ފަލަސްޠީނުގެ ސަލާމަތީ ޚިދުމަތްތަކުން ބުރާސްފަތި ދުވަހު ރިޕޯޓުކުރި ގޮތުގައި، ބަންދުކޮށްފައިވާ ޣައްޒާގައި އިސްރާއީލުގެ ހަމަލާތަކުގައި 100 އަށްވުރެ ގިނަ މީހުން ޝަހީދުވެއްޖެއެވެ.

ޣައްޒާގެ ސިވިލް ޑިފެންސް އޭޖެންސީން ބުނާ ގޮތުގައި ބުރާސްފަތި ދުވަހުގެ ފަތިހުން ފެށިގެން އިސްރާއީލުން ބޮންއެޅުމުގެ ސަބަބުން މަރުވި މީހުންގެ އަދަދު 115 އަށް ވަނީ އަރާފައެވެ.

މަދުވެގެން 61 މީހުން މަރުވެފައިވަނީ ރޭގަނޑާ އެކު ބުރާސްފަތި ދުވަހުގެ ހެނދުނާ ހަމައަށް، ޣައްޒާގެ ދެކުނުގައިވާ ޚާން ޔޫނިސް ސިޓީއަށް ދެވުނު ހަމަލާތަކުގައި ކަމަށް އެ ސަރަހައްދުގެ ސިއްހީ އޮފިޝަލުން ބުނެފައިވެއެވެ. އުތުރުގައި، އިސްރާއީލުން ޣައްޒާ ސިޓީއާއި ޖަބާލިޔާ އަށް ހަމަލާދީފައިވެއެވެ.

އިސްރާއީލުގެ ސިފައިން އުތުރާއި ދެކުނު ޣައްޒާގައިވާ ތިން ހޮސްޕިޓަލަކަށްވެސް ހަމަލާދީފައިވެއެވެ: އެއީ، ޖަބާލިޔާގައިވާ އަލް އައުދާ ހޮސްޕިޓަލާއި، ޚާން ޔޫނިސްގައިވާ އިންޑޮނީޝިއާ ހޮސްޕިޓަލާއި، އަދި ޔޫރަޕިއަން ހޮސްޕިޓަލެވެ. ޣައްޒާގެ ސިއްހަތާ ބެހޭ މިނިސްޓްރީން ބުނާ ގޮތުގައި މިހާރު ޔޫރަޕިއަން ހޮސްޕިޓަލުގެ ޚިދުމަތް ވަނީ ހުއްޓިފައެވެ.

އިސްރާއީލުގެ ހަނގުރާމަމަތީ މަތިންދާބޯޓުތަކުން ޚާން ޔޫނިސްގައި ނުވަ ގެއަކަށް އެއްވެސް އިންޒާރެއް ނުދީ ހަމަލާދީފައިވެއެވެ. އެއާ އެކު އާއިލާތައް އެކުގައި ވަނީ ނައްތާލާފައެވެ.

އަނެއްކޮޅުން ޣައްޒާ އަށް ކާބޯތަކެއްޗާއި ބޭހާއި ޒަރޫރީ ތަކެތި އެތެރެވިޔަ ނުދިނުމަށް އަޅާފައިވާ ހުރަސްތައް އިސްރާއީލުން އަންނަނީ ދަމަހައްޓަމުންނެވެ.

"އިސްރާއީލުގެ ބްލޮކޭޑަކީ ހަނގުރާމައިގެ އުކުޅުތައް ފަހަނައަޅައި ގޮސް، އާބާދީ ނައްތާލުމުގެ ހަތިޔާރަކަށް ވަނީ ވެފައި،" ހިއުމަން ރައިޓްސް ވޮޗްގެ ވަގުތީ އެގްޒެކެޓިވް ޑައިރެކްޓަރ ފެޑެރިކޯ ބޮރެލޯ ބުރާސްފަތި ދުވަހު ނެރުނު ބަޔާނެއްގައި ވިދާޅުވެފައިވެއެވެ.

ހިއުމަން ރައިޓްސް ވޮޗުން ބުނެފައިވަނީ "ޣައްޒާގެ އާންމު އިންފްރާސްޓްރަކްޗަރގެ ބާކީ އޮތް ބައި ވެސް ސުންނާފަތިކޮށް، ފަލަސްޠީނުގެ އާބާދީ ކުޑަކުޑަ ސަރަޙައްދަކަށް ޖަމާކުރުމަށް އިސްރާއީލު ސަރުކާރުން ރާވާފައިވާ ޕްލޭނަކީ އިންސާނިއްޔަތާ ދެކޮޅަށް ކުރަމުންދާ ކުށެއް ކަމަށާއި، އެއީ ނަސްލު ނައްތާލުމުގެ އަމަލުތައް އިތުރަށް ނުރައްކާތެރި ހިސާބަކަށް ގެންދިއުން." ކަމުގައެވެ.

އުތުރު ޣައްޒާގައި ދިރިއުޅޭ ރައްޔިތުން ބުނެފައިވަނީ ރޭނގަޑުގެ ހުރިހާ ވަގުތެއްގައި ވެސް އިސްރާއީލުގެ ހަމަލާތައް ކުރިއަށް ގެންގޮސްފައިވާ ކަމަށެވެ.

އަނެއްކޮޅުން އިސްރާއީލު އަސްކަރީ ޑްރޯންތަކުން އަޅަމުންދާ ލީފްލެޓްތަކުގައި އުތުރުގައި ދިރިއުޅޭ މީހުން ދެކުނަށް ދިއުމަށް ވަނީ އިންޒާރު ދީފައެވެ.

ޣައްޒާގެ ގިނަ ރައްޔިތުން 19 މަސްދުވަހުގެ ތެރޭގައި އިސްރާއީލާއި ހަމާސްއާ ދެމެދު ހިނގަމުންދާ ހަނގުރާމައިގައި މަދުވެގެން އެއްފަހަރު އެމީހުންގެ ގެދޮރުން ވަނީ ބޭރުކޮށްލާފައެވެ.