ފްލެޓާއި ގޯތީގެ މައްސަލާގައި މިސަރުކާރުގެ ބޭފުޅުން އަބަދުވެސް ހައްްދަވަނީ ދޮގު: މުޒާހަރާގެ ބައިވެރިން

ފްލެޓާއި ގޯތީގެ މައްސަލާގައި މިސަރުކާރުގެ ބޭފުޅުން އަބަދުވެސް ހައްްދަވަނީ ދޮގު ކަމަށާއި، މިހާރު އެބޭފުޅުންނަށް ވެސް ދޮގު ހެއްދެވޭއިރު، އެނގިވަޑައިނުގަންނަވާ ކަމަށް މުޒާހަރާގެ ބައިވެރިން ބުނެފިއެވެ.

ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ގެދޮރުވެރިޔާ ސްކީމުން ދޫކޮށްފައިވާ ފްލެޓު ލިސްޓު އާއްމުނުކުރާތީ އެކަމުގެ ކަންބޮޑުވުންފާޅުކޮށް، ދަރުބާރުގޭގެ ދޮރުމަތީގައި އާދިއްތަ ދުވަހުގެ ހެނދުނު ވަނީ މުޒާހަރާކޮށްފައެވެ.

Advertisement

މުޒާހަރާގެ ބައިވެރިން ބުނެފައިވަނީ ރޯދަމަހުގެ ކުރިން ފްލެޓު ލިސްޓު އާއްމުކުރުމަށް މަސައްކަތް ކުރާކަމަށް ރައީސް ޑރ.މުހައްމަދު މުއިއްޒު ވިދާޅުވެފައިވާއިރު، ރޯދަމަހާ ވެސް އެބޭފުޅުން ކުރިމަތިލަނީ ދޮގުތަކެއް ކޮނޑުގައި އަޅައިގެން ކަމަށެވެ. ފްލެޓުގެ މައްސަލާގައި މިސަރުކާރުގެ ބޭފުޅުން ދޮގު ހަދަމުން ގޮސް، މިހާރު ދޮގު ހެދޭއިރު އެބޭފުޅުންނަށް ވެސް އެނގިވަޑައިނުގަންނަވާ ކަމަށް މުޒާހަރާގެ ބައިވެރިން ބުނެފައިވެއެވެ. މިއީ ދޮގުން ފުރިފައިވާ ދޮގު ސަރުކާރެއް ކަމަށް އެމީހުން ބުނެއެވެ.

މުޒާހަރާގެ ބައިވެރިން ބުނީ ރައްޔިތުންނަށް އަނިޔާވެރިނުވާނެ ކަމަށް ބުނެ އައިސަރުކާރުން ރައްޔިތުންނަށް އަނިޔާވެރިވަމުންދާ ކަމަށާއި، މިސަރުކާރުގެ ބޭފުޅުން ދައްކަވާ އެއްވެސް ވާހަކައަކަށް އިތުބާރެއް ނެތް ކަމަށެވެ.

ފްލެޓު ދޫނުކުރާ މައްސަލައާ ގުޅިގެން ފަހި ޔޫނިއަންގެ ފައުންޑަރ އިސްމާއިލް ނާއިފް ވިދާޅުވީ ފްލެޓުގެ ހައްގުވެރިންނަށް ފްލެޓުތައް ދޫކުރުމަށް 19 ވަނަ ރައްޔިތުން މަޖިލީހުން އަންގާފައިވާ ކަމަށެވެ. ނަމަވެސް އެކަމަށް އެއްވެސް އިދާރާއަކުން އިޖާބަދީފައިނުވާ ކަމަށާއި، މިއީ ކަންބޮޑުވާ މައްސަލައެއް ކަމަށް އޭނާ ވިދާޅުވިއެވެ.

ފްލެޓާއި ގޯތީގެ މައްސަލައިގައި ސަރުކާރުން އަމަލުކުރާ ގޮތް އަދިވެސް ސާފު ނުވާ ކަމަށާއި، ސަރުކާރުން އެ މައުލޫމާތު ނުދޭކަމަށް މުޒާހަރާގެ ބައިވެރިން ވަނީ ބުނެފައެވެ.