އިޒްރޭލުން އައު ގަތުލުއާންމެއް ހިންގާ ބައިތް ލަހިޔާގައި މަދުވެގެން 77 ފަލަސްތީން މީހުން ޝަހީދު ކޮށްލައިފި

ގާޒާ ސްޓްރިޕްގެ އުތުރުގައިވާ ބައިތް ލަހިޔާގައި ޔަހޫދީ ބާރުތަކުން ހިންގި އައު ގަތުލުއާންމެއްގައި، ކުޑަކުދިންނާއި އަންހެނުން ހިމެނޭ ގޮތަށް 77 އަށްވުރެ ގިނަ އާންމުން ޝަހީދުކޮށްލައިފިއެވެ. އަދި ގިނަ އަދަދެއްގެ މީހުންނަށް، ނުރައްކާތެރި އަނިޔާތައް ލިބިފައިވާ ކަމަށް ވަފާ ނިއުސް އޭޖެންސީން ބުނެއެވެ.

ސިއްހީ އޮފިޝަލުން ބުނާ ގޮތުގައި، ބައިތް ލަހިޔާ އަށް ދިން ހަމަލާ އަމާޒުކޮށްފައިވަނީ، 150 އެއްހާ ރެފިއުޖީން ދިރިއުޅޭ 5 ބުރީގެ އާންމުން އިމާރާތަކަށެވެ.

ރިޕޯޓުތައް ބުނާ ގޮތުގައި، އެތައް ބަޔަކު އަދިވެސް ފުނޑުވެފައިވާ ގައުތަކުގެ ދަށުގައި ވާކަމަށް ވަނީ ބެލެވިފައެވެ.

ދިރިތިބި މީހުން ހޯދުމަށް ނުވަތަ މަރުވެފައިވާ މީހުންގެ ހަށިތައް ނެގުމަށް އެހީތެރިކަމަށް އެދި ގޮވަމުން ދިޔަ ނަމަވެސް، ސިވިލް ޑިފެންސްއާއި އެމްބިއުލާންސްތަކަށް އެތަނަށް ވާސިލުވެވޭނެ ގޮތެއް ނެތް ކަމަށް ޚަބަރުތައް ބުނެއެވެ.

ލޯކަލް ވަސީލަތްތަކުން ބުނާ ގޮތުގައި، އަންގާރަ ދުވަހު ފަތިހު ދިން މި ހަމަލާތަކުގައި އަނިޔާވި މީހުން ކަމާލް އަދްވާން ހޮސްޕިޓަލަށް ގެންނަމުންދާއިރު، މިހާތަނަށް ސީރިއަސް ޒަޚަމްތަކާއެކު ގެނައި މީހުންގެ އަދަދު 20 އަށްވުރެ މައްޗަށް ވަނީ ގޮސްފައެވެ.

އުތުރު ޣައްޒާ ސްޓްރިޕް، ޚާއްޞަކޮށް ޖަބާލިޔާ އާއި ބައިތް ލަހިޔާ ހިސޯރުކޮށްގެން ޔަހޫދީ ސިފައިން ތިބޭތީ 25 ދުވަސް ވެފައިވާއިރު، އެ ސަރަހައްދުތަކުގައި ބަނޑުހައި ހޫނުކަން އާންމުވެ، ކާނާއާއި، ފެނާއި، ތެލާއި އަދި ބޭސް ވެއްދުން މަނާކުރެވިފައި އޮތުމުގެ ސަބަބުން އެތައް އާންމުންނެއް ދަނީ މަރުވަމުންނެވެ.