ޣައްޒާގެ ސްކޫލަކަށް އިޒްރޭލުން ހަމަލާދީ، ކުޑަކުދިން ހިމެނޭ ގޮތަށް މަދުވެގެން 17 މީހުން ޝަހީދު ކޮށްލައިފި
7 އޮކްޓޯބަރ 2023 އިން ފެށިގެން އިޒްރޭލުން ޣައްޒާ އަށް ދެމުންދާ ހަމަލާތަކުގައި މަދުވެގެން 42،847 މީހުން މަރުވެ، 100،544 މީހުން ޒަޚަމްވެއްޖެ
އޮކްޓޯބަރު 24، 2024 ގައި ޣައްޒާގެ ސްކޫލަކަށް އިޒްރޭލުން ދިން ހަމަލާއަށް ފަހު އާންމުން އިމާރާތުގެ ތެރޭގައި ހަރަކާތްތެރިވަނީ
ޣައްޒާގެ ނުސެއިރާތު ކޭމްޕުގައި ހުރި، ސްކޫލަކަށް އިޒްރޭލުން ބުރާސްފަތި ދުވަހު ދިން ހަމަލާއެއްގައި 11 މަސް ވީ ކުއްޖަކު ހިމެނޭ ގޮތަށް މަދުވެގެން 17 ފަލަސްތީނު މީހުން މަރުވެ، 32 މީހުން ޒަޚަމްވެއްޖެއެވެ.
ހަމަލާ ދިން އިރު އެ ސަރަހައްދުގައި ހުރި ފަލަސްތީނުގެ މީހެއް ކަމަށްވާ އުއްމު މުޙައްމަދު އަލްޖަޒީރާ އާ ވާހަކަ ދައްކަމުން ބުނި ގޮތުގައި އިޒްރޭލުން ބޮން އެޅުމާއެކު އިމާރާތުގެ ބައިތައް ކުދިކުދިވެ "ގާތަކާއި ބިއްލޫރި" ތައް މަތިން ފައިބަމުން ދިޔަ ކަމަށެވެ.
"އަހަރެން އަހަރެންގެ ކުޑަ އަންހެން ދަރިފުޅު ގައިގައި ބައްދައިގަތީ. ބޯ ދުމުގެ ތެރެއިން އެއްޗެއް ނުފެނުނު. ކުޑަކުދިންތައް ފެނުނީ ކުދިކުދިވެފައި ވަނިކޮށް." އުއްމު އަށް ފެނުނު މަންޒަރު ކިޔައިދެމުން ބުންޏެވެ.
ޣައްޒާގެ ސަރުކާރުގެ މީޑިއާ އޮފީހުން ބުނެފައިވަނީ، ޖަބާލިޔާއަށް އިޒްރޭލުގެ ސިފައިން ދެމުންދާ ހަމަލާތަކާއި އުތުރު ޣައްޒާގެ މައްޗަށް އަޅާފައިވާ ހިޞާރަށް 20 ދުވަސް ހަމަވެފައިވާއިރު، 770 އަށްވުރެ ގިނަ ފަލަސްތީނު މީހުން މަރުވެ، 1،000 މީހުން ޒަޚަމްވެފައިވާ ކަމަށެވެ.
ޣައްޒާގައި، 7 އޮކްޓޯބަރ 2023 އިން ފެށިގެން އިޒްރޭލުން ދެމުންދާ ހަމަލާތަކުގައި މަދުވެގެން 42،847 މީހުން މަރުވެ، 100،544 މީހުން ޒަޚަމްވެފައިވެއެވެ.
