އިޒްރޭލުން ޣައްޒާގެ ޖަބާލިޔާއަށް ހަމަލާދީ 32 މީހުން ޝަހީދުކޮށްލައިފި

އިޒްރޭލުގެ ސިފައިން ޣައްޒާގެ އުތުރުގައިވާ ޖަބާލިޔާ އަށް އާދިއްތަ ދުވަހުގެ ފަތިހު ހަމަލާދީ މަދުވެގެން 32 މީހުން ޝަހީދު ކޮށްލައިފިއެވެ.

އަނެއްކޮޅުން ހޮނިހިރު ދުވަހު ޣައްޒާގައި 44 ފަލަސްތީނު މީހުން އަދި ލުބުނާނުގައި 31 މީހުން އިޒްރޭލުން ހަމަލާދީ ވަނީ މަރާލާފައެވެ.

ލުބުނާނަށާއި ޣައްޒާ އަށް އިޒްރޭލުން ހުއްޓުމެއް ނެތި ހަމަލާ ދެމުންދާއިރު ހަނގުރާމަތައް ހުއްޓުމަކަށް ގެނެވިދާނެ ކަމުގެ އުއްމީދު ވަރަށް ބޮޑަށް ކުޑަ ކަމަށް މަސްރަހް ދިރާސާ ކުރާ ފަރާތްތަކުން ވަނީ ބުނެފައެވެ. އަނެއްކޮޅުން ޤަތަރުން ބުނެފައިވަނީ އިޒްރޭލާއި ހަމާސްއާ ދެމެދު އެ ޤައުމުން އަދާކުރަމުން ދިޔަ މެދުވެރިއެއްގެ ދައުރު ވަނީ މެދުކަނޑާލާފައި ކަމަށެވެ. އަދި މި "އަނިޔާވެރި ހަނގުރާމަ" ނިންމުމަށް ހަނގުރާމައިގައި ބައިވެރިވާ ފަރާތްތަކުން "ޝައުޤުވެރިކަމާއި ސީރިއަސްކަން" ދައްކަންދެން މި މަސައްކަތްތައް ކުރިއަށް ނުގެންދާނެ ކަމަށެވެ.

އދ. އިން ކޮށްފައިވާ ދިރާސާއަކުން ހާމަވެފައިވާ ގޮތުގައި ޣައްޒާގެ އުތުރު ސަރަޙައްދުތަކުގައި "ވަރަށް އަވަހަށް ބަނޑުހައިހޫނު ކަމެއް ފެތުރުމުގެ ފުރުޞަތު އޮތް" ކަމަށެވެ. މިއީ ހަނގުރާމައިގެ ނުރައްކާ އިތުރުވެ، ކާބޯތަކެތީގެ އެހީ ފޯރުކޮށްދިނުމަށް އިޒްރޭލުން ހުރަސް އަޅަމުން ގެންދާތީ ކަމަށް ރިޕޯޓުގައި ފާހަގަ ކޮށްފައިވެއެވެ.

އޮކްޓޯބަރު 7، 2023 އިން ފެށިގެން އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގައި މަދުވެގެން 43،552 ފަލަސްތީނު މީހުން މަރުވެ، 102،765 މީހުން ޒަޚަމްވެފައިވެއެވެ.

ލުބުނާނުގައި، ޣައްޒާގެ ހަނގުރާމަ ފެށުނީއްސުރެ އިޒްރޭލުގެ ހަމަލާތަކުގައި މަދުވެގެން 3،136 މީހުން މަރުވެ، 13،979 މީހުން ޒަޚަމްވެފައިވެއެވެ.