ބާސެލޯނާގެ އެއްބަސްވުން ލޮޕޭޒް އައު ކޮށްފި

ބާސެލޯނާ އަށް ކުޅެމުން އަންނަ ސްޕެއިންގެ މިޑްފީލްޑަރު ފާމިން ލޮޕޭޒް، އެ ކުލަބާ އެކު ސޮއި ކޮށްފައިވާ އެއްބަސްވުން އައު ކޮށްފި އެވެ.

އުމުރުން 21 އަހަރުގެ ޒުވާން ކުޅުންތެރިޔާ އަށް ބާސެލޯނާގެ ސީނިއާ ޓީމުން ޖާގަ ލިބުނީ މިދިޔަ އަހަރު އެވެ. ބާސެލޯނާގައި އޭނާ ރަނގަޅު ކުޅުމެއް ދައްކަމުން އައިއިރު، އައު ކޯޗު ހަންސީ ފްލިކް ވެސް ވަނީ ލޮޕޭޒް އަށް އިސްކަން ދޭން ނިންމައިފަ އެވެ. ބާސެލޯނާ އިން ވަނީ ލޮޕޭޒްގެ އެއްބަސްވުން ފަސް އަހަރަށް އައު ކޮށްފަ އެވެ. އެހެންކަމުން މިހާރު އެ ކުލަބާ އެކު ލޮޕޭޒް ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ.

އައު އެއްބަސްވުމާ އެކު ލޮޕޭޒްގެ ރިޒީލް ކްލޯޒް ފީ 500 މިލިއަން ޔޫރޯ އަށް އަރާނެ އެވެ. ބާސެލޯނާގެ އެއްބަސްވުން ލޮޕޭޒް އައު ކޮށްފައިވާއިރު، އޭނާ ހޯދުމުގެ ޝައުޤުވެރިކަން އެކި ކުލަބުތަކުން ގެންގުޅުނެވެ. އޭގެ ތެރޭގައި އިޓާލިއަން ލީގުގެ އިތުރުން އިނގިރޭސި ޕްރިމިއާ ލީގުގެ ކުލަބުތައް ހިމެނޭ ކަމަށް ރިޕޯޓުތައް ބުނެ އެވެ. ޚާއްސަކޮށް ޕްރިމިއާ ލީގުގެ ކުލަބުތަކުން ލޮޕޭޒް ހޯދުމަށް އޭނާ އަށް ހުށަހެޅުން ވެސް ހުށަހަޅާފައިވާ ކަމަށާއި، ނަމަވެސް އެއިން އެއްވެސް ހުށަހެޅުމެއް ޤަބޫލު ނުކުރަން ލޮޕޭޒް ނިންމާފައިވާ ކަމަށް ވެސް ރިޕޯޓުތައް ބުނެފައިވެ އެވެ.

ލޮޕޭޒް ވަނީ މިހާތަނަށް ބާސެލޯނާ އަށް ކުޅެދިން 48 މެޗުގައި 11 ލަނޑު ޖަހައިފަ އެވެ. މިހާރު ކުރިއަށް ދާ ސީޒަންގައި އޭނާ ވަނީ ބާސެލޯނާ އަށް ހަ މެޗު ކުޅެދީފަ އެވެ. ލޮޕޭޒް އަށް ސްޕެއިންގެ ޤައުމީ ޓީމުން ޖާގަ ލިބުނީ މިއަހަރު އެވެ. އެގޮތުން މިއަހަރުގެ ޔޫރޯ ފުޓުބޯޅަ މުބާރާތަށް ސްޕެއިން އިން އެކުލަވާލި ޕްރިލިމިނަރީ ސްކޮޑުން އޭނާ އަށް ފުރުސަތު ލިބުނުއިރު، މުބާރާތަށް އެކުލަވާލި ފައިނަލް ސްކޮޑުން ވެސް އޭނާ އަށް ފުރުސަތު ލިބުނެވެ. ލޮޕޭޒް ވަނީ ސްޕެއިންގެ ޤައުމީ ޓީމަށް ދެ މެޗު ކުޅެދީފަ އެވެ. އޭނާ ވަނީ ސްޕެއިން އާއެކު ޔޫރޯ ފުޓުބޯޅަ މުބާރާތް ކާމިޔާބު ކޮށްފަ އެވެ.