ޔުމްނުގެ މައްސަލައިގައި ޒިންމާ ވާން ޖެހޭ ފުލުހުން ޖަވާބުދާރީ ވާން ޖެހޭނެ، އެކަންކަން ނުފޮރުވޭނެ: މާޒް ސަލީމް
10 އޮކްޓޯބަރު 2025 | ހުކުރު 08:19ފުލުހުންގެ ޕްރޮފިޝަނަލް ސްޓެންޑާޑް ކޮމާންޑްސްގެ ފަރާތުން ތަހުގީގު ފަށައި ސުވާލު ކުރަންޖެހޭ ފަރާތްތަކާއި ސުވާލުކުރުމުގެ މަސައްކަތް ކުރިއަށްދާ ކަމަށް ހޯމް މިނިސްޓަރު ވިދާޅުވި
ފަލަސުރުހީ ޕްރޮގްރާމްގައި އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް) ވާހަކަދައްކަވަނީ
އޭޕްރިލް 18، ގައި ހ. ފެންޓެނޯއީ ގޭގެ ނުވަ ވަނަ ފަންގިފިލާއިން ހ. މިޓާޒް ގޭގެ ފުރާޅު މައްޗަށް ހައްވާ ޔުމްނު ރަޝީދު ވެއްޓުނު ހާދިސާގައި އިހުމާލުވާ ފުލުހުން ޖަވާބުދާރީ ވާން ޖެހޭނެ ކަމަށާއި އެކަންކަން ނުފޮރުވޭނެ ކަމަށް އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
ރައީސް މުއިއްޒު އުފެއްދެވި ރިޔާސީ ކޮމިޝަނުން ނެރުނު ރިޕޯޓުގައި، ފުލުހުންގެ އިހުމާލުތަކެއް ހުރިކަމަށާއި ޔުމްނު ވެއްޓުނު ހާދިސާގައި ފުލުހުންގެ އިހުމާލު ތަކާމެދު އަދިވެސް ފިޔަވަޅެއް ނާޅާތީ އޭނާ ވަނީ އެކަމަށް ވަރަށް ބޮޑަށް ފާޑު ވިދާޅުވެފައެވެ.
ސަލީމް ވިދާޅުވީ ޔުމްނު ވެއްޓުނު މައްސަލައިގައި ރިޕޯޓް ނެރުނުތާ 3 މަސް ވީއިރު ފުލުހުންގެ ފަރާތުން އެކަމަށް ޖަވާބެއް ވެސް ދީފައި ނުވާ ކަމަށެވެ. އަދި ފުލުހުންގެ ބެލެނިވެރިއަކަށް ހުންނެވި، ހޯމް މިނިސްޓަރ އަލީ އިހުސާން މި މައްސަލަ ތަހުގީގު ކުރަމުންދާ ކަމަށް ބުނުމުން އެކަނި ފުއްދާލެވެން ނެތް ކަމަށް އޭނާ ވަނީ ވިދާޅުވެފައެވެ. ހަމައެހެންމެ މި މައްސަލައިގައި ސިޔާސީ ބައެއްގެ އަތް ހޭކިފައިވާ ކަަމަށް ޤަބޫލުކުރެވޭ ކަމަށް ވެސް ސަލީމް ވިދާޅުވިއެވެ.
"ފުލުހުންނަކީ ވަރަށް އިހުލާސްތެރި ބައެއް. އެއީ އަޅުގަނޑުމެންނަށް ފެނުނީ މިތަނަށް ދިޔަ ފުލުހުންގެ އަތް އަނބުރުވައިގެން ނުފޫޒާއި އެކުގައި އެކަން ކުރުވީ ކަމަށް." އޭނާ ވިދާޅުވިއެވެ.
ހައްވާ ޔުމްނު ރަޝީދު ވެއްޓުނު ހާދިސާގެ ތަހުގީގަށް އުފެއްދެވި ރިޔާސީ ކޮމިޝަނުން ނެރުނު ރިޕޯޓުގައި ހުރި ފިޔަވަޅުތައް އަޅަމުންދޭތޯ ބެލުމަށް ހޯމް މިނިސްޓަރު އަލީ އިހުސާން ގެ ފަރާތުން ޖަވާބެއް ހޯދުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ކުރެއްވި ސުވާލަށް ވަނީ ޖަވާބުދެއްވާފައެވެ. އއެގޮތުން ވަކިވަކި ފުލުހުން އިހުމާލުވެފައިވާ މިންވަރު ދެނެގަތުމަށްޓަކައި ފުލުހުންގެ ޕްރޮފިޝަނަަލް ސްޓެންޑާޑް ކޮމާންޑްސްގެ ފަރާތުން ތަހުގީގު ފަށާ ސުވާލު ކުރަންޖެހޭ ފަރާތްތަކާއި ސުވާލުކުރުމުގެ މަަސައްކަތް ކުރިއަށް ދާކަމަށް ވިދާޅުވެފައިވެއެވެ. އެހެން ނަމަވެސް މިމައްސަލައިގައި މިވީހާތަނަށް އެއްވެސް ފުލުހަކަށް ފިޔަވަޅު އަޅާފައިވާކަން ހާމަކޮށްފައެއް ނުވެ އެވެ.
