އެމެރިކާގެ ރައީސް ޑޮނަލްޑް ޓްރަމްޕް ޣައްޒާ އަށް ހުށަހަޅާފައިވާ ސުލްހައިގެ ޕްލޭން ވަރުގަދަކުރުމަށް އެމެރިކާއިން ތައްޔާރުކޮށްފައިވާ ޑްރާފްޓް ރިޒޮލިއުޝަން އަށް ތާއީދުކުރުމަށް ޓްރަމްޕް ޔޫއެން ސެކިއުރިޓީ ކައުންސިލަށް ގޮވާލައިފި އެވެ.

ސުލްހައިގެ ޕްލޭނަށް ތާއިދު ކުރުމަށް ގޮވާލުމުގެ އިތުރުން، އެ ޕްލޭން ފާސް ނުވެއްޖެ ނަމަ ފަލަސްތީނުން "ވަރަށް ބޮޑު" ނަތީޖާތަކާ ކުރިމަތިވެދާނެކަމަށް ވެސް ޓްރަމްޕް އިންޒާރު ދެއްވި އެވެ.

ޔޫއެންގައި ހުންނަ އެމެރިކާގެ މިޝަނުން ނެރުނު ބަޔާނެއްގައި ތަރުޖަމާނަކު ވިދާޅުވެފައިވަނީ މި ގަރާރާ މެދު އެއްބަސްވުމަކަށް އައުމަށް މުހިންމު މަޝްވަރާތަކެއް ކުރަމުންދާއިރު ހިޔާލު ތަފާތުވެއްޖެނަމަ އެކަމުގެ ސަބަބުން ޣައްޒާގައި ތިބި ފަލަސްތީނުގެ ރައްޔިތުންނަށް ރައްކާތެރިކަމާއި ސަލާމަތްތެރިކަން ނުލިބޭނެ ނަތީޖާތަކެއް ކުރިމަތިވެދާނެ ކަމަށެވެ.

މި ރިޒޮލިއުޝަނާ ބެހޭގޮތުން އެއްބަސްވުމަށް މަޝްވަރާކުރަމުންދާ ހަނގުރާމަ ހުއްޓާލާފައިވާ ނާޒުކު ދަނޑިވަޅުގައި، ކައުންސިލުން އެއްބައިވަންތަވެ، އިންތިހާއަށް ބޭނުންވާ ސުލްހަ ކަށަވަރު ކުރުމަށް ކުރިއަށް ދިއުން މުހިންމު ކަމަށާއި، އަދި މިއީ މެދު އިރުމަތީގައި ސުލްހަ ގާއިމް ކުރުމަށް ހުޅުވިގެންދާނެ ތާރީހީ މަސައްކަތަކަށް ވެގެންދާނެ ކަމަށް އޮފިޝަލު ވަނީ ވިދާޅުވެފަ އެވެ.

ފާއިތުވި ހަފްތާގައި، އިޒްރޭލާއި ހަމާސްގެ ދެމެދު ދެ އަހަރު ދުވަހު ކުރިއަށްދިޔަ ހަނގުރާމަ ހުއްޓާލުމަށް އެއްބަސްވުމަށްފަހު، ޓްރަމްޕްގެ ޕްލޭނަށް ތާއީދުކުރާ ޑްރާފްޓެއްގެ މައްޗަށް އެމެރިކާގެ އޮފިޝަލުން އދ ގެ ސެކިއުރިޓީ ކައުންސިލުގެ ތެރޭގައި ދަނީ މަޝްވަރާ ކުރަމުންނެވެ.

އޭއެފްޕީން ރިޕޯޓު ކުރި ގޮތުގައި ރިޒޮލިއުޝަންގެ ތިންވަނަ ޑްރާފްޓުގައި "ބޯޑް އޮފް ޕީސް ގާއިމުކުރުމަށް" އެއްބަސްވާ އިރު، އެ ބޯޑަކީ ޣައްޒާގެ އިންތިގާލީ ވެރިކަން ކުރާ އިދާރާއެއް ގާއިމްކުރުމަށްފަހު ޓްރަމްޕް ރިޔާސަތު ބަލަހައްޓާ ގޮތަށް 2027 ވަނަ އަހަރުގެ ނިޔަލަށް މެންޑޭޓެއް ހިމެނޭ ޑްރާފްޓެކެވެ.

މިއިން މެންބަރު ގައުމުތަކަށް "ވަގުތީ އިންޓަނޭޝަނަލް ސްޓެބިލައިޒޭޝަން ފޯސް (އައިއެސްއެފް)" އުފެއްދުމަށް ހުއްދަ ލިބިގެންދާނެ އެވެ. އަދި މި ފޯސް އިން އިޒްރޭލާއި މިސްރާއި އަލަށް ތަމްރީނުކުރެވޭ ފަލަސްތީނު ފުލުހުންނާ އެކު މަސައްކަތްކޮށް، ސަރަހައްދީ ރައްކާތެރިކަން ކަށަވަރުކޮށް، ޣައްޒާ އިން ހަތިޔާރު އެޅި ފަރާތްތައް އެއްކޮށް ނައްތާލަން މަސައްކަތް ކުރާނެ އެވެ.

އަދި އާންމުން ރައްކާތެރިކުރުމާއި އިންސާނީ އެހީގެ ކޮރިޑޯތައް ރައްކާތެރިކުރުމުގެ މަސައްކަތް ވެސް ކުރާނެއެވެ. ހަމަ މިއާއެކު ހަތިޔާރު އެޅި ހަނގުރާމަވެރިން ތިބޭ ތިބުމަށް ނިމުމަކަށް ގެނައުމަށް މި ފޯސް އަށް ބާރު ލިބިގެންދާނެ އެވެ.

ކުރީގެ ޑްރާފްޓްތަކާ ހިލާފަށް، އެންމެ ފަހުގެ ޑްރާފްޓުގައި މުސްތަގުބަލުގައި ފަލަސްތީނު ސަރުކާރެއް އުފެދިދާނެކަމުގެ ވާހަކަ ބުނެފައިވެ އެވެ.

ފަލަސްތީނު އޮތޯރިޓީން އެދިފައިވާ އިސްލާހުތައް ހިމަނައި، ޣައްޒާ އަލުން އާރާސްތު ކުރަން ފަށައިފިނަމަ، ފަލަސްތީނު ރައްޔިތުންގެ މިނިވަންކަމާއި ސަރުކާރެއް ގާއިމްކުރުމަށް މަގު ފަހިވެގެންދާނެ ކަމަށް ޑްރާފްޓުގައި ބުނެފައިވެ އެވެ. ޑްރާފްޓުގައި އިތުރަށް ބުނެފައިވަނީ އެމެރިކާއިން އިޒްރޭލާއި ފަލަސްތީނާ ދެމެދު މަޝްވަރާތައް ބޭއްވުމަށް ހަމަޖެހިފައިވާ އިރު މި މަޝްވަރާތަކުގައި ސިޔާސީ އަދި ހަމަޖެހުން ގާއިމްކޮށް އެއްފަރާތުން އަނެއް ފަރާތުގެ ކަންކަމާއި ނުބެހި އުޅޭވޭނެ ގޮތަށް ކަންކަން ފަހިކުރެވިގެންދާނެ ކަމަށެވެ.

އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ ބުދަ ދުވަހު ބުނީ ރިޒޮލިއުޝަން ގަބޫލުކުރާނެކަމަށް އުއްމީދުކުރާކަމަށެވެ. އަދި އުއްމީދަކީ ވަރަށް އަވަހަށް އެކަމުގައި ފިޔަވަޅު އަޅަން ފެށުން ކަމަށް ކެނެޑާގައި ނޫސްވެރިންނަށް ވާހަކަދައްކަމުން އޭނާ ވިދާޅުބެފައިވެ އެވެ.

ނަމަވެސް ކައުންސިލްގެ މެމްބަރުން ބޯޑް އޮފް ޕީސް އުފެއްދުމަށް ތާއީދުކުރާކަމަށް ފެނުނު ނަމަވެސް، ޑިޕްލޮމެޓުން އޭއެފްޕީއަށް ބުނީ ޑްރާފްޓާ ބެހޭގޮތުން ސުވާލުތައް އުފެދިފައިވާކަމަށެވެ. އެއީ ސެކިއުރިޓީ ކައުންސިލުން ބަލަހައްޓާނެ ނިޒާމެއްގެ ވާހަކަ ލިޔުމުގައި ނެތުމާއި، ފަލަސްތީނު އޮތޯރިޓީއަށް މުސްތަގުބަލުގައި ދައުރެއް ލިބިދާނެތޯ، އަދި އައިއެސްއެފްގެ މެންޑޭޓާ ބެހޭ ތަފްސީލުތައް ހިމެނެއެވެ.