މި ސަރުކާރުގައި އުފަލުން އަތް ޖަހަނީ ''ބާބުލްއަވާލޭ'' ފިކުރާއި، ދައުލަތުގެ ތެރެއިން ވައްކަންކުރާ މީހުން އެކަނި: މާޒް ސަލީމް

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގައި އުފަލުން އަތް ޖަހަމުންދަނީ ''ބާބުލްއަވާލޭ'' ފިކުރުގައި ތިބި މީހުންނާއި، ދައުލަތުގެ ތެރެއިން ވައްކަންކުރާ މީހުން އެކަނި ކަމަށް އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މާޒް ސަލީމް ވިދާޅުވީ މިސަރުކާރުގައި ރައްޔިތުން ތިބީ މާޔޫސްކަމުގައި ކަމަށާއި، ތަރައްގީގެ މަޝްރޫއުތައް ހުއްޓިފައިވާތީ އުންމީދެއް ނެތް ކަމަށެވެ.

މާޒް ސަލީމް ވިދާޅުވީ ރައީސް މުއިއްޒު ރަށްރަށަށް ވަޑައިގަންނަވައި، ވައުދުތައް ތަކުރާރު ކުރެއްވި ނަމަވެސް ހަގީގަތް ރައްޔިތުންނަށް އެނގޭ ކަމަށާއި، މިސަރުކާރު ނިންމަން ގިނަ ބަޔަކު ބޭނުންވާ ކަމަށެވެ. ދައުލަތުގެ ތެރޭގައި ވެސް ރައްޔިތުންގެ ފަޅީގައި ބައެއް ބޭފުޅުން އެބަ ތިއްބެވި ކަމަށާއި، މި ސަރުކާރުން ނިންމަން އެބޭފުޅުން ބޭނުންވާ ކަމަށެވެ. އަދި ދައުލަތުގެ ކަންކަމަށް ވަރަށް ބޮޑަށް ފާރަވެރިވާ ކަމަށް އޭނާ ވިދާޅުވިއެވެ.

ރާއްޖެ ދަށު ދަރަޖައަށް ވެއްޓުނު ނަމަވެސް އުފަލުން އަތްޖަހާ ބަޔަކު ތިބިކަން ފާހަގަކުރައްވައި މާޒް ސަލީމް ވިދާޅުވީ އެއީ ބާބުލްވާލޭ ފިކުރުގައި ތިބި މީހުންނާއި، ދައުލަތުގެ ތެރެއިން ވައްކަންކުރާ މީހުން ކަމަށެވެ.

އެއްވެސް ތަރައްގީއެއް ނާދޭ. ހަގީގަތުގައި މި އަތް ޖަހަނީ ވަކި ބައެއް އެނގޭތޯ. ހަގީގަތުގައި މިއަތް ޖަހަނީ ބާބުލްއަވާލޭ ފިކުރުގައި ތިބި ބައެކާ. ދެން ދައުލަތުގެ ތެރެއިން ވައްކަން ކުރާ ބަޔަކާ. މުއިއްޒަށް އެނގިވަޑައިގަންނަވާނެ ދައުލަތުގެ ތެރޭގައި އެބަތިއްބެވި އެނގޭތޯ ވަރަށް މިކަންކަމަށް ފާރަވެރިވެ މިކަން ބައްލަވަމުން ވަޑައިގަންނަވާ ބޭފުޅުން ވެސް އެބަ ތިއްބެވި. ޒިންމާދާރު މަގާމުތަކުގައި ތިއްބަވައިގެން ވަރަށް ރަނގަޅަށް ރައްޔިތުންގެ ފަޅީގައި ތިއްބެވި ބޭފުޅުން އެބަ ތިއްބެވި. އެހެންވީމަ އެބޭފުޅުން އެބަ ބޭނުންވޭ މިހާރު މިކަން ނިންމަން ވެސް. އެބޭފުޅުން ގަބޫލުކުރާ ގޮތުގައި މިހާރުން މިހާރަށް މިކަން ނުނިންމާފިކަމަށްވަންޏާ ނޫނިއްޔާ ދިވެހިރާއްޖޭ އަނބުރާ އަޅުގަނޑުމެންނަށް ނުލިބޭނެ އެނގޭތޯ. އެހައި ދަށު ދަރަޖައަށް އަޅުގަނޑުމެންގެ ކަންތައް ގޮސްފައި މިއޮތީ.

އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް)

މާޒް ސަލީމް ވިދާޅުވީ ރައީސް މުއިއްޒަށް ގައުމު ހިންގަން ނޭނގޭ ކަމަށެވެ. އެކަމުގެ ނަތީޖާއެއް ގޮތުން ރައްޔިތުންނަށް ދަތިވެ، ކާބޯތަކެތި އިންތިހާއަށް އަގުބޮޑުވެ ރައްޔިތުން ބަނޑަށް ޖެހޭ ހިސާބަށް ކަންކަން ގޮސްފައިވާ ކަމަށެވެ.

މާޒް ސަލީމް ވިދާޅުވީ ރައްޔިތުންގެ އަމިއްލަ ވިޔަފާރިތަކަށް ދަތިކޮށް، ކުންފުނިތަކަށް ފައިސާ ދޫނުކުރާ ކަމަށާއި، ސަރުކާރުގެ ވަޒީފާތަކަށް ބޮޑަށް ބަރޯސާކުރުވާ ކަމަށެވެ.

މީގެ އިތުރުން މާޒް ސަލީމް ވިދާޅުވީ ރައީސް މުއިއްޒު މަސައްކަތް ކުރައްވަނީ ރާއްޖޭގައި ކޮމިއުނިސްޓް ވެރިކަމެއް ހިންގެވުމަށް ކަމަށާއި، ގައުމުން ފެންނަނީ އެ މަންޒަރު ކަމަށެވެ. އަދި އެ ފުރުސަތު ރައްޔިތުން ދީގެންނުވާނެ ކަމަށް އޭނާ ވިދާޅުވިއެވެ.