"ފްލެޓާއި ގޯތީގެ މައްސަލައިގައި އެމްޑީޕީން ހުށަހެޅި ސިޓީ އަށް ދިނީ ހެއްވާ ޖަވާބެއް"
ނިޔާޒް ވަނީ ސަރުކާރުން ބަހަނާތަކެއް ދައްކައިގެން ގޯއްޗާއި ފްލެޓް ނުދީ ދިގު ދަންމާލުމަށް މަސައްކަތް ކުރަމުންދާ ކަމަށް ސިފަކުރައްވާފަ
ފްލެޓާއި ގޯތި މުޒާހަރާގެ ތެރެއިން
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ދޫކޮށްފައިވާ ފްލެޓާއި، ގޯތިތައް ދޫނުކޮށް ލަސްކުރާ މައްސަލައިގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ހައުސިން މިނިސްޓްރީ އަށް ހުށަހެޅި ސިޓީ އަށް ދިނީ ހެއްވާ ޖަވާބެއް ކަމަށް އެ ޕާޓީން ބުނެފިއެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ދޫކޮށްފައިވާ ފްލެޓާއި، ގޯތިތައް ދޫނުކޮށް ލަސްކުރަމުންދާ މައްސަލައިގައި ހުރި ކަންބޮޑުވުންތަކާއި ގުޅިގެން އެމްޑީޕީން ވަނީ 7 ޖެނުއަރީގައި ހައުސިން މިނިސްޓްރީ އަށް ސިޓީ އެއް ހުށަހަޅާފައެވެ. އެ ސިޓީގައި އެދިފައި ވަނީ ހައުސިން އެންޑް އިންފްރަރސްޓްރަކްޗަރ މިނިސްޓަރ އަބްދުﷲ މުއްތަލިބް އާއި ބައްދަލުކުރުމަށާއި ފްލެޓާއި ގޯތި ދޫކުރުމުގެ މަރުހަލާގެ ތަފްސީލްތައް އެ ޕާޓީ އާއި ހިއްސާކޮށްދިނުމަށް އެދިފައެވެ. އެ ސިޓީގެ ޖަވާބު ދީފައި ވަނީ ނިމިދިޔަ ހަފްތާގެ ތެރޭގައެވެ.
އެ ޖަވާބުގެ ތަފްސީލް ރާއްޖެ އެމްވީ އާއި ހިއްސާކުރައްވަމުން ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒް ވިދާޅުވީ ހައުސިން މިނިސްޓްރީގެ ޖަވާބަކީ ޖަވާބެއްގެ ގޮތުގައި ބަލައިގަންނަންވެސް ދަތި ކަމަށެވެ. އެގޮތުން ހައުސިން މިނިސްޓްރީން ދިން ޖަވާބުގައި ފްލެޓްތަކުގެ ލިސްޓު އަލުން ބަލަމުންދާތީ އެ ކަމާއި ގުޅޭ މައުލޫމާތެއް ދެވެން ނެތް ކަމަށް އަންގާފައިވާ ކަމަށް ނިޔާޒް ވިދާޅުވިއެވެ. ނިޔާޒް ވަނީ ގެދޮރުވެރިޔާ ސްކީމްގެ ދަށުން ނިމިދިޔަ ސަރުކާރުން 4000 ފްލެޓް ދީ ނިންމާފައި ވަނީ ވަރަށް ބޮޑަށް ބަލަން ޖެހޭ ކަންކަން ބެލުމަށް ފަހުގައިކަން ހާމަކުރައްވާފައެވެ. އެގޮތުން ފައިނަލް ލިސްޓް އެކުލަވާލީ އެކި މަރުހަލާތަކުގައި އާއްމުންގެ ޝަކުވާ އަށް ވެސް ހުޅުވާލައިގެން ވަރަށް ފުރިހަމައަށްކަމަށް އޭނާ ވިދަޅުވިއެވެ. އެހެންކަމުން އެކަމާއި މެދު މި ސަރުކާރުން އިތުރަށް ބަލަން ޖެހޭ ކަމެއް ނޯންނާނެ ކަމަށް ނިޔާޒް ވިދާޅުވިއެވެ. ނިޔާޒް ވަނީ އެއީ ސަރުކާރުން ބަހަނާތަކެއް ދައްކައިގެން ގޯއްޗާއި ފްލެޓް ނުދީ ދިގު ދަންމާލުމަށް ކުރަމުންދާ ކަމެއްގެ ގޮތުގައި ސިފަކުރައްވާފައެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ދޫކޮށްފައިވާ ފްލެޓާއި، ގޯތިތައް ކުރިއަށް އޮތް މަސްދުވަހުގެ ތެރޭގައި ދޫކުރަންޖެހޭނެ ކަމަށް އެމްޑީޕީން ވަނީ ބުނެފައެވެ. އަދި ގޯއްޗާއި ފްލެޓް ދޫނުކުރާނަމަ ސީދާ ހަރަކާތަށް ނުކުންނާނެ ކަމަށް އެ ޕާޓީން ވަނީ ބުނެފައެވެ. މީގެ އިތުރުން ވަގު ލިޔުންތަކެއް ބޭނުންކޮށްގެން ހައުސިން ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ އެއްބަޑު އެއްބަފާ ބޭބެއަށް ހުޅުމާލެ-ފޭސް2 އަކުން ގޯއްޗެއް ދޭން މަސައްކަތް ކުރި މައްސަލައިގެ ޒިންމާވެސް ސަރުކާރުން ނަގަން ޖެހޭނެ ކަމަަށް އެ ޕާޓީން ވަނީ ބުނެފައެވެ.
ސަރުކާރުން އެންމެ ފަހުން ބުނެފައި ވަނީ ރޯދައިގެ ކުރިން ފްލެޓް ލިސްޓް އާއްމު ކުރާނެ ކަަމަށެވެ. ނަމަވެސް އެކަން އެގޮތަށް ހިނގާފާނެކަމާއި މެދު އާއްމުން ދަނީ ސުވާލު އުފައްދަމުންނެވެ.
