އެމްޑީޕީގެ ސިޔާސަތަކީ ރައްޔިތުންނަށް އޯގާތެރިކަމާއި ލޯތްބާއެކު ޚިދުމަތްކޮށްދިނުން ކަމަށް މާލެ ސިޓީ ކައުންސިލުގެ މޭޔަރު އާދަމް އާޒިމް ވިދާޅުވެއްޖެއެވެ.

މޭޔަރު އާޒިމް މިހެން ވިދާޅުވީ އަންގާރަ ދުވަހުގެ ރޭ އެމްޑީޕީއިން ބޭއްވި "ފުދިއްޖެ، ފުނޑިއްޖެ" ޖަލްސާގައި ވާހަކަފުޅު ދައްކަވަމުންނެވެ.

ޖަލްސާގައި ވާހަކަފުޅު ދައްކަވަމުން މޭޔަރު އާޒިމް ވިދާޅުވީ، "އެމްޑީޕީގެ ސިޔާސަތަކީ ރައްޔިތުންނަށް އޯގާތެރިކަމާއި ލޯތްބާއެކު ޚިދުމަތްކޮށްދިނުން. އެހެންވީމާ، އަޅުގަނޑުމެން އިރާދަކުރެއްވިއްޔާ ތި ރައްޔިތުންނަށް ބޯހިޔާވަހިކަން ކަށަވަރުކޮށްދޭނެ. ތިޔަ ރައްޔިތުންނަށް އަސާސީ ޚިދުމަތްތައް ކަށަވަރުކޮށްދޭނެ، ތިޔަ ރައްޔިތުންނަށް ހަމަގައިމުވެސް އަޅުގަނޑުމެންގެ ސަރުކާރުގައި އުފާވެރިކަން އޮންނާނީ، އެއްވެސް ޝަކުވާއެއް ކުރުމުގެ ފުރުސަތެއް ނޯންނާނެ،" ކަމަށެވެ.

މީގެއިތުރުން އާޒިމް ވިދާޅުވީ، އެމްޑީޕީގެ ސަރުކާރުގައި އެެއްޗެހި އަގުބޮޑުވެގެން އުޅޭކަށް ނުޖެހުނު ކަމަށާއި، އެހެން ނަމަވެސް މިއަދު ކަރަންޓު ބިލާއި ފެން ބިލު ތިން ގުނަ ބޮޑުވެއްޖެ ކަމަށެވެ.

މުއިއްޒު ސަރުކާރުގެ ކަންކަން ގޯހުން ގޯހަށް ދާކަން ހާމަ ކުރައްވާ އާޒިމް ވިދާޅުވީ، އެކްސްޗޭންޖް ރޭޓް 20ށް އަރައިފި ކަމަށާއި، ސަރުކާރުގެ އެއްވެސް ރޭވުންތެރި ކަމެއް، ޕްލޭނެއް ނެތް ކަމަށެވެ.

"މި ބޭފުޅުންގެ ނެތޭ އެއްވެސް އިސްތިރާޖީ ޕްލޭނެއް މިކަން ކުރުމުގެ. ހަމަ ވިސްނުންވެސް ނެތީ. އަޅުގަނޑުމެންގެ ސަރުކާރުން ނެތޭ ލޯނެއް ނަގާފަ ނުދެއްކޭ ވަރުގެ. ނުދެއްކޭ ވަރުގެ ލޯނެއް ނަގާފަ އޮތްނަމަ ޓްރާންސިޝަން ޕީރިއަޑްގަ އެބޭފުޅުންނަށް ފެންނާނެ އަޅުގަނޑުމެންގެ ބަޖެޓާއި ނަގާފަ އޮތް އެއްޗަކާ," އާޒިމް ވިދާޅުވިއެވެ.

ސަރުކާރުގެ ދޯދިޔާ ޚަރަދު ކުރުމުގެ ކަންކަން ފާހަގަ ކުރައްވަމުން އާޒިމް ވިދާޅުވީ، "އައިގޮތަށް އައިސް 35 މިލިއަން ޑޮލަރު ދީފަ ދޫނިތަކެއް (ޑްރޯންތަކެއް) ގަނެގެން މާލެއަކަށް ނުގެންނާނެ. ހަމަ ދޫނިތަކެއް... ވައިގަދަ ވެއްޖެޔާމުން އޮޔަށް.....35 މިލިއަން ޑޮލަރު މިއީ ކުޑަ ލާރިކޮޅެއް ނޫން. މިއީ ކިތަށް މީހުންގެ މިއީ ކިތައް މީހުންގެ ބޯހިޔާވަހިކަންތޯ؟ މިއީ ގާތްގަނޑަކަށް 100 މީހުންގެ ބޯހިޔާވަހިކަމޭ މިއީ. އެވެސް ހަމަ އޮޔަށް. އެހުރީ އެއްޗެހިތައް ބަހައްޓާފަ.. ރާއްޖޭގެ ރައްޔިތަކަށް ނުފެންނާނެ އެދުއްވަނިކޮންނެއް. 35 މިލިއަން ޑޮލަރު ހަމަ ވަޔަށް ތަޅާލީ،" އާޒިމް ވިދާޅުވިއެވެ.