ޗެއާޕާސަން އިންތިހާބުގައި އެމްޑީޕީގެ ސައިޒް ދައްކާލާނަން: ހަސަން ލަތީފް
ޗެއާޕާސަންގެ އިންތިހާބުގައި ބޭއްވުމަށް ނިންމާފައި ވަނީ ފެބްރުއަރީ 10 ގައި
އެމްޑީޕީގެ އާންމު މެމްބަރުންގެ ތާއިދު ހޯދުމަށް އައްޑޫ ސިޓީގެ އެޕާޓީގެ މެމްބަރުންނާ ބައްދަލުކުރައްވަނީ
އަންނަ ހުކުރު ދުވަހު ބާއްވާ އެމްޑީޕީގެ ޗެއާޕާސަން އިންތިހާބުގެ ވޯޓްގައި އެމްޑީޕީގެ މެމްބަރުން ބައިވެރިވެ އެ ޕާޓީގެ ސައިޒް ދައްކާލާނެ ކަމަށް ހަސަން ލަތީފް ވިދާޅުވެއްޖެއެވެ.
ޗެއާޕާސަންގެ މަގާމަށް ކުރިމަތިލައްވާފައިވަނީ ހަސަން ލަތީފު އެކަންޏެވެ. ނަމަވެސް އެ މަގާމަށް އޭނާ ހޮވިވަޑައިގަންނަވާނީ އެންމެ މަދުވެގެން އެމްޑީޕީގެ މެމްބަރުންގެ ތެރެއިން 5،000 މެމްބަރުންގެ ތާއިދު ލިބުމުންނެވެ.
މެމްބަރުންގެ ތާއިދު ހޯއްދެވުމަށް އައްޑޫ ސިޓީއަށް ވަޑައިގެން ކުރައްވާ މަސައްކަތްތަކާ ގުޅޭ ގޮތުން ރާއްޖެއެމްވީއަށް މައުލޫމާތު ދެއްވަމުން ހަސަން ލަތީފް ހޮނިހިރު ދުވަހު ވިދާޅުވީ އަންނަ ހުކުރު ދުވަހު ބާއްވާ އިންތިހާބުގައި ދިވެހިރާއްޖޭގެ އެކި ކަންކޮޅުތަކުގައި ތިއްބެވި އެމްޑީޕީގެ މެމްބަރުން ބައިވެރިވެ އެޕާޓީގެ ސައިޒް ދައްކާލާނެ ކަމަށެވެ.
"އަންނަ ހުކުރު ދުވަހު ވޯޓްލާން ވީހާވެސް ގިނަ ބަޔަކު ނުކުމެ، އެމްޑީޕީގެ ސައިޒް ދައްކާލެވޭނެ ކަހަލަ ގޮތަކަށް އަޅުގަނޑުމެން ވޯޓްގެ ކަންތަން އިންތިޒާމްކުރެވޭނެ" އޭނާ ވިދާޅުވިއެވެ.
އައްޑޫ ސިޓީ ހިތަދޫ، މަރަދޫ އަދި ފޭދޫގައި އެމްޑީޕީގެ މެމްބަރުންނާ ބައްދަލުކުރެއްވުމަށް ހަސަން ލަތީފް ވަނީ ހޮނިހިރު ދުވަހު ދޮރުން ދޮރަށް ހިންގަވައިފަވެވެ. އަދި ޗެއާޕާސަންގެ އިންތިހާބުގެ ކުރިން މަސައްކަތް ކުރާނީ ޕާޓީގެ ވިހާވެސް ގިނަ މެމްބަރުންނާއި ބައްދަލުކުރުމަށް ކަމަށް ވެސް އޭނާ ވިދާޅުވި އެވެ.
އައްޑޫ ސިޓީގެ އެމްޑީޕީގެ ބައެއް މެމްބަރުންނާ ހަސަން ލަތީފް ހޮނިހިރު ދުވަހު ބައްދަލުކުރައްވަނީ
ހަސަން ލަތީފުގެ ކެމްޕެއިންގައި މިރޭ 9:00 ގައި ހިތަދޫ ކުރެސް ގާޑެން ރެސްޓޯރެންޓުގައި ޕާޓީގެ މެމްބަރުންނާއެކު ހާއްސަ ބައްދަލުވުމެއް ބޭއްވުމަށް ވަނީ ނިންމައިފަ އެވެ. މި ބައްދަލުވުމަށް ވީހާ ވެސް ގިނަ ބަޔަކު ހާޒިރުވުމަށް އޭނާ އެދިވަޑައިގަތެވެ.
"އަޅުގަނޑު ދައުވަތު އަރުވުމަށް އެމްޑީޕީއަށް ތާއިދުކުރާ ހުރިހާ ބޭފުޅުންނަން ވެސް، މި ބައްދަލުވުގައި ބައިވެރިވުމަށް،" ހަސަން ވިދާޅުވިއެވެ.
މަރަދޫގެ އެމްޑީޕީގެ މެމްބަރުންނާ ހަސަން ލަތީފް ބައްދަލުކުރައްވަން ނިންމަވާފައިވަނީ އާދީއްތަ ދުވަހު އެވެ.
އެމްޑީޕީގެ ކުރިމަގާ ގުޅޭ ގޮތުން ހަސަން ލަތީފް ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބު ބޮޑު ތަފަތާތަކުން ކާމިޔާބުކުރެވޭނެ ކަމުގެ ޔަގީންކަން އެބައޮތް ކަމަށެވެ.
"އެމްޑީޕީގެ އަޑު ހަގީގަތުގައި މަނޑެން ނޫން. ރަށްރަށުގައި އެމްޑީޕީ އަށް ތާއިދު އެބައޮތް، އެބޭފުޅުން އެގެންދަވަނީ މަސައްކަތް ވެސް ކުރައްވަމުން " އޭނާ ވިދާޅުވި އެވެ.
