ޒަޚަމްވެފައިވާ ޣައްޒާގެ ރައްޔިތުންނަށް ޖަޕާނުން ފަރުވާ ދެނީ

ހަނގުރާމައިގެ ސަބަބުން ޣައްޒާގެ ބަލި މީހުންނަށާއި އަދި ޒަޚަމްވެފައިވާ މީހުންނަށް ސިއްޙީ ފަރުވާ ދިނުމަށް ވިސްނަމުންދާ ކަމަށް ދުނިޔޭގެ ހަތަރުވަނަ އަށް އެންމެ ބޮޑު އިޤްތިޞާދު އޮތް ޤައުމު ކަމުގައިވާ ޖަޕާނުގެ ބޮޑުވަޒީރު ޝިގެރު އިޝިބާ ވިދާޅުވެއްޖެއެވެ.

ހޯމަ ދުވަހު އޮތް ޕާލިމެންޓުގެ ޖަލްސާ އެއްގައި އިޝިބާ ވިދާޅުވީ، "ޣައްޒާގައި ބަލި ނުވަތަ ޒަޚަމްވެފައިވާ މީހުންނަށް" ޖަޕާނުގައި ސިއްހީ ފަރުވާ ފޯރުކޮށްދިނުމުގެ ސިޔާސަތެއް އެކުލަވާލުމުގެ މަސައްކަތް އޭނާގެ ސަރުކާރުން ކުރަމުންދާ ކަމަށެވެ.

އޭގެ އިތުރުން ޣައްޒާގެ ރައްޔިތުންނަށް ތަޢުލީމީ ފުރުޞަތުތައް ފަހިކޮށްދިނުމަށް ޖަޕާނުން ވިސްނަމުންދާ ކަމަށް އޭނާ ވިދާޅުވިއެވެ.

އިޝިބާ މިހެން ވިދާޅުވީ، 2017 ވަނަ އަހަރު ސޫރިއާގެ ރެފިއުޖީން ދަރިވަރުންގެ ގޮތުގައި ބަލައިގަތުމަށް ޖަޕާނުން ހިންގި ޕްރޮގްރާމެއް، ޣައްޒާގެ ރައްޔިތުންނަށް އެހީތެރިވުމުގެ ގޮތުން ހިންގިދާނެތޯ ގާނޫނު ހަދާ މަޖިލިހުގެ މެމްބަރަކު ކުރި ސުވާލަކަށް ޖަވާބު ދެއްވަމުންނެވެ.

"އަޅުގަނޑުމެން ޣައްޒާ އަށް މިފަދަ ޕްރޮގްރާމެއް ފެށުމާމެދު ވިސްނަމުން ގެންދަނީ، އަދި މި ޕްލޭން ޙަޤީޤަތަކަށް ހެދުމަށް ސަރުކާރުން މަސައްކަތްކުރާނެ" ކަމަށް އިޝިބާ ވިދާޅުވިއެވެ.

ޕާލިމެންޓުގައި މަޝްވަރާކުރެވުނު މި ފިޔަވަޅުތަކަކީ ޖަޕާނުން ސިޔާސީ ހިމާޔަތް ދިނުމާ އަދި މުޅިން ތަފާތު ކަމެއް ކަމަށް ރިޕޯޓުތައް ބުނެއެވެ. ސިޔާސީ ހިމާޔަތް ދިނުމުގައި ޖަޕާނުން ގެންގުޅޭ ހަރުކަށި ސިޔާސަތައް ވަރަށް ބޮޑަށް ފާޑު ކިޔުން އަމާޒުވެފައިވާއިރު ގިނަ ބަޔަކު ގަބޫލު ކުރާ ގޮތުގައި އެއީ މާ ހަރުކަށި ސިޔާސަތެކެވެ.

2023 ވަނަ އަހަރު ޖަޕާނުން ސިޔާސީ ހިމާޔަތް ހޯދުމަށް އެދުނު 13,823 މީހުންގެ ތެރެއިން ޤަބޫލުކުރީ 1,310 މީހުންނެވެ. އެއީ 10 އިންސައްތަ އަށްވުރެ މަދު އަދަދެކެވެ.

މީގެ އިތުރުން، އެހެން އޮނިގަނޑެއްގެ ދަށުން، ވޭތުވެދިޔަ އަހަރުގެ ނިޔަލަށް، އދ. ގެ ރެފިއުޖީ އޭޖެންސީން ރެފިއުޖީންގެ ގޮތުގައި ބަލައިގަނެފައިވާ ސޫރިއާގެ ޖުމްލަ 82 މީހުން، ދަރިވަރުންގެ ގޮތުގައި ޖަޕާނުން ބަލައިގެންފައިވާ ކަމަށް ޖަޕާނުގެ ފޮރިން މިނިސްޓްރީން ހާމަ ކޮށްފައިވެއެވެ.

ޖަޕާނުގެ ފޮރިން މިނިސްޓްރީގެ އޮފިޝަލަކު އޭއެފްޕީ އަށް ބުނިގޮތުގައި، އެ ސްކީމްގެ މަޤްޞަދަކީ ޖަޕާނުގެ ދިގު މުއްދަތުގެ ބޭރުގެ އެހީގެ ސިޔާސަތުގެ ބައެއްގެ ގޮތުގައި ސޫރިއާގެ މުސްތަޤްބަލުގެ ލީޑަރުންނަށް ތަޢުލީމު ދިނުމެވެ.

ޖެނުއަރީ 19 ގައި ޢަމަލުކުރަން ފެށި ހަނގުރާމަ ހުއްޓާލުމުގެ އެއްބަސްވުމުގެ ބައެއްގެ ގޮތުން، ހޮނިހިރު ދުވަހު އަލުން ހުޅުވާލެވުނު ރަފާ ކްރޮސިންގ ގެ ތެރެއިން 30 ކުޑަކުދިންނާއެކު 50 ފަލަސްތީނު ބަލިމީހުން އަދި އެމީހުންގެ އެހީތެރިން މިޞްރަށް ދަތުރުކުރި ކަމަށް ޣައްޒާގެ ޞިއްޙަތާ ބެހޭ މިނިސްޓްރީން ބުންޏެވެ.

ޣައްޒާގެ ސިއްހީ އޮފިޝަލުން ހާމަ ކޮށްފައިވާ ގޮތުގައި ފަރުވާ އަށް ބޭނުންވާ 6,000 ބަލިމީހުން ފަލަސްޠީނު ސަރަޙައްދުން ބޭރަށް ގެންދިއުމަށް ތައްޔާރަށް ތިބިއިރު، 12,000 އަށްވުރެ ގިނަ މީހުން " ވަރަށް ބޮޑަށް ފަރުވާއަށް ބޭނުންވެފައި" އެބަތިއްބެވެ.