ޣައްޒާއަށް އިންސާނީ އެހީ ފޯރުކޮށްދިނުމަށް އިޒްރޭލުން ހުއްޓުމެއް ނެތި ހުރަސް އަޅަމުން ގެންދިއުމުގެ ސަބަބުން އެ ސަރަޙައްދުގައި ކާބޯތަކެތީގެ ދަތިކަން ކުރިމަތިވެ، އަތްނުފޯރާ ފަށަށް އަގުތައް މައްޗަށް ހިނގައްޖެއެވެ.

ޣައްޒާ ގައި ދިރިއުޅޭ މީހުން ބުނާ ގޮތުގައި ކުރިން 1 ޑޮލަރަށް ލިބެމުންދިޔަ 1 ކިލޯގެ ހަކުރު މިހާރު ވިއްކަމުންދަނީ 40 ޑޮލަރަށެވެ. އަދި ކައްކާ ތެޔޮ، ނާރިނގު އަދި ބަށި ފަދަ ތަކެތީގެ އަގުވެސް ވަނީ ބޮޑުތަނުން މައްޗަށް ގޮސްފައެވެ.

ތަކެތީގެ އަގު އިންތިހާ އަށް މައްޗަށް ދާއިރު، އިޒްރޭލުން ޣައްޒާ އަށް ހުއްޓުމެއްނެތި ދެމުންދާ ހަމަލާތަކުގެ ސަބަބުން، އިގްތިސާދީ މަސައްކަތްތައް ހުއްޓި މީހުންނަށް އާމްދަނީ ލިބޭނެ ދޮރުތައް ވަނީ ބަންދުވެފައެވެ.

އދ. އިން ބުނާ ގޮތުގައި ޣައްޒާގެ ކޮންމެ ފަސް މީހަކުން އެކަކު ބަނޑުހައިހޫނުކަމުގައި އުޅެމުންދާއިރު، މުޅި ސަރަޙައްދުގައި އާންމު ބަނޑުހައިހޫނުކަމެއް ކުރިމަތިވުމުގެ ނުރައްކާ ވަރަށް ބޮޑެވެ.

ޣައްޒާއަށް އިންސާނީ އެހީ ފޯރުކޮށްދިނުން އިތުރުކުރުމަށް އިޒްރޭލަށް ގޮވާލަމުން ދިޔަ ނަމަވެސް އިޒްރޭލުން އެކަމަށް ދީފައިވަނީ ބީރު ކަންފަތެކެވެ.

ޣައްޒާއަށް އެހީ ފޯރުކޮށްދިނުމަށް ހުރި މަގުތައް ވަނުމަށް ހުންނަ މަގުތަކަށް ހުރަސް އަޅައިގެން ތިބި އިޒްރޭލު ސިފައިންގެ ރެކޯޑް ތަކުން ފެންނަ ގޮތުގައި އޮކްޓޯބަރު މަހުގެ ފުރަތަމަ 12 ދުވަހު ޣައްޒާއަށް ވަދެފައިވަނީ އެންމެ 5،840 ޓަނުގެ ކާބޯތަކެތި އެކަންޏެވެ. މިއީ ސެޕްޓެމްބަރު މަހު ވަދެފައިވާ 75،898 ޓަނާ އަޅާބަލާއިރު ވަރަށް ކުޑަ އަދަދެކެވެ.