އިސްރާއީލްގެ އޮޕަރޭޝަންތައް ޣައްޒާގައި ފުޅާ ކޮށްފައިވާ ކަމަށް، އިސްރާއީލްގެ އަސްކަރިއްޔާ އިން ބުނެފި އެވެ.

ބުދަ ދުވަހު އިސްރާއީލްގެ އަސްކަރިއްޔާ އިން ބުނެފައިވާ ގޮތުގައި، ޣައްޒާގެ މެދު ތެރޭގެ ސަރަހައްދާއި، ދެކުނު ސަރަހައްދުގައި އަސްކަރިއްޔާގެ އޮޕަރޭޝަންތައް އަލުން ފަށާފައިވާ ކަމަށެވެ. 

އެ އޮޕަރޭޝަން ތަކުގެ ތެރޭގައި ވައިގެ މަގުން ދެވުނު ހަމަލާތަކުގައި މަދުވެގެން ފަލަސްތީނުގެ 20 ރައްޔިތަކު ޝަހީދުވެފައިވާ ކަމަށް، އެ ޤައުމުގެ ޞިއްހީ ވުޒާރާ އިން ވަނީ ހާމަކޮށްފަ އވެެ.

އިސްރާއީލްގެ އަސްކަރިއްޔާ ބުނާ ގޮތުގައި، އެ އޮޕަރޭޝަންތަކުގެ ސަބަބުން ޣައްޒާ ދެ ބަޔަކަށް ބައިކުރާ ނެޓްޒަރިމް ކޮރިޑޯ އަށް އިތުރު ބާރު ލިބި، އުތުރާއި ދެކުނު ވަކި ކުރާ ބަފަރ ޒޯނެއް އުފެއްދުމަށް މަގުފަހިވެގެން ދާނެ އެވެ.

އިސްރާއީލްގެ ދިފާއީ ވަޒީރު، އިސްރާއީލް ކާޓްޒް ވަނީ ޣައްޒާގެ ރައްޔިތުންނަށް "އެންމެ ފަހުގެ އިންޒާރު" ދެއްވާފައި އެވެ. އެމެރިކާގެ ރައީސް ޑޮނަލްޑް ޓްރަމްޕްގެ ލަފަ އަށް ތަބާވެ، އިސްރާއީލްގެ ރަހީނުން ދޫކޮށްލައި، ހަމާސް ވެރިކަމުން ދުރު ކުރުމަށް އޭނާ ގޮވާލެއްވި އެވެ.

ހަމަ އެހެންމެ، އދ. ގެ މައި މަރުކަޒަކަށް އިސްރާއީލް އިން ދިން ވައިގެ ހަމަލާއެއްގައި އދ. ގެ މުވައްޒަފެއް މަރުވެ، އިތުރު ފަސް މުވައްޒަފުން ޒަހަމްވި ކަމަށް އދ. އިން ބުނެފައިވެ އެވެ. ނަމަވެސް އިސްރާއީލުން އެކަމާ ދެކޮޅު ހަދައި، އެ ހަމަލާ އަމާޒު ކުރެވުނީ ހަމާސްގެ ތަނަކަށް ކަމަށް ބުނެފައިވެ އެވެ.

މި ހަނގުރާމައިގައި މިހާތަނަށް 49،000 (ސާޅީސް ނުވަ ހާސް) އަށްވުރެ ގިނަ ފަލަސްތީނުގެ ރައްޔިތުން ޝަހީދުވެފައިވާ ކަމަށް ފަލަސްތީނުގެ ސިއްހީ އިދާރާ ތަކުން ބުނެ އެވެ.

މި ހަނގުރާމަ ފެށުނީ 2023 ވަނަ އަހަރުގެ އޮކްޓޯބަރު މަަހުގެ ހަތް ވަނަ ދުވަހު ހަމާސް އިން އިސްރާއީލަށް ދިން ހަމަލާއާ ގުޅިގެންނެވެ. އެ ހަމަލާގައި އިސްރާއީލްގެ 1،200 އަށްވުރެ ގިނަ މީހުން މަރުވެ، 250 އަށްވުރެ ގިނަ މީހުން ރަހީނު ކުރެވުނެވެ.