އެއްބަސްވުމާ ގުޅޭ ގޮތުން ސުވާލު ކުރުމުން މުސިއާލާ ބުނީ ފޯކަސް އޮތީ ޤައުމީ ޓީމަށް ކަމަށް

ޖަރުމަނުގެ ބަޔާން މިއުނިކާ އެކު ސޮއި ކޮށްފައިވާ އެއްބަސްވުން އައު ކުރުމާ ގުޅޭ ގޮތުން ސުވާލު ކުރުމުން، އެ ސުވާލަށް ސީދާ ޖަވާބެއް ނުދީ ފޯކަސް އޮތީ ޖަރުމަނު ޤައުމީ ޓީމަށް ކަމަށް ޖަމާލް މުސިއާލާ ބުނެފި އެވެ.

އުމުރުން 21 އަހަރުގެ ޒުވާން ކުޅުންތެރިޔާ އޭނާގެ ސީނިއާ ކެރިއަރު ފެށީ ވެސް ބަޔާނުންނެވެ. ބަޔާނާއެކު މުސިއާލާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އޭނާގެ އެއްބަސްވުމުގައި ބާކީ ދެ އަހަރު އޮތް ނަމަވެސް، ބަޔާނުން ބޭނުން ވަނީ އޭނާގެ އެއްބަސްވުން އައު ކުރުމަށެވެ. ބަޔާނުން ބޭނުން ވަނީ ދިގު މުައްދަތަކަށް މުސިއާލާގެ އެއްބަސްވުން އައުކޮށް، އެ ކުލަބުގައި އޭނާ ބަހައްޓާށެވެ. އެކަމާ ގުޅުން ހުރި މަޝްވަރާތައް ދުވަސް ކޮޅެއް ކުރިން ބަޔާނުން ވަނީ ފަށައިފަ އެވެ.

ބަޔާން އާއެކު އައު އެއްބަސްވުމުއްގައި ސޮއި ކުރާނެތޯ މީގެ ކުރިން ސުވާލު ކުރުމުން މުސިއާލާ ބުނީ، އެފަދަ މަންޒަރެއް އޭނާ އަށް ތަސައްވަރު ކުރެވޭ ކަމަށެވެ. އަދި މުސިއާލާ ބުނެފައި ވަނީ ބަޔާނާ އެކު މަޝްވަރާތައް ކުރިއަށް ގެންދާ ކަމަށާއި، މަޝްވަރާތައް ދަނީ ވެސް ރަނގަޅަށް ކަމަށެވެ. ކުލަބު ފުޓުބޯޅަ މެދު ކަނޑާލުމަށްފަހު ކުޅުންތެރިން ޤައުމީ ޓީމާ ގުޅެމުން އަންނައިރު، މުސިއާލާ ވެސް ވަނީ ޖަރުމަނު ޤައުމީ ޓީމާ ގުޅިފަ އެވެ. އެއްބަސްވުމުގެ ސުވާލު ކުރުމުން މުސިއާލާ ބުނީ، ބަޔާން އާއެކު އައު އެއްބަސްވުމެއްގައި ސޮއި ކުރުމާ ގުޅޭ ގޮތުން މިވަގުތު އޭނާ އަށް އެއްޗެއް ބުނަން ނޭނގޭ ކަމަށެވެ. މިވަގުތު ފޯކަސް އޮތީ ޖަރުމަނު ޤައުމީ ޓީމަށްކަން ފާހަގަކޮށް މުސިއާލާ ބުނީ، ބަޔާންގައި އޭނާ ހުރީ ވަރަށް ހިތްހަމަ ޖެހިގެން ކަމަށެވެ.

ޒުުވާން ކުޅުންތެރިޔާ ބަޔާންގައި މޮޅު ކުޅުމެއް ދައްކަމުން އަންނައިރު، އައު ކޯޗު ވިންސެންޓް ކޮމްޕެނީ ވެސް އިސްކަން ދެމުން އަންނަ ކުޅުންތެރިންގެ ތެރޭގައި އޭނާ ހިމެނެ އެވެ. އޭނާ ވަނީ މިހާތަނަށް ބަޔާނަށް ކުޅެދިން 177 މެޗުގައި 52 ލަނޑު ޖަހައިފަ އެވެ. ބަޔާނާއެކު އޭނާ ވަނީ ނުވަ ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ޖަރުމަނު ލީގު ހަތަރު ފަހަރު، ޖަރުމަނު ސުޕަ ކަަޕް ތިން ފަހަރު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކުރުން ހިމެނެ އެވެ.