ބުރާސްފަތި ދުވަހު ހުޅަނގު އައްސޭރީގެ ނޫރު ޝަމްސް ރެފިއުޖީ ކޭމްޕަށް އިޒްރޭލުން ދިން ހަމަލާގައި ކުޑަކުއްޖަކާއެކު ދެ ފަލަސްތީނު މީހުން ޝަހީދު ވެއްޖެ ކަމަށް ފަލަސްތީނު ޞިއްޙަތާ ބެހޭ ވުޒާރާއިން ބުނެފިއެވެ.
ހުޅަނގު އައްސޭރީގެ ތުލްކަރަމްގެ ރެފިއުޖީ ކޭމްޕުގައި އިޒްރޭލު ސިފައިން ބުރާސްފަތި ވިލޭރޭ ފަލަސްތީނު މީހެއްގެ ގަޔަށް ބަޑިޖަހާ މާރާލި ކަމަށްވެސް ސިއްހަތާބެހޭ ވުޒާރާއިން އިތުރަށް ބުނެފައިވެއެވެ.
ބުރާސްފަތި ދުވަހު އިޒްރޭލު ސިފައިންގެ ބަޔާނެއްގައި ބުނެފައިވަނީ ނޫރު ޝަމްސްގައި "ޓެރަރިސްޓް އިންފްރާސްޓްރަކްޗަރ" އަމާޒުކޮށްގެން އޮޕަރޭޝަނެއް ކުރިއަށް ގެންދާ ކަމަށެވެ.
ފަލަސްތީނުގެ ރަސްމީ ނިއުސް އޭޖެންސީ ވަފާއިން ބުނެފައިވަނީ ގިނަ އަދަދެއްގެ އިޒްރޭލުގެ އުޅަނދުތަކާއި ބޮޑެތި ބުލްޑޯޒަރުތައް ސިޓީއަށް ވަދެ ނޫރު ޝަމްސް ރެފިއުޖީ ކޭމްޕާ ދިމާއަށް ދިޔަ ކަމަށެވެ.
ފަލަސްތީނު އިސްލާމިކް ޖިހާދު ޙަރަކާތުގެ ހަތިޔާރުއެޅި ގޮފި ކަމުގައިވާ އަލް ޤުދުސް ބްރިގޭޑްސްއިން ނެރުނު ބަޔާނެއްގައި ބުނެފައިވަނީ އިޒްރޭލު ސިފައިންގެ ރެއިޑަށް ހުރަސް އެޅުމަށް އެ ޖަމާއަތުން އިޒްރޭލުގެ ބުލްޑޯޒަރަކަށް ވަރަށް ބާރުގަދަ އެއްޗެއް ގޮއްވާލާ ހަމަލާ ދީފައިވާ ކަމަށެވެ.
