މިނިވަން އަސްކަރިއްޔާގެ ވާހަކަފުޅާއެކު ރައީސް ވިދާޅުވީ އަސްކަރީ ހަތިޔާރު އެކުވެރި ބައެއް ދައުލަތްތަކުން ހޯއްދަވާނެ ކަމަށް

މިނިވަން އަސްކަރިއްޔާގެ ވާހަކަފުޅާއެކު، ދިވެހި އަސްކަރިއްޔާއަށް އަސްކަރީ ހަތިޔާރު އެކުވެރި ބައެއް ދައުލަތްތަކުން ހޯއްދަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ދިވެހި އަސްކަރިއްޔާއަކީ މިނިވަން އަދި ނުފޫޒުން އެއްކިބާވެފައިވާ ގާބިލު އަސްކަރިއްޔާއަކަށް ހައްދަވާނެކަމަށް ވައުދުވެވަޑައިގެން، އިންޑިއާއިން ދީފައިވާ ހެލިކޮޕްޓަރާއި މަތިންދާބޯޓުވެސް އަނބުރާ ފޮނުވާލާ އިންޑިއާ ސިފައިން ބާލާނެ ކަމުގެ ވައުދުފުޅާއެކު ވެެރިކަމަށް ވަޑައިގެން، އެ ވެވަޑައިގެންނެވި ވައުދުފުޅު އަނެއްއަތަށް އަނބުރާލައްވާ، ނަޞްރުގެ ދުވަހުގެ މުނާސަބަތުގައި ބޭއްވެވި ރަސްމީ ޖަލްސާގައި ރައީސް ވިދާޅުވީ ސިފައިންގޭގެ އެއްގަމުގެ ބާރަށްވެސް ވަރަށް މުހިންމު ކަންތައްތަކެއް ކޮށްދޭން ނިންމައި އެކަން ފަށާފައިވާ ކަމަށެވެ.

އަދި ހަތިޔާރު ހޯދައި، އެކިއެކި އާލާތްތައް ހޯދަންޖެހޭ ކަމަށާއި، މިހާރުވެސް އެކުވެރި ބައެއް ދައުލަތްތަކާ އެކީގައި ވަނީ މަސައްކަތްތަކެއް ފެށިފައިވާ ކަމަށް ރައީސް ވިދާޅުވިއެވެ.

މި ޖަލްސާގައި ރައީސް ވިދާޅުވެފައިވަނީ ކުރިއަށް އޮތް ދުވަސްތަކުގައި، ކެޕޭސިޓީ ބިލްޑް ކުރުމަށް ގިނަ ކަންތައްތަކެއް ކުރެވިގެންދާނެ ކަމަށެވެ. އަދި މިހާރު ދެކުނުގައި، އައްޑޫސިޓީ ގަމުގައި ދަނީ އެއަރބޭސްއެއް ޤާއިމުކުރުމުގެ މަސައްކަތް ބާރު ސްޕީޑްގައި ކަމަށާއި، އެ މަސައްކަތް ވަރަށް އަވަހަށް ނިމޭނެ ކަމަށެވެ. އަދި އުތުރުގައި އެފަދަ އެއްތަން ހެދިގެންދާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ މިފަދަ ގިނަ ކަންތައްތަކެއް އިރާދަކުރެއްވިއްޔާ ކުރިއަށް އޮތް ދުވަސްތަކުގައި ބާރު ސްޕީޑްގައި ހިނގަމުންދާނެކަމަށެވެ.