ފްލެޓްތަކުގެ މައްސަލައިގައި މި ފެނުނީ ސަރުކާރުން ރައްޔިތުންގެ ކަރުގައި ހިފި މަންޒަރު - މާޒް ސަލީމް
ނިމިދިޔަ ސަރުކާރުން ދިން ފްލެޓްތަކާއި ގުޅޭގޮތުން އޭސީސީ އަށް މައްސަލަ ފޮނުވާފައި ވަނީ ބައެއް ޑޮކިއުމެންޓްތަކާއި ނުލާ ކަމަށް ސަލީމް ވިދާޅުވި
ހޯމް މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު ސަލީމް (މާޒް ސަލީމް)
ފްލެޓްތަކުގެ މައްސަލައިގައި މި ފެނުނީ ސަރުކާރުން ރައްޔިތުންގެ ކަރުގައި ހިފި މަންޒަރުކަމަށް ހޯމް މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު ސަލީމް (މާޒް ސަލީމް) ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ. ނިމިދިޔަ ސަރުކާރުން ދިން ފްލެޓްތަކާއި ގުޅޭގޮތުން އޭސީސީ އަށް މައްސަލަ ފޮނުވާފައި ވަނީ ބައެއް ޑޮކިއުމެންޓްތަކާއި ނުލާ ކަމަށާއި ބޭނުމަކީ ސަރުކާރުން ބޭނުންވާހާ މީހަކަށް އެ މައްސަލައިގައި ދައުވާކުރުމުގެ ފުރުސަތު ހޯދުން ކަމަށް އެނާ ވިދާޅުވިއެވެ. އޭނާ ވިދާޅުވީ 2013 އިން 2018 އަށް އޮތް ކުރީގެ ރައީސް އަބްދުﷲ ޔާމީންގެ ސަރުކާރުން ވެސް އޭސީސީ އަށް މައްސަލަތައް ފޮނުވަނީ ޑޮކިއުމެންޓްތައް ފުރިހަމަ ނުކޮށް ކަމަށެވެ. އެކަން އެގޮތަށް ކުރަނީ ސަރުކާރުން ބޭނުންވާ ވަކި ބަޔަކަށް ދައުވާކުރުމަށް ފަސޭހަކުރުމަށް ކަމަށް އޭނާ ވިދާޅުވިއެވެ. މިހާރުވެސް ވެރިކަމުގައި ތިބީ އެ ޚިޔާލާތުގެ މީހުން ކަމަށާއި އޭސީސީ އަށް މައްސަލަތައް ހުށަހަޅައިގެން ވަކި ބައެއްގެ ބޮލުގައި ބަދުނާމް އަޅުވަން މަސައްކަތް ކުރާ ކަމަށް އޭނާ ވަނީ ވިދާޅުވެފައެވެ.
ރައީސް މުއިއްޒު ވެރިކަމަށް ވަޑައިގަތީ ކުރީ ސަރުކާރުން ދިން ފްލެޓާއި ގޯތި ދިން ތަނަކުން ދިން ގޮތަކަށް ދޭނެ ކަމުގެ ވައުދާއި އެކުގައި ކަމަށް އޭނާ ވަނީ ވިދާޅުވެފައެވެ. އެހެންނަމަވެސް ވެރިކަމަށް ވަޑައިގެން މުޅިން އެހެން ގޮތަަކަށް އެނބުރި ފްލެޓާއި ގޯތި ނުދިނުމަށް ބަހަނާތައް ދައްކަމުންދާ ކަމަށް އޭނާ ވަނީ ވިދާޅުވެފައެވެ. އެގޮތުން އޭސީސީ އަށް މައްސަލަ ހުށަހެޅީ ވެސް ފްލެޓްތައް ނުދޭންވެގެން ކަމަށް އޭނާ ވަނީ ސިފަކުރައްވާފައެވެ. ފްލެޓްގެ މައްސަލަ އަކީ މިލްކިއްޔާތައި ގުޅުން ހުރި މައްސަލަ އެއް ކަމަށް ވުމާއި އެކު އެ މައްސަލަ އޭސީސީ އަށް ބެލިދާނެ ކަމާއި މެދު އޭނާ ވަނީ ސުވާލު އުފައްދަވާފައެވެ. އެހެންނަމަވެސް ފްލެޓް ދިނުމުގައި ގޯސްކޮށް ކަންތައްތައް ކޮށްފައިވާ ނަމަ އެ މައްސަލަ ބެލިދާނެ ކަމަށާއި، ބެލޭނީ ފްލެޓް ގޯސްކޮށް ދިން މީހާގެ މައްސަލަ ކަމަށް އޭނާ ވަނީ ވިދާޅުވެފައެވެ. ފްލެޓްގެ މައްސަލަ އޭސީސީ އަށް ފޮނުވާފައި ވަނީ އެކަމުގައި ޒިންމާ އިން ރެކި އެހެން ބައެއްގެ ބޮލުގައި ބަދުނާމް އެޅުވުމަށް ކަމަށް އޭނާ ވިދާޅުވިއެވެ.
މިއީ ދައުލަތުން ވަރަށް އަނިޔާވެރިކޮށް ކުރަމުންދާ ކަމެއް ކަމަށް އޭނާ ވިދާޅުވިއެވެ. 8 ފޫޓު، 8 ފޫޓުގެ ކޮޓަރިއެއްގައި އެތައް އަހަރެއް ވަންދެން ދަންފަޅި ބަހައިގެން އުޅޭ ދިވެހިން ތިބި ކަމަށާއި އެއީ ވަރަށް ބޮޑު އަނިޔާ އެއް ކަމަށް އޭނާ ވިދާޅުވިއެވެ. މި ސަރުކާރުން އެ ފްލެޓްތައް ނުދިނުމުގެ ނިޔަތުގައި ރާވައިގެން ޖަރީމާތަކެއް ހިންގާ ކަމަށް މާޒް ސަލީމް ވިދާޅުވިއެވެ. ދެން އެމްޑީޕީ ވެރިކަމަށް އަންނަ އިރު ގަސްތުގަ ފްލެޓާއި ގޯތި ނުދިނުމަށް ޢަމަލުތައް ހިންގާ މީހުންގެ މައްސަލަތައް ބަލަން ޖެހޭ ކަމަށް އޭނާ ވަނީ ވިދާޅުވެފައެވެ.
ފްލެޓް ލިސްޓަށް ފްލެޓް ދޫކުރުން ހުއްޓާލާފައިވަނީ އެންޓި-ކޮރަޕްޝަން ކޮމިޝަނުން އެންގުމާ ގުޅިގެންނެވެ. ގެދޮރުވެރިޔާ ސްކީމުގެ ދަށުން ހުޅުމާލޭގައި އާޅާ ފްލެޓް އިމާރާތް ތަކުގެތެރެއިން 700 ހައުސިން ޔުނިޓުގެ މަސައްކަތްތައް ނިންމައި އިންޑިއާ ސަރުކާރުން ވަނީ މި ހިނގާ އޮކްޓޯބަރ މަހުގެ ހަތްވަނަ ދުވަހު އެ ތަންތަން ރާއްޖެ އާއިހަވާލުކޮށްފައެވެ.
މި ސްކީމްގެ ދަށުން 15،046 މީހުން ޝަރުތު ހަމަވާ ކަމަށް ކުރީ ސަރުކާރުން ވަނީ ކަނޑައަޅާފައެވެ. އޭރު އެމްޑީޕީގެ ސަރުކާރުން ނިންމީ ފްލެޓަށް އެދި ހުށަހެޅި އެންމެންނަށް ފްލެޓް ދިނުމަށެވެ. އޭގެ ތެރެއިން 4000 ފުލެޓުގެ މަސައްކަތް ކޮންޓްރެކްޓްކޮށް އޭރު މަސައްކަތް ވަނީ ފަށާފައެވެ.
