ޣައްޒާ ހަނގުރާމައިގައި ބައިވެރިވާ އިސްރާއީލުގެ ސިފައިންނަށް އަމުރު ކޮށްފައި އޮންނަނީ އަރަބިންނަށް އެނބުރި އެމީހުންގެ ވަޒަނަށް ނާދެވޭ ގޮތައް މުޅި ސަރަހައްދު ހަލާކު ކޮށް ސުންނާފަތި ކުރުމަށް ކަމަށް އިސްރާއީލުގެ ސިފައިންގެ މީހަކު ބުނެފިއެވެ.

"އަރަބިން އަނބުރާ ނައުމަށްޓަކައި ހުރިހާ އެއްޗެއް ހަލާކު ކުރުމަށް އަމުރުކޮށްފައި އޮތީ؛" އިސްރާއީލު ސިފައިންގެ މީހާ ބުންޏެވެ.

އެނާ ހާމަކޮށްފައިވާ ގޮތުގައި، ޣައްޒާ ގައި އިސްރާއީލުން ބަންދު ކޮށްފައިވާ ސަރަޙައްދަށް ފަލަސްތީނުގެ މީހުން އަނބުރާ އައުމަށް ހުރަސް އެޅުމުގެ ގޮތުން ޤަސްދުގައި ހިންގާ ސިފައިންގެ ޕްލޭނެއްގެ ދަށުން، އުތުރު ޣައްޒާ ފަނާ ކޮށްލުމަށް އިސްރާއީލު ސިފައިންނަށް އޮތީ އަންގާފައި ކަމަށެވެ.

"ކުރަންޖެހޭ ކަމަކީ އެ ސަރަޙައްދު މުޅިން ހަލާކު ކޮށްލުން، އޭރުން އެމީހުންނަށް އަނބުރާ އެތަނަށް ނާދެވޭނެ. ކީއްވެ ހަލާކުކުރަންވީ؟ އެއީ މިޝަން ކަމަށް ވާތީ، އެއީ އަހަރެން ކުރާ ކަމަކީ،" ނަން ހާމަނުކުރާ ސިފައިންގެ މީހާ ޑްރޮޕް ސައިޓް ނިއުސް އަށް ދިން އިންޓަވިއުއެއްގައި ބުނެފައިވެއެވެ.

އެ ސިފައިންގެ މީހާ އަކީ 'ޖެނެރަލްގެ ޕްލޭން' ގެ ނަމުން ނަން ދީފައިވާ ޕްލޭން ތަންފީޒު ކުރުމުގައި ބައިވެރިވި ބްރިގޭޑްތަކުގެ ތެރެއިން އެއް ބްރިގޭޑް ކަމަށްވާ ގިވާތީ ބްރިގޭޑްގެ މީހެކެވެ.

"އަހަރެންނަކީ ސިފައިންގެ ތެރޭގައި މާ ބޮޑު މީހެއް ނޫން،" އޭނާ ބުންޏެވެ. "އެއީ މިޝަން، އެއީ އަހަރެން ކުރާ ކަމަކީ. އެކަމަކު ތިބާ އަހަރެންގެ އަމިއްލަ ޚިޔާލު އަހަނީ ނަމަ، އަހަރެންނަށް ބުނާނެ އެއްޗެއް ނޭނގޭ، އެއީ ހަމައެކަނި މިޝަނެއް."

2024 ވަނަ އަހަރުގެ އޮކްޓޯބަރު މަހާއި 2025 ވަނަ އަހަރުގެ ޖެނުއަރީ މަހާ ދެމެދު ޖެނެރަލްގެ ޕްލޭން ތަންފީޒު ކުރުމުގެ ތެރޭގައި، އިސްރާއީލުގެ ބާރުތަކުން އުތުރު ޣައްޒާ އިން އެތައް ސަތޭކަ ހާސް ފަލަސްތީނުގެ މީހުން އެމީހުންގެ ގެދޮރުން ބޭރުކޮށް އެހެން ސަރަހައްދުތަކަށް މަޖުބޫރުން ފޮނުވާލައި، ގިނަ އަދަދެއްގެ މީހުން ވަގުތީ ހިޔާވަހިކަމުގެ ތަންތަނުގައި ތޮއް ޖައްސާލިއެވެ. ވަގުތީ ހިޔަލުގެ ގޮތުގައި ހަލާކުވެފައިވާ ސްކޫލް އިމާރާތްތައް ވެސް ދިޔައީ ބޭނުން ކުރަމުންނެވެ.

'ޖެނެރަލްގެ ޕްލޭން' އަކީ ކުރީގެ ޖެނެރަލް ގިއޯރާ އީލަންޑް އެކުލަވާލި ސިޔާސަތެކެވެ. މި ސިޔާސަތުގައި ފެނާއި، ކާނާއާއި، ބޭސްފަރުވާ އަށް ހުރަސް އަޅާ ހަނގުރާމައިގެ ހަތިޔާރެއްގެ ގޮތުގައި ބޭނުންކޮށްގެން، އުތުރު ޣައްޒާގައި ބަންދުކޮށްފައިވާ ސަރަހައްދުގައި ފަލަސްތީނުގެ މީހުން ބަނޑަށްޖައްސައިގެން ގޮތް ހުސްވަންދެން ދަތި ކުރުން ހިމެނެއެވެ.

ގިވާތީ ބްރިގޭޑަކީ ޣައްޒާ އަށް ހަމަލާ ދިނުމުގައި ފުރަތަމަ ބޭނުން ކުރި އިސްރާއީލުގެ އަސްކަރީ ޔުނިޓްތަކުގެ ތެރެއިން އެއް ޔުނިޓެވެ. އޭގެ ފަހުން އައި 20 މަސް ދުވަހުގެ ތެރޭގައި، މި ބްރިގޭޑް ބައިވެރިވި އޮޕަރޭޝަންތަކުގެ ސަބަބުން ބައިތުލް ލަހިޔާ، ބައިތުލް ހަނޫން، ޖަބާލިޔާ އަދި ރަފާހް ފަދަ ޣައްޒާގެ ގިނަ ސަރަހައްދުތައް މުޅިން ހަލާކުވެ ފަނާވެގެން ދިޔައެވެ.

"އެއީ ތަނެއް، އެއީ އިތުރަށް ބޭނުން ނުވާ ތަނެއް. އަދި އެއީ ބިމާ ހަމަކޮށްލަން ޖެހޭ ތަނެއް، އެހެންވެ އެތަން ބިމާ ހަމަ ކޮށްލަނީ،" ޣައްޒާގެ ސަރަހައްދުތަކާ މެދު އެމީހުންނަށް ވިސްނައިދީފައި އޮންނަ ގޮތް ކިޔައިދެމުން ސިފައިންގެ މީހާ ބުންޏެވެ.

ބޮޑެތި އަދަދުތަކުން މީހުން ވަޒަނުން ނެރެ ބޭރު ކުރުމުގެ އިތުރުން، ގިވާތީ ބްރިގޭޑް ސީދާ ފުރިހަމަ ކުރަން ޖެހުނު ޓާސްކެއްގެ ގޮތުގައި އުތުރު ޣައްޒާގެ ތިން ސްކޫލެއް ޤަސްދުގައި އަންދާލުން ހިމެނެއެވެ.

"މިޝަނަކީ އެ ހުރިހާ އެއްޗެއް ނައްތާލުން. އެއީ އެތާ ހުރި ހުރިހާ އެއްޗެއް ނައްތާލުން. އެހެންވީމާ އެއްވެސް އެއްޗެއް ނުހުންނާނެ." ޣައްޒާގެ އަސްކަރީ މިޝަން އިސްރާއީލުގެ ސިފައިން ކުރިއަށް ގެންދާ ގޮތް ކިޔައިދެމުން ސިފައިންގެ މީހާ ބުންޏެވެ.

2023 ވަނަ އަހަރުގެ އޮކްޓޯބަރު 7 ވަނަ ދުވަހުން ފެށިގެން އިސްރާއީލުން ޣައްޒާ ގައި ކުރިއަށް ގެންދާ އިންސާނިއްޔަތާ ޚިލާފު ލޭ އޮހުރުން ގިނަ އަނިޔާވެރި ހަނގުރާމައިގައި ޣައްޒާގެ ހުރިހާ އިންފްރާސްޓްރަކްޗަރެއް އިސްރާއީލު ސިފައިން ވަނީ ނައްތާލާފައެވެ.