ސިޔާސީ ޕާޓީތައް ޖޫރިމަނާކުރަނީ ބާރުތައް ހަނިކޮށް އޮބަހައްޓަން - މައުރޫފް
މިފަދަ އިސްލާހެއް ހުށަހެޅުމުގެ މަޤްސަދަކީ ކޮބާތޯ މައުރޫފް ސުވާލު އުފެއްދެވި
ކެންދޫ ދާއިރާގެ މެންބަރު މައުރޫފް ޒާކިރު
ސިޔާސީ ޕާޓީތައް ޖޫރިމަނާކުރަނީ ބާރުތައް ހަނިކޮށް އޮބަހައްޓަން ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
އޭނާ އެފަދައިން ވިދާޅުވީ ގާނޫނާ ހިލާފުވެއްޖެ ނަމަ ސިޔާސީ ޕާޓީތައް ޖޫރިމަނާ ކުރެވޭ އަދަދު ބޮޑު ކުރުމާއި ޖޫރިމަނާ ކުރެވޭނެ ގޮތްތައް ބަދަލު ކުރަން ރައްޔިތުންގެ މަޖިލީހަށް ހުށަހަޅާފައިވާ ބިލާއި މެދު ވާހަކަދައްކަވަމުންނެވެ.
ސަރުކާރުގެ ފަރާތުން އެ ބިލު މަޖިލީހަށް ހުށަހެޅުއްވީ ވެރިކަންކުރާ ޕީއެންސީގެ މެންބަރު ދިއްދޫ ދާއިރާގެ މެންބަރު އަބްދުއްލަތީފު މުހައްމަދުއެވެ. އެ ބިލުގެ ފުރަތަމަ އިއްވީ ހޯމަ ދުވަހުއެވެ.
އޭނާ ވަނީ ސިޔާސީ ޕާޓީއަކުން ގާނޫނާ ހިލާފުވުމާއި އެފަދަ އެ ނޫން ވެސް ބޮޑު ކުށެއް ކުރާ ތަން މިދުވަސްވަރު ފެނިގެން ނުދާ ކަމަށް ވިދާޅުވެފައެވެ. އެހެންކަމުން އެފަދަ އިސްލާހެއް ހުށަހެޅުމުގެ މަޤްސަދަކީ ކޮބާތޯ އޭނާ ސުވާލު އުފެއްދެވިއެވެ. އަދި ކުއްލިއަކަށް އެއް ލައްކަ ރުފިޔާއާ ހަމައަށް ސިޔާސީ ޕާޓީތައް ޖޫރިމަނާ ކުރެވޭ ގޮތަށް ބަދަލުތަކެއް ގެންނަ ސަބަބާ މެދު އޭނާ ސުވާލު އުފެއްދެވިއެވެ، ހަމައެހެންމެ އެ ކަންކަމާއި މެދު ވިސްނާލާއިރު، ދިވެހިރާއްޖޭގެ މިސްރާބު ހުދުމުހުތާރު ވެރިކަމަކާ ދިމާލަށް މިސްރާބު ޖަހާފައި ހުރި މަންޒަރު ފެންނަ ކަމަށް އޭނާ ވިދާޅުވިއެވެ. މީގެ އިތުރުން ސިޔާސީ ޕާޓީތަކަށް ދައުލަތުގެ ބަޖެޓުން ދޫކުރާ ފައިސާގެ މިންވަރު ބަދަލު ކުރުމުގެ ބޭނުމަކީ ބަޖެޓުން ވެރިކަން ހިންގާ ޕީއެންސީއަށް ބޮޑު އަދަދެއް ދިނުން ކަމަށް އޭނާ ތުހުމަތުކުރެއްވިއެވެ. މީގެ އިތުރުން މި އިސްލާހާއި އެކު ޕާޓީތައް ރަޖިސްޓްރީ ކުރުމަށް އޮތް ފުރުސަތު ހަނިވެގެންދާކަމަށް ވެސް އޭނާ ވިދާޅުވިއެވެ. މިއީ ގިނަ ސިޔާސީ ޕާޓީތަކެއް އެކުލެވޭ ގޮތަށް ގައުމުގެ ކަންތައްތައް ކުރިއަށް ގެންދިއުމަށް އޮތް ފުރުސަތު ހަނިވާ ކަމެއް ކަމަށް މައުރޫފް ވިދާޅުވިއެވެ.
ދިއްދޫ ދާއިރާގެ ޕީއެންސީ މެންބަރު އަބްދުއްލަތީފް މުހައްމަދު ސިޔާސީ ޕާޓީގެ ގާނޫނުގެ 49 ވަނަ މާއްދާއަށް ހުށަހެޅި ބަދަލު ގެނައުމުގެ ބޭނުމެއްގެ ގޮތުގައި ބުނެފައިވަނީ، ސިޔާސީ ޕާޓީތައް ގާނޫނާ ޚިލާފުވާ ހާލަތްތައް މަދުކުރުމުގައި ޕާޓީތަކުން ޒިންމާ އުފުލުމަށް ބާރުއެޅުމުގެ ގޮތުން ގާނޫނާ ޚިލާފުވާ ވަކިވަކި ފަރާތް ޖޫރިމަނާކުރުން ކަމުގައެވެ. މެމްބަރު ލަތީފުގެ ހުށަހެޅުމުގައިވާ ގޮތުން ސިޔާސީ ޕާޓީތަކުގެ ގާނޫނާ ޚިލާފުވާ މީހަކު 30،000 ރުފިޔާއާއި 75،000 ރުފިޔާ އާ ދެމެދުގެ އަދަދަކުން ޖޫރިމަނާ ކުރެވޭނެއެވެ. އަދި ކުރިން ޕާޓީ ޖުރިމަނާ ކުރާ ގޮތައް ގާނޫނުގައި ކަނޑައަޅާފައި ނެތް އިރު، މިހާރު މިގެންނަ ބަދަލާއެކު އެ އަމަލެއް ހިންގި ފަރާތް ނިސްބަތްވާ ޕާޓީއެއް 100،000 ރުފިޔާއިން ޖޫރިމަނާ ކުރެވޭނެ ކަމަށް ހުށަހެޅުމުގައިވެއެވެ.
މިހާރު ގާނޫނުގައި އޮންނަ ގޮތުން ނަމަ ޕާޓީއެއްގެ މެންބަރު ކަމަށް ގަވާއިދާ ޚިލާފަށް މީހެއްގެ ނަން ހުށަހަޅައިފިނަމަ އެކަން ކުރި ފަރާތެއް 5,000 - 10,000 ރުފިޔާ އާ ދެމެދުގެ އަދަދަކުން ޖޫރިމަނާ ކުރުމާއި، ގާނޫނުގެ އެހެން މާއްދާއަކާ ޚިލާފުވާ ފަރާތެއް 30,000 - 75,000 ރުފިޔާ އާ ދެމެދުގެ އަދަދަކުން ޖޫރިމަނާކުރެވިދާނެއެވެ. މެމްބަރު ލަތީފުގެ ހުށަހެޅުމުގައި ސިޔާސީ ޕާޓީތަކުގެ ޕްރައިމަރީއާ ބެހޭ، އެ ގާނޫނުގެ 10 ވަނަ މާއްދާ އުވާލުންވެސް ހިމެނެއެވެ.
މީގެ އިތުރުން, ސިޔާސީ ޕާޓީ ތަކަށް ފައިސާ ދޫކުރާ ގޮތައް ބަދަލު ގެނައުން ވެސް މި ހުށަހެޅުމުގައި ވެއެވެ. މިގޮތުން ސިޔާސީ ޕާޓީތަކަށް ފައިސާ ދޫކުރަން މިހާރު އޮންނަ ގޮތް ކަމަށްވާ އަހަރުގެ ޖުމްލަ ބަޖެޓުގެ 0.1 އާއި 0.2 އިންސައްތައިގެ ދެމެދުގެ އަދަދު ބަދަލުކޮށް ދައުލަތުގެ އަހަރީ ބަޖެޓްގައި އެ އަހަރަކަށް ލަފާ ކުރާ އާމްދަނީގެ 0.1 އާއި 0.2 ދެމެދުގެ އިންސައްތަ ޕާޓީތަކަށް ހަމަ ޖެއްސުން ހިމެނެއެވެ.
