އިޒްރޭލުގެ ދިފާއީ ވަޒީރު މަޤާމުން ވަކި ކުރުމާ ގުޅިގެން އިޒްރޭލުގައި މުޒާހަރާ ކުރަނީ
އިޒްރޭލުގެ މީޑިއާތަކުން ރިޕޯޓުކުރާ ގޮތުގައި މުޒާހަރާކުރާ ބައެއް ފަރާތްތަކުން ވަނީ އަޔަލޯން ހައިވޭގައި އަލިފާން ރޯކޮށް، މަގުތަކުން ދަތުރުކުރާ އުޅަނދުފަހަރަށް ވެސް ހުރަސްއަޅާފައެވެ.
ގަލަންޓް މަޤާމުން ވަކިކރެއްވުމާ ގުޅިގެން އިޒްރޭލުގައި ކުރަމުންދާ މުޒާހަރާގެ ތެރެއިން
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އެ ގައުމުގެ ދިފާއީ ވަޒީރު ޔޯވް ގަލަންޓް މަޤާމުން ވަކިކުރެއްވުމާ ގުޅިގެން އިޒްރޭލުގައި މުޒާހަރާކުރަން ފަށައިފިއެވެ.
މުޒާހަރާ ކުރާ ފަރާތްތަކުން ގޮވާލަމުން އަންނަނީ ނަތަންޔާހޫ އިސްތިއުފާ ދެއްވުމަށާއި، އައު ދިފާއީ ވަޒީރު ރަހީނުންގެ މައްސަލައަށް އިސްކަންދެއްވުމަށެވެ.
އިޒްރޭލުގެ މީޑިއާތަކުން ރިޕޯޓުކުރާ ގޮތުގައި މުޒާހަރާކުރާ ބައެއް ފަރާތްތަކުން ވަނީ އަޔަލޯން ހައިވޭގައި އަލިފާން ރޯކޮށް، މަގުތަކުން ދަތުރުކުރާ އުޅަނދުފަހަރަށް ވެސް ހުރަސްއަޅާފައެވެ.
އަންގާރަ ދުވަހު ނަތަންޔާހޫ ވިދާޅުވީ، "ހަނގުރާމައިގެ މެދުތެރޭގައި، އެހެން ދުވަސްތަކަށް ވުރެ ބޮޑަށް، ބޮޑުވަޒީރާއި ދިފާއީ ވަޒީރާ ދެމެދު ފުރިހަމަ އިތުބާރެއް އޮތުން މުހިންމު" ކަމަށެވެ. އޭނާ ވިދާޅުވީ "ހަނގުރާމައިގެ ފުރަތަމަ ދުވަސްވަރުގައި އިތުބާރާއި ނަތީޖާ ހާސިލުވާ މަސައްކަތްތަކެއް ކުރެވުނު ނަމަވެސް، ފާއިތުވި މަސްތަކުގައި މި އިތުބާރު ގެއްލިފައިވާ،" ކަމަށެވެ. ނަތަންޔާހޫ އިތުރަށް ވިދާޅުވީ، "ހަނގުރާމަ ކުރިއަށް ގެނދިއުމުގައި އޭނާ އާއި ގަލަންޓްއާ ދެމެދު ބޮޑެތި ޚިޔާލު ތަފާތުވުންތަކެއް ފާހަގަކުރެވިފައިވާ،" ކަމަށެވެ. އަދި ގަލަންޓްގެ ބަދަލުގައި ދެން މަޤާމަށް އައްޔަނުކުރައްވާނީ ޚާރިޖީ ވަޒީރު އިސްރާއީލް ކަޓްޒް ކަމަށްވެސް އޭނާ ވަނީ ވިދާޅުވެފައެވެ.
ނަތަންޔާހޫގެ ސްޓޭޓްމަންޓާއި ގުުޅިގެން ގަލަންޓް ސޯޝަލް މީޑީއާގައި ކުރެއްވި ޕޯސްޓެއްގައި ވިދާޅުވީ އޭނާ ވަކިކުރެވުނީ ތިން ކަމަކާ މެދު ޚިޔާލު ތަފާތުވުމުގެ ސަބަބުން ކަމަށެވެ. އޭގެ ތެރޭގައި ޣައްޒާގައި ބަންދުކޮށްފައިވާ ރަހީނުން އަނބުރާ ގެނެވިދާނެ ކަމަށް އޭނާ ގަބޫލުކުރުން ހިމެނޭ ކަމަށެވެ.
2023 ވަނަ އަހަރުގެ އޮކްޓޯބަރު މަހު ޣައްޒާގައި ހަނގުރާމަ ފެށުމުގެ މަސްތަކެއް ކުރިން، ނަތަންޔާހޫ ވަނީ ސިޔާސީ ޚިޔާލު ތަފާތުވުންތަކެއްގެ ސަބަބުން ގަލަންޓް އޭނާގެ މަޤާމުން ވަކިކުރައްވާފައެވެ. ނަމަވެސް، ބޮޑެތި އާންމު އިހުތިޖާޖުތަކަކަށްފަހު އޭނާ އަލުން އެ މަގާމަށް އައްޔަނުކުރެއްވިއެވެ.
