ޣައްޒާގެ ފަލަސްތީނުގެ ރައްޔިތުން މިޞްރާއި އުރުދުން އަށް ފޮނުވާލާ ޣައްޒާގެ ބިން ހުސް ކުރަން ބޭނުންފުޅުވާ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ވާހަކަފުޅަށް ފަލަސްތީނުގެ ރައްޔިތުން ރައްދު ދީ އެއީ "ކުރެވޭނެ ކަމެއް ނޫން،" ކަމަށް ބުނެފިއެވެ.
ޓްރަމްޕް ވިދާޅުވީ އުރުދުންގެ ރަސްގެފާނު އަބްދުﷲ އަށް އެކަން އެދިވަޑައިގެންފައިވާ ކަމަށާއި، އާދީއްތަ ދުވަހު މިޞްރުގެ ރައީސް އަށްވެސް އެކަމަށް އެދިވަޑައިގަންނަވާނެ ކަމަށެވެ.
ޣައްޒާ އަކީ "ވީރާނާ ވެފައިވާ ތަނެއް" ކަމަށް ވިދާޅުވެ، ޓްރަމްޕް ވިދާޅުވީ: "އަޅުގަނޑު މި ދައްކަނީ ގާތްގަނޑަކަށް އެއް މިލިއަން، ފަސް ލައްކަ މީހުންނާ ބެހޭގޮތުން، އަދި އަޅުގަނޑުމެން މުޅި އެ ސަރަޙައްދު ސާފުކޮށްލަނީ" ކަމަށެވެ. އޭނާ އިތުރަށް ވިދާޅުވީ ޣައްޒާގެ ފަލަސްތީނު ރައްޔިތުން މިސްރަށާއި އުރުދުން އަށް ގެންދިއުން އެއީ "ވަގުތީ" ނުވަތަ "ދިގު މުއްދަތަކަށް" ކަމަށްވެސް ވެދާނެ ކަމަށެވެ.
ޓްރަމްޕްގެ މި ވާހަކަފުޅަށް ޣައްޒާގައި ދިރިއުޅޭ ފަލަސްތީނު މީހުން ރައްދުދެމުން ބުނެފައިވަނީ އެމެރިކާގެ ރައީސް ޑޮނަލްޑް ޓްރަމްޕް އެ ގެންގުޅުއްވަނީ ޣައްޒާ ސްޓްރިޕްގެ އާބާދީ މަޖުބޫރުން ނެރެ މިޞްރާއި އުރުދުން އަށް ބަހާލުމުގެ ވިސްނުންފުޅުކަން އެމީހުންނަށް އެނގޭ ކަމުގައެވެ.
"މީހުންނަށް މިކަން ވިސްނައިދިނުމަކީ ކުރެވޭނެ ކަމެއް ނޫން،" ޣައްޒާގެ ނުސީރާތު ގައި ދިރިއުޅޭ ނަފީޒް ހަލާވާ އަލްޖަޒީރާ އަށް ބުންޏެވެ. "އަހަރެމެންގެ ޤައުމު ދޫކޮށް ގޮސް އެތަން ޔަހޫދީންނަށް ދޫކޮށްލުމުގެ ޚިޔާލަކީ، އެއްގޮތަކަށްވެސް ވާނެ ކަމެއް ނޫން."
ފަލަސްތީނުގެ އެހެން ރައްޔިތެއް ކަމުގައިވާ އިލްހާމް އައް ޝަބްލީ ޓްރަމްޕްގެ މި ޕްލޭނަށް ދެކޮޅު ހަދަމުން ބުނީ. "އަހަރެމެން މިތަނުން ދާން ބޭނުންވި ނަމަ، އެކަން މާ ކުރިން އޮންނާނީ ކޮށްފައި. އެމީހުން ފަލަސްތީނުގެ މީހުންނާ ދެކޮޅަށް ހިންގާ ނަސްލު ނައްތާލުމުގެ ހަނގުރާމަ އިން އެއްވެސް ކަމެއް ހާސިލެއް ނުކުރެވޭނެ އަދި އަހަރެމެން މިތަނުގައި ދެމިތިބޭނަން ކޮންމެ ގޮތެއް ވިޔަސް،" އޭނާ ބުންޏެވެ.
ފަލަސްތީނުގެ މީހުން އެފަދަ "އެއްވެސް ހުށަހެޅުމެއް ނުވަތަ ހައްލެއް ގަބޫލެއް ނުކުރާނެ. އެމެރިކާގެ ރައީސް ޓްރަމްޕްގެ ހުށަހެޅުންތަކުގައި އިޢުލާންކޮށްފައިވާ ފަދައިން އަލުން އިމާރާތްކުރުމުގެ ނަމުގައި ރަނގަޅު ނިޔަތެއްގައި ކަމަށް ފެނުނު ނަމަވެސް،" ހަމާސްގެ ސިޔާސީ ބިއުރޯގެ މެންބަރު، ބާސަމް ނައީމް، ރޮއިޓަރސް އަށް ބުންޏެވެ.
ހަމާސްގެ އެހެން އިސްވެރިޔަކު ކަމުގައިވާ ސާމީ އަބޫ ޒުހްރީ، ޓްރަމްޕް އަށް ދިން މެސެޖަކީ، އޭނާގެ ކުރިން ވެރިކަން ކުރެއްވި ރައީސް ޖޯ ބައިޑެން ގެންގުޅުއްވި ފަދަ "ނާކާމިޔާބު" ވިސްނުންތައް ތަކުރާރު ނުކުރުމަށެވެ.
"ޣައްޒާގެ މީހުން ވަނީ މަރު ތަޙައްމަލުކޮށް އެމީހުންގެ ވަޠަން ދޫކޮށް ދިއުމަށް އިންކާރުކޮށްފައި، އަދި އެއްވެސް ސަބަބަކާ ހުރެ އެމީހުން އެތަން ދޫކޮށްފައި ނުދާނެ،" އަބޫ ޒުހްރީ ރޮއިޓަރސް އަށް ވާހަކަ ދައްކަމުން ބުންޏެވެ.
ފަލަސްތީނުގެ މަސްރަހް ދިރާސާ ކުރާ ފަރާތެއް ކަމަށްވާ ޣައްސާން އަލްޚަޠީބް ބުނީ ހުޅަނގު އައްސޭރި އާއި ޣައްޒާގެ ފަލަސްތީނު މީހުން، އެމީހުންގެ ވަޒަނުން ނެރެގެން ގެންދަން، އުރުދުން އާއި މިޞްރުގެ މީހުން ދެކޮޅު ހަދާނެ ކަމަށެވެ: "މިފަދަ ޚިޔާލަކަށް ޙަޤީޤަތުގައި ޖާގައެއް އޮތްކަމަކަށް އަޅުގަނޑު ނުދެކެން."
ޣައްޒާގެ ގިނަ މީހުން ޓްރަމްޕްގެ ހުށަހެޅުމާ ދެކޮޅުހަދައި، ބުނީ ހަނގުރާމައިން ހާސިލު ނުކުރެވުނު ކަމެއް ސިޔާސީ ގޮތުން ހާސިލު ނުކުރެވޭނެ ކަމަށެވެ. ބައެއް މީހުން ބުނީ ޓްރަމްޕް އަކީ "ބޮޑާ" މީހެއް ކަމަށެވެ.
"އޭނާގެ ހިތަށް އަރަނީ ފަލަސްތީނުގެ މީހުން މަޖުބޫރުން ހިޖުރަކުރުވޭނެ ކަމަށް (ނަމަ) އެއީ ކުރެވޭނެ ކަމެއް ނޫން، ކުރެވޭނެ ކަމެއް ނޫން، ކުރެވޭނެ ކަމެއް ނޫން. ފަލަސްތީނުގެ މީހުން ހިތުގެ އަޑިން ގަބޫލުކުރަނީ މި ބިމަކީ އެމީހުންގެ ބިން ކަމަށް، މި ފަސްގަނޑަކީ އެމީހުންގެ ފަސްގަނޑު ކަމަށް،" މަޖްދީ ސައިދަމް ބުންޏެވެ.
