އަންރުވާ އަކީ ޓެރަރިސްޓް ޖަމާއަތެއް ކަމަށް ހަދާ، އެ ޖަމާއަތުގެ ޚިދުމަތްތައް ހުއްޓުވުމަށް އިޒްރޭލުން ގާނޫނެއް ފާސްކޮށްފި

އދ. ގެ ފަރާތުން ފަލަސްތީނުގެ ރައްޔިތުންނަށް އެހީ ފޯރުކޮށްދޭ އޭޖެންސީ އަންރުވާ (ޔުނައިޓެޑް ނޭޝަންސް ރިލީފް އެންޑް ވަރކްސް އޭޖެންސީ) އިޒްރޭލުގައި މަސައްކަތްކުރުން މަނާކުރާ ޤާނޫނެއް ފާސްކޮށްފިއެވެ.

މި ގާނޫނު ފާސްކުރުމާއެކު އެ ޖަމްޢިއްޔާގެ އިސްވެރިޔާ ވިދާޅުވި ގޮތުގައި "ޚާއްޞަކޮށް ޣައްޒާގައި ތިބި ފަލަސްޠީނުގެ ރައްޔިތުންގެ ހާލު އިތުރަށް ނިކަމެތިވެގެންދާނެ" އެވެ. 

އިޒްރޭލުގެ ގާނޫނު ހަދާ މަޖިލީހުން ނިންމި މި ނިންމުމުގެ ސަބަބުން އިޒްރޭލުގެ ބާރުގެ ދަށުގައިވާ ޣައްޒާ އަދި ވެސްޓް ބޭންކުގައި އެ ޖަމްޢިއްޔާއިން ހިންގަމުންދާ އެހީގެ މަސައްކަތްތަކަށް ބޮޑެތި ހުރަސްތަކެއް ކުރިމަތިވާނެ ކަމަށް ބެލެވެއެވެ. 5 މިލިއަނަށްވުރެ ގިނަ ފަލަސްޠީނު ރެފިއުޖީންނަށް ޒިންމާވާ އަންރުވާއަށް އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ ވަނީ ތަކުރާރުކޮށް ތުހުމަތުތައް ކޮށް ފާޑުކިޔާފައެވެ. ނަތަންޔާހޫ ތަކުރާރުކޮށް ތުހުމަތުކޮށްފައިވާ ގޮތުގައި އަންރުވާއަކީ ހަމާސް އަދި އެހެނިހެން ހަނގުރާމަވެރި ޖަމާޢަތްތަކާ ގުޅުން އޮތް ޖަމްޢިއްޔާއެކެވެ. 

ހޯމަ ދުވަހު ކެނެސެޓުން ފާސްކުރި މި އައު ޤާނޫނުގެ ދަށުން އަންރުވާއަށް އިޒްރޭލުގެ އޮފިޝަލުންނާ އެއްވެސް ގުޅުމެއް ބޭއްވުން މަނާކޮށް، އެ ޖަމްޢިއްޔާގެ މުވައްޒަފުންނަށް އިޒްރޭލުން ދެމުން އައި ޤާނޫނީ ރައްކާތެރިކަން ވަނީ ނިގުޅައިގަނެފައެވެ. 

އިޒްރޭލުގެ ޕާލަމެންޓުން ވަނީ އެ ޖަމްޢިއްޔާއަކީ ޓެރަރިސްޓު ޖަމާޢަތެއް ކަމަށްވެސް އިޢުލާނުކޮށްފައެވެ. އަލަށް ފާސްކުރި މި ގާނޫނު ތަންފީޒުކުރަން ފަށާނީ އިޒްރޭލުގެ ފޮރިން މިނިސްޓްރީން އދ. އަށް އެންގުމަށްފަހު 60 ދުވަހާއި 90 ދުވަހުގެ ތެރޭގައި ކަމަށް ރިޕޯޓުތައް ބުނެއެވެ. 

އދ. ގެ ސެކްރެޓަރީ ޖެނެރަލް އަންޓޯނިއޯ ގުޓެރެސް ވިދާޅުވީ މި އައު ޤާނޫނުގެ ސަބަބުން "ފަލަސްޠީނުގެ ބިމުގައި ތިބި ފަލަސްތީނުގެ ރެފިއުޖީންނަށް ނުރައްކާތެރި ނަތީޖާތަކެއް ކުރިމަތިވެދާނެ،" ކަމަށެވެ.

"އަންރުވާގެ ބަދަލުގައި އެހެން އޮޕްޝަނެއް ނެތް،" ގުޓަރެސް ނެރުއްވި ބަޔާނެއްގައި ވިދާޅުވިއެވެ. "މި ޤާނޫނުތައް ތަންފީޒުކުރުމުން އިޒްރޭލު-ފަލަސްޠީނު ހަމަނުޖެހުން ޙައްލުކުރުމަށާއި މުޅި ސަރަޙައްދުގެ ސުލްޙަ އަށާއި އަދި ސަލާމަތަށް ގެއްލުންވާނެއެވެ. ކުރިންވެސް އަޅުގަނޑު ބުނި ފަދައިން، އަންރުވާއަކީ ކޮންމެހެން ބޭނުންތެރި ޖަމްޢިއްޔާއެކެވެ."

ގުޓެރެސް އިތުރަށް ވިދާޅުވީ އޭނާ މި މައްސަލަ އދ. ގެ ޖެނެރަލް އެސެމްބްލީގެ ސަމާލުކަމަށް ގެންނަވާނެ ކަމަށެވެ. އަންރުވާގެ އިސްވެރިޔާ ފިލިޕް ލަޒަރީނީ އިންޒާރުދެއްވާފައިވަނީ އަންރުވާ މަނާ ކުރުމަށް ފާސްކުރި ގާނޫނުގެ ސަބަބުން "ޚާއްޞަކޮށް ޣައްޒާގައި ތިބި ފަލަސްޠީނުގެ ރައްޔިތުންގެ ހާލު އިތުރަށް ދަށްވެގެންދާނެ" އެވެ. 1.9 މިލިއަނަށްވުރެ ގިނަ ފަލަސްޠީނުގެ ރައްޔިތުން ވަނީ އެމީހުންގެ ގެދޮރުން ނުކުމެ ހިޖުރަކުރަން މަޖުބޫރުވެފައެވެ. އަދި ޣައްޒާގައި ކާނާ، ފެން އަދި ބޭސްފަރުވާގެ ބޮޑު ދަތިކަމެއް ވަނީ ކުރިމަތިވެފައިވެއެވެ. އަންރުވާއިން މުޅި ސަރަޙައްދުގައި ތިބި މިލިއަނުން ގުނާ ފަލަސްޠީނު ރެފިއުޖީންނަށް ތަޢުލީމު، ޞިއްޙީ ޚިދުމަތް އަދި އެހެނިހެން އަސާސީ ޚިދުމަތްތައް ފޯރުކޮށްދެއެވެ. މީގެ ތެރޭގައި އިޒްރޭލުން ހިފާފައިވާ ވެސްޓް ބޭންކުގައި ތިބި ރެފިއުޖީންވެސް ހިމެނެއެވެ.