ޣައްޒާގެ ހޮސްޕިޓަލަކަށް ހަމަލާދީ ކުޑަކުދިން ހިމެނޭގޮތުން އެތައް ބަޔަކު ޝަހީދުކޮށްލިއިރު ދުނިޔެ ހިމޭނުން އޮތުމުން ހަމާސް އިން ވަރަށް ބޮޑަށް ފާޑު ކިޔައިފި

އިޒްރޭލުން ޣައްޒާގެ ހޮސްޕިޓަލަކަށް ހަމަލާދީ ކުޑަކުދިން ހިމެނޭގޮތުން އެތައް ބަޔަކު ޝަހީދުކޮށްލިއިރު ދުނިޔެ ހިމޭނުން އޮތުމުން ފަލަސްތީނު ރައްޔިތުންގެ ދިފާއުގައި ހަނގުރާމަ ކުރާ ހަމާސް އިން ވަރަށް ބޮޑަށް ފާޑު ކިޔައިފިއެވެ.

ޣައްޒާ ސްޓްރިޕްގައި ފަލަސްޠީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ޖަރީމާތައް ކުރިއަށް ގެންދިއުމުގައި ބައިނަލްއަޤްވާމީ މުޖުތަމަޢު އާއި މުއައްސަސާތަކުން ޒިންމާ އުފުލަންޖެހޭ ކަމަށް ހަމާސްއިން ވަނީ ބުނެފައެވެ.

ހުކުރު ދުވަހު ނެރުނު ބަޔާނެއްގައި މި ޖަމާޢަތުން ބުނެފައިވަނީ، މި ޖަރީމާތަކާ ދެކޮޅަށް އަޑުއުފުލާފައި ނުވުމާއެކު އިޒްރޭލުން މިހިންގި ޖަރީމާގެ ޒިންމާ ބައިނަލްއަޤްވާމީ މުޖުތަމަޢުން އުފުލަންޖެހޭ ކަމަށެވެ.

ހަމާސް އިން މި ބަޔާން ނެރުނީ އިޒްރޭލުގެ ބާރުތަކުން ޣައްޒާ ސްޓްރިޕްގެ އުތުރުގައިވާ ޖަބާލިޔާ ސަރަޙައްދުގައި މި ވަގުތު ޚިދުމަތްދޭ ހަމައެކަނި ހޮސްޕިޓަލް ކަމަށްވާ ކަމާލް އަދުވާން ހޮސްޕިޓަލަށް އިޒްރޭލު ސިފައިން ހަމަލާދީ އެ ހޮސްޕިޓަލެއް ވަދެގަތުމާ ގުޅިގެންނެވެ.

މިއީ "ހަނގުރާމައިގެ ޖަރީމާއެއް އަދި ބައިނަލްއަޤްވާމީ ޤާނޫނުތަކާ ފާޅުކަން ބޮޑު ގޮތެއްގައި ޚިލާފުވުމެއް" ކަމަށް ހަމާސްއިން އިތުރަށް ބުނެފައިވެއެވެ.

އިޒްރޭލު ސިފައިން ހޮސްޕިޓަލަށް ވަނުމަށްފަހު އެތަނުގެ ތިބި ބަލިމީހުން ހިމެނޭ ގޮތައް އެންމެން އިމާރާތުގެ ގޯތި ތެރޭގައި އެތުރުމަށްފަހު އޭގެ ތެރޭގައި ހިމެނޭ ޒުވާނުންނާ ސުވާލުކޮށް އެމީހުންގެ ހެދުން ބާލުވާ ހައްޔަރުކޮށްފައިވާ ކަމަށް ފަލަސްޠީނުގެ ނޫސް އޭޖެންސީއެއް ކަމަށްވާ ޤުދުސް ނިއުސް ނެޓްވޯކުން ރިޕޯޓުކޮށްފައިވެއެވެ. އަދި ހައްޔަރުކުރެވުނު މީހުންގެ ހާލު އެނގިފައިނުވާ ކަމަށްވެސް ބުނެފައިވެއެވެ.

އިޒްރޭލު ސިފައިން ހޮސްޕިޓަލަށް ވަދެގަނެ އެތަނުގައި ތިބި ބަލިމީހުންނާއި، ޒަޚަމްވެފައިވާ މީހުންނާއި، މެޑިކަލް މުވައްޒަފުންނާއި، ގެދޮރު ގެއްލިފައިވާ އާއިލާތަކަށް ނިސްބަތްވާ މީހުންނާއި، މީޑިއާގެ އެކްޓިވިސްޓުން ހައްޔަރުކޮށް އަނިޔާކުރުމަށްފަހު ނޭނގޭ ތަނަކަށް އެމީހުން ގެންދިޔަ ކަމަށް ހަމާސްގެ ބަޔާނުގައިވެސް ފާހަގަ ކޮށްފައިވެއެވެ.

އިޒްރޭލުން ހިންގަމުންދާ އަނިޔާވެރި ލާއިންސާނީ ޖަރީމާތައް ކުރިއަށް ގެންދަނީ އެމެރިކާގެ ސަރުކާރުގެ ފުރިހަމަ އެހީތެރިކަމާ، ޙިމާޔަތުގެ ދަށުގައި ތިބެގެން ކަމަށްވެސް ހަމާސް އިން ބުނެފައިވެއެވެ.

ހަމާސްގެ ބަޔާނުގައި އުތުރު ޣައްޒާގައި ހިންގަމުންދާ ނަސްލު ނައްތާލުމުގެ ޖާރީމާ އާއި ގަތުލުއާންމު ތަކާއި، އާންމުންގެ ގެދޮރުގައި ގޮވާތަކެތި ހަރުކޮށް ގޮއްވާލުމާއި، ރަށްވެހިން ގޯތި ގެދޮރުން ނެރެ ބޭރުކުރުން ފުޅާދާއިރާއެއްގައި އިޒްރޭލުން ހިންގަމުންދާ ކަން ފާހަގަ ކޮށްފައިވެއެވެ.

އެ ގްރޫޕުން އިސްލާމީ ޤައުމުތަކަށް، ޚާއްޞަކޮށް އަރަބި ޤައުމުތަކަށް ގޮވާލާފައިވަނީ އެމީހުންގެ ޒިންމާ އަދާކުރުމަށާއި، ހަމައެކަނި ކުށްވެރިކުރާ ބަޔާންތައް ނެރުމުގެ ބަދަލުގައި، ފަލަސްޠީނު ރައްޔިތުންނަށް ކުރަމުންދާ އަނިޔާއާއި އަދި ނަސްލު ނައްތާލުމަށް ހިންގަމުންދާ ޖަރީމާ ހުއްޓުވުމަށް މަސައްކަތް ކުރުމަށެވެ.