ކުޅުންތެރިންނާމެދު ފަޚުރުވެރިވަން، މަސައްކަތް ކާމިޔާބުވާ ކަމުގެ އިޙުސާސް ކުރެވޭ: ފްލިކް

ސްޕެއިންގެ ބާސެލޯނާގެ ކުޅުންތެރިންނާ މެދު ފަޚުރުވެރިވާ ކަމަށާއި، އެ ޓީމުގައި ކުރަމުން އަންނަ މަސައްކަތް ކާމިޔާބުވާ ކަމުގެ އިޙުސާސް ކުރެވޭ ކަމަށް ހަންސީ ފްލިކް ބުނެފި އެވެ.

ބާސެލޯނާގެ ކޯޗު ފްލިކް މިހެން ބުނީ، ސްޕެނިޝް ލީގުގައި އެންމެ ފަހުގެ ޗެމްޕިއަން ރެއާލް މެޑްރިޑާ ދެކޮޅަށް ބާސެލޯނާ އިން ކުޅުނު މެޗަށްފަހު އެވެ. ރެއާލްގެ އަމިއްލަ ދަނޑުގައި ކުޅުނު އެ މެޗު ބާސެލޯނާ އިން ކާމިޔާބު ކޮށްފައި ވަނީ ދެ ވަނަ ހާފުގައި ޖެހި ހަތަރު ލަނޑުންނެވެ. ބާސެލޯނާއާ ދެކޮޅަށް ކުޅުނު މެޗުން ބަލި ނުވެ ފަރުޖައްސާލައިގެން، ރެއާލަށް ރެކޯޑެއް ޤާއިމު ކުރުމުގެ ފުރުސަތު ވެސް އޮތެވެ. އެއީ ލީގުގައި ބަލި ނުވެ ބާސެލޯނާ އިން ހަމަކޮށްފައިވާ 43 މެޗުގެ ރެކޯޑެވެ. ބާސެލޯނާއާ ދެކޮޅަށް ކުޅުނު މެޗަކީ ލީގުގައި ބަލި ނުވެ ރެއާލް ކުޅުނު 43 ވަނަ މެޗެވެ. ނަމަވެސް އެ މެޗުން ރެއާލް ވަނީ ބަލިވެފަ އެވެ.

އެ މެޗަށްފަހު ނޫސްވެރިންނާ ވާހަކަ ދައްކަމުން ފްލިކް ބުނީ، ބާސެލޯނާގައި މަސައްކަތް ކުރުމާއި، ބާސެލޯނާ އާއެކު ކުރިއަށް ދިޔުމަކީ އޭނާ އަށް ލިބޭ ވަރަށް ބޮޑު އުފަލެއް ކަމަށެވެ. ބާސެލޯނާ އަށް އިރުޝާދު ދިނުމަކީ އުފާވެރިކަން ގެނެސްދޭ ކަމެއްކަން ފާހަގަކޮށް ފްލިކް ބުނީ، އެ ޓީމުގެ ކުޅުންތެރިންނާ މެދު އޭނާ ވަރަށް ބޮޑަށް ފަޚުރުވެރިވާ ކަމަށެވެ. ޚާއްސަކޮށް ވާދަވެރި ރެއާލާ ދެކޮޅަށް ބާސެލޯނާގެ ކުޅުންތެރިން ދެއްކި ކުޅުމާއި، އެ މެޗުން ލިބުނު ނަތީޖާއާ މެދު ވަރަށް ބޮޑަށް ހިތްހަމަ ޖެހިފައި ހުރިކަމަަށް ފްލިކް ބުންޏެވެ.

މެޗުގެ ދެ ވަނަ ހާފުގައި ބާސެލޯނާ އިން ހަތަރު ލަނޑު ޖަަހައި އެ ޓީމު ކޮޅަށް މެޗުގެ ނަތީޖާ އަނބުރާލުމަށް އިޝާރާތް ކުރަމުން ފްލިކް ބުނީ، އެކަން ކުރެވުނީ ކޮންމެ ވަގުތެއްގައި ވެސް ބާސެލޯނާގެ ކުޅުންތެރިން ދެއްކި ސަމާލުކަމާއި، ހަމަލާތަކެއް އުފެއްދުމަށް ކުރި މަސައްކަތުން ކަމަށެވެ. ޚާއްސަކޮށް ރެއާލަށް މާ ގިނަ ފުރުސަތުތަކެއް ނުލިބޭނެހެން ބާސެލޯނާގެ ކުޅުންތެރިން ރޭވުންތެރިކަމާއެކު ދެއްކި ކުޅުމުގެ ނަތީޖާ އަކީ، އެ ޓީމު ކޮޅަށް މެޗުގެ ނަތީޖާ އެނބުރުން ކަމަށް ވެސް އޭނާ ވަނީ ބުނެފަ އެވެ.

މީގެ އިތުރުން ފްލިކް ބުނީ ޑިފެންސްގައި ބާސެލޯނާގެ ކުޅުންތެރިން ދެއްކި ކުޅުމަކީ އެންމެ ފާހަގަކޮށްލެވުނު ކަންތައް ކަމަށެވެ. ޚާއްސަކޮށް ޑިފެންސް އަށް އިސްކަން ދީގެން ބާސެލޯނާ އިން ފަރިތަކޮށްފައިވާކަމަށް ވެސް ފްލިކް ބުންޏެވެ. ޚާއްސަކޮށް ރެއާލާ ދެކޮޅަށް ކުޅޭއިރު އެ ޓީމުގައި ތިބި ތަފާތު ކުޅުންތެރިން ހުއްޓުވުމަށް ކުރަން ޖެހުނު ކަންކަން ބާސެލޯނާ އިން ކުރަމުން ދިޔަ ކަމަށް ވެސް ފްލިކް ވަނީ ބުނެފަ އެވެ.

ފްލިކް ޤަބޫލު ކުރާ ގޮތުގައި ބާސެލޯނާ އިން މިހާރު ކުރަމުން އަންނަނީ ރަނގަޅު މަސައްކަތެކެވެ. އެ މަސައްކަތާ އެކު ބާސެލޯނާ އިން ދާން ބޭނުންވާ މިސްރާބުގައި އެ ޓީމު ކުރިއަށްދާ ކަމަށާއި، އޭނާ ކުރަމުން އަންނަ މަސައްކަތް ކާމިޔާބުވާ ކަމުގެ އިޙުސާސް ކުރެވޭ ކަމަށް ވެސް ފްލިކް ވަނީ ބުނެފަ އެވެ. ރެއާލް އަތުން ހޯދި މުހިންމު މޮޅާއެކު ބާސެލޯނާ އިން ވަނީ އެއް ވަނައިގައި ހަ ޕޮއިންޓުގެ ލީޑެއް ނަގައިފަ އެވެ.