އުތުރު ޣާއްޒާގައި އިޒްރޭލުގެ 4 ސިފައިން މަރުވެއްޖެ
29 އޮކްޓޯބަރު 2024 | އަންގާރަ 15:16އަންގާރަ ދުވަހު އިޒްރޭލުން ޣައްޒާ ސިޓީއަށް ދިން ބޮމުގެ ހަމަލާއެއްގައި މަދުވެގެން 5 އާންމު ރައްޔިތުން މަރުވެ، 20 އަށްވުރެ ގިނަ މީހުން ޒަޚަމްވެފައިވޭ
ޣައްޒާ އިޒްރޭލު ބޯޑަރު ސަރަހައްދުގައި އިޒްރޭލު ސިފައިންގެ މީހަކު ޓޭންކަރެއްގައި ހަރަކާތްތެރިވަނީ
އުތުރު ޣައްޒާގައި ފަލަސްތީނުގެ ޖިހާދު ކުރާ ފަރާތްތަކާއި އިޒްރޭލު ސިފައިންނާ ދެމެދު ބަދަލުކުރި ހަމަލާތަކެއްގައި އިޒްރޭލު ސިފައިންގެ 4 މީހުން މަރުވެއްޖެ ކަމަށް އިޒްރޭލުގެ އަސްކަރިއްޔާ އިން ބުނެފިއެވެ.
އަސްކަރިއްޔާގެ ބަޔާނުގައި ބުނެފައިވަނީ މި ހާދިސާ ގައި އިތުރު ސިފައިންގެ މީހަކަށް ބޮޑެތި އަނިޔާތަކެއް ލިބިފައިވާ ކަމަށެވެ.
އަނިޔާވި އޮފިސަރު ވަނީ ހޮސްޕިޓަލަށް ގެންދެވިފައިކަމަށްވެސް ބަޔާނުގައި ބުނެފައިވެއެވެ.
އަނެއްކޮޅުން އަންގާރަ ދުވަހު އިޒްރޭލުން ޣައްޒާ ސިޓީއަށް ދިން ބޮމުގެ ހަމަލާއެއްގައި މަދުވެގެން 5 އާންމު ރައްޔިތުން މަރުވެ، 20ށް ވުރެ ގިނަ މީހުން ޒަޚަމްވެފައިވާ ކަމަށް ވަފާ ނިއުސް އޭޖެންސީން ބުނެފައިވެއެވެ.
ސަރަޙައްދުގެ މަޞްދަރުތަކުން ކަށަވަރުކޮށްދިން ގޮތުގައި، އިޒްރޭލުގެ ހަނގުރާމަ މަތިންދާބޯޓުތަކުން ޣައްޒާ ސިޓީގެ އިރުމަތީގައިވާ އައްޝަހާބާ މާރުކޭޓަށް ދެ ފަހަރު ހަމަލާދިނެވެ. މި މާރުކޭޓަކީ ވިޔަފާރިވެރިންނާއި ބާޒާރު ކުރާ މީހުން ގިނަ ތަނެކެވެ.
އެންމެ ފަހުގެ ތަފާސް ހިސާބުތަކުން ދައްކާގޮތުގައި، 7 އޮކްޓޯބަރު 2023 ގައި އިޒްރޭލުން ފެށި ހަމަލާތަކުގެ ސަބަބުން ޣައްޒާގައި މަރުވި މީހުންގެ އަދަދު 43,061 އަށް އަރައިފިއެވެ. މީގެ ތެރޭގައި ގިނައީ ކުޑަކުދިންނާއި އަންހެނުންނެވެ. ޒަޚަމްވި މީހުންގެ އަދަދު މިހާތަނަށް 101,223 އަށް ވަނީ އަރާފައެވެ.
