ލެންސް ބަލިކޮށް، ޕީއެސްޖީ އަށް ހަ ޕޮއިންޓުގެ ލީޑެއް

ފްރާންސް ލީގުގައި ލެންސްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން އެއް ވަނައިގައި ހަ ޕޮއިންޓުގެ ލީޑެއް ނަގައިފި އެވެ.

ޕީއެސްޖީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި ޕީއެސްޖީން ލަނޑު ޖެހީ ވެސް ފުރަތަމަ ހާފުގަ އެވެ.

މެެޗު ފަށައިގެން ހަތަރު ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ފްރާންސްގެ އޮސްމާން ޑެމްބެލޭ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ބާޑްލޭ ބާކޮލާ އެވެ. މެޗުގައި ޕީއެސްޖީން ރަނގަޅަށް ކުޅެފައިވާައިރު، އެ ޓީމުން ވަނީ އިތުރު ލަނޑު ޖަހާނެ ފުރުސަތުތަކެއް ވެސް ތަނަވަސްކޮށްފަ އެވެ، މެޗުގައި އިތުރު ލަނޑެއް ޖަހާނެ ފުރުސަތު ޑެމްބެލޭ އަށް ލިބުނެވެ. މީގެ އިތުރުން ޕީއެސްޖީގެ މާކޯ އަސެންސިއޯ އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ. ނަމަވެސް އެ ފުރުސަތުތަކުގެ ބޭނުން ކުރެވޭ ގޮތެއް ނުވި އެވެ.

މޮޅާއެކު ޕީއެސްޖީ އެއް ވަނައިގައި އޮތީ މިހާތަނަށް ކުޅުނު 10 މެޗުން 26 ޕޮއިންޓު ހޯދައިގެންނެވެ. އަށް މެޗުން އެ ޓީމު މޮޅުވެފައިވާއިރު، ދެ މެޗުން ވަނީ އެއްވަރުވެފަ އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް މޮނާކޯ އަށް ލިބެނީ 20 ޕޮއިންޓެވެ. އެ ޓީމު ވަނީ މި ސީޒަންގެ ލީގުގައި ކުޅުނު ދެ މެޗަކުން ބަލިވެފަ އެވެ.