެ މިނެޓު ފަހުން އިޓަލީން ވަނީ ލަނޑެއް ޖަަހައި ފަރަގު ކުޑަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ އެންޑްރިއާ ކަމްބިއާސޯ އެވެ. އެ ލަނޑު އޭނާ ޖެހީ ފެޑެރިކޯ ޑިމާކޯ ތަނަވަސްކޮށްދިން ފުރުސަތެއްގަ އެވެ. މެޗުގައި ފްރާންސްގެ ދެ ވަނަ ލަނޑު، 65 ވަނަ މިނެޓުގައި ޖެހީ ރާބިއޮޓް އެވެ. އެ ލަނޑު ވެސް އޭނާ ޖެހީ ޑިގްނޭ ތަނަވަސްކޮށްދިން ފުރުސަތެއްގަ އެވެ.

މޮޅާއެކު ފްރާންސް އެއް ވަނައިގައި އޮތީ ފަސް މެޗުން 13 ޕޮއިންޓު ހޯދައިގެންނެވެ. ހަމަ އެ އަދަަދަށް މެޗު ކުޅެގެން ދެ ވަނައިގައި އިޓަލީ އަށް ވެސް ލިބެނީ 13 ޕޮއިންޓެވެ. ނަމަވެސް ލަނޑުގެ ގޮތުން ކުރި ހޯދައިގެން ފްރާންސް އަށް އެއް ވަނަ ލިބެ އެވެ.