ޣައްޒާގެ އުތުރުގައި ދިރިއުޅޭ ފަލަސްތީނު މީހުންގެ ގެދޮރަށް އެނބުރި ދިއުމަށް އިސްރާއީލުން ހުރަސް އަޅާ ބަޑި ޖަހައިފި

ޣައްޒާ އުތުރުގައިވާ ސަރަހައްދު ތަކުގައި ދިރިއުޅޭ މީހުން، އެމީހުންގެ ގެދޮރަށް އެނބުރި ދާން އުޅުމުން އެކަމަށް ހުރަސް އަޅާ ފަލަސްތީނު މީހުންނާ ދިމާލަށް އިސްރާއީލުގެ ބާރުތަކުން ބަޑިޖަހައި، މަދުވެގެން އެކަކު ޝަހީދުކޮށްލައިފިއެވެ.

ހަމާސްއިން ތުހުމަތު ކުރާ ގޮތުގައި އިސްރާއީލުން ގެންދަނީ ހަނގުރާމަ ހުއްޓުމުގެ އެއްބަސްވުމުގެ ޝަރުތުތައް ތަންފީޒުކުރުން ލަސްކުރަމުންނެވެ.

އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ވިދާޅުވީ އަމިއްލަ ގެދޮރަށް ދާން އުޅުނު މީހުންނަށް ހުރަސް އެޅީ އެއްބަސްވެފައިވާ ގޮތައް ހަމާސްއިން މަދަނީ އަންހެން ރަހީނަކު ދޫކޮށްނުލުމުގެ ސަބަބުން ކަމުގައެވެ.

އެއް ފަރާތުން އަނެއް ފަރާތައް އެއްބަސްވުމާ ޚިލާފުވެފައިވާ ކަމަށް ތުހުމަތު ކުރަމުންދާއިރު ހަނގުރާމަ ހުއްޓާލުމުގެ އެއްބަސްވުމުގެ ދަށުން ހޮނިހިރު ދުވަހުގެ ކުރީކޮޅު 4 އިސްރާއީލުގެ ސިފައިންނާއި 200 ފަލަސްތީނު މީހުން ވަނީ މިނިވަން ކޮށްފައެވެ.

ތަޖުރިބާކާރުން ބުނާ ގޮތުން ހޮނިހިރު ދުވަހު އެއް ބަޔަކު އެނެއް ބަޔަކަށް ބަދަލު ކުރި ބަހުގެ ހަމަލާތަކާ އެކު އިސްރާއީލުން ފަލަސްތީނުގެ ރައްޔިތުން އެނބުރި އެމީހުންގެ ގެދޮރަށް ދިއުމަށް ހުރަސް އެޅުމުން ހަނގުރާމަ ހުއްޓާލުމުގެ އެއްބަސްވުމުގެ ނާޒުކުކަން ވަނީ ހާމަވެގެން ގޮސްފައެވެ.

ކުރިން ވެސް މި އެއްބަސްވުމަކީ ޚިލާފުތައް އުފެދިދާނެ އެއްބަސްވުމެއް ކަމަށް ބެލެވިފައިވާއިރު، އިސްރާއީލުން ވާހަކަ ދައްކާ އިރު އެއްބަސްވުމުގެ ބަދަލުގައި ކިޔަމުން އަންނަނީ ވެސް "އޮނިގަނޑެއް" ކަމުގައެވެ.

އިސްރާއީލުން މައްސަލަ ހޫނު ކޮށްގެން މިއުޅެނީ ފަލަސްތީނުގައި ހުރި އެ ގައުމުގެ ރަހީނެއް ކަމުގައިވާ އުމުރުން 29 އަހަރުގެ އަރްބެލް ޔެހުދް، ނަމަކަށް ކިޔާ އަންހެނަކު ދޫކޮށް ނުލައިގެންނެވެ. އިސްރާއީލުން ބުނާ ގޮތުގައި އެއީ ހޮނިހިރު ދުވަހު ދޫކޮށްލަން ޖެހޭ މީހެއް ކަމަށާއި، ހޮނިހިރު ދުވަހު ދޫކޮށްލި ހަތަރު އަންހެނުންގެ ތެރޭގައި އޭނާ ނުހިމެނޭ ކަމަށެވެ. މިކަމާ ގުޅިގެން އިސްރާއީލުން ޣައްޒާގެ މަދަނީ ރައްޔިތުންނަށް އުތުރަށް ދިއުމަށް ހުރަސް އެޅި އިރު މިއީ ހަނގުރާމަ ހުއްޓާލުމާއި ރަހީނުން ދޫކޮށްލުމުގެ އެއްބަސްވުމުގެ ދަށުން ހޮނިހިރު ދުވަހު ކުރަން ހަމަޖެހިފައި އޮތް ކަމެކެވެ.

މި މައްސަލަ އިތުރަށް އުނދަގޫވެފައިވަނީ ޔެހުދް ހިފަހައްޓާފައި ހުރީ ހަމާސް އިން އިން ނޫން ކަމަށް ވާތީއެވެ. ޣައްޒާގައި ހަރަކާތްތެރިވާ އަނެއް ޖިހާދީ ޖަމާޢަތް ކަމުގައިވާ ފަލަސްޠީނު އިސްލާމިކް ޖިހާދު (ޕީއައިޖޭ) ގެ އިސް ފަރާތަކުން ސީއެންއެން އާ ވާހަކަ ދައްކަމުން ބުނެފައިވާ ގޮތުގައި ޔެހުދް ހިފަހައްޓާފައި ވަނީ އެ ޖަމާޢަތުން ކަމަށާއި، އޭނާ "ދޫކޮށްލާނީ ބަންދު ކޮށްފައިވާ މީހުން ބަދަލުކުރުމުގެ އެއްބަސްވުމުގެ ޝަރުތުތަކުގެ ދަށުން" ކަމަށެވެ.

ހަމާސް އާއި އިސްރާއީލުން އެއް ބަޔަކު އަނެއް ބަޔަކަށް ތުހުމަތުތައް ކުރަމުން ދާއިރު 15 މަސްދުވަހުގެ މުއްދަތައް ދެމިގެން ދިޔަ ހަނގުރާމަ ހުއްޓުމަކަށް ގެނައި އެއްބަސްވުން ކިހާ ދުވަހަކު ދެމި އޮވެދާނެތޯ ވަނީ ސުވާލު އުފެދިފައެވެ.                 

އަނެއްކޮޅުން އިސްރާއީލުން ހިފާފައިވާ ހުޅަނގު އައްސޭރީގައި، އިސްރާއީލު ސިފައިން ޖެނިން ސިޓީގަ އާއި ވަށައިގެންވާ ސަރަހައްދުގައި ބޮޑު އަސްކަރީ އޮޕަރޭޝަނެއް ދަނީ ހިންގަމުންނެވެ. ހޮނިހިރު ދުވަހު މި އޮޕަރޭޝަންގައި މަދުވެގެން ފަލަސްތީނުގެ ދެމީހުން ވަނީ ޝަހީދު ކޮށްލާފައެވެ. އޭގެތެރޭގައި ދެ އަހަރުގެ އަންހެން ކުއްޖެއްވެސް ހިމެނެއެވެ.