އިޒްރޭލުގެ ބޮޑުވަޒީރު ނަތަންޔާހޫގެ ގެކޮޅަށް ޑްރޯން ހަމަލާއެއް ދީފި: ނަތަންޔާހޫގެ ތަރުޖަމާނު

އިޒްރޭލުގެ އުތުރުގައި އޮންނަ ސެސަރިޔާގައި ހުންނަ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ޗުއްޓީ ހޭދަކުރައްވާ ގެކޮޅަށް ޑްރޯން ހަމަލާއެއް އަމާޒުވެއްޖެ ކަމަށް ނަތަންޔާހޫގެ ތަރުޖަމާނު ވިދާޅުވެއްޖެއެވެ.

ނަތަންޔާހޫގެ ތަރުޖަމާނު ވިދާޅުވީ، ހޮނިހިރު ދުވަހު ލުބުނާނުން ދޫކޮށްލި ތިން ޑްރޯނުގެ ތެރެއިން އެއް ޑްރޯން ސެސަރިޔާގައި ހުންނަ ބޮޑުވަޒީރު ނަތަންޔާހޫގެ ގެކޮޅަށް އަމާޒުވެފައިވާ ކަމަށާއި، ނަމަވެސް، އެ ވަގުތު ގެކޮޅުގައި ބޮޑުވަޒީރުގެ އިތުރުން އާއިލާގެ އެއްވެސް ބޭފުޅަކު ނުހުންނަވާ ކަމަށެވެ. އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށް ވެސް ތަރުޖަމާނު ވިދާޅުވިއެވެ.

ހަމަލާއާ ގުޅިގެން ނަތަންޔާހޫގެ ގެކޮޅު ހުންނަ ސަރަހައްދުގައި ސެކިއުރިޓީ ވަރުގަދަކޮށް އިޒްރޭލުގެ ފުލުހުންނާއި އަސްކަރިއްޔާއިން ހަރަކާތްތެރިވަމުން އަންނަ ކަމަށް ރިޕޯޓުތައް ބުނެއެވެ.

ހަމަލާއާ ގުޅިގެން އިޒްރޭލުގެ އަސްކަރިއްޔާ އިން ބުނެފައިވަނީ އިތުރު ދެ ޑްރޯން ހަމަލާއެއްވެސް ހުއްޓުވާފައިވާ ކަމަށާއި، ލުބުނާނުން އިޒްރޭލުގެ އުތުރު ސަރަޙައްދުތަކަށް އަމާޒުކޮށް 100ށް ވުރެ ގިނަ ރޮކޮޓު ހަމަލާތައް ދީފައިވާ ކަމަށާއި، މި ހަމަލާތަކުގައި މަދުވެގެން 13 މީހުން ޒަޚަމްވެފައިވާ ކަމަށެވެ.

މި ހަމަލާއާ ގުޅިގެން ހިޒްބުﷲ އިން ވެސް އަދި އެހެން އަސްކަރީ ޖަމާއަތަކުންވެސް ވަކި އެއްޗެއް ބުނެފައެއް ނުވެއެވެ.

އިޒްރޭލުގެ އޮފިޝަލުންނާއި އިދާރާތަކުން މި ހަމަލާ ދެކެނީ ބޮޑުވަޒީރު ނަތަންޔާހޫގެ ފުރާނައަށް އަމާޒުކޮށްގެން ދެވުނު ހަމަލާއެއްގެ ގޮތުގައި ކަމަށް އަލް ޖަޒީރާ އިން ރިޕޯޓްކޮށްފައިވެއެވެ.

އަލް ޖަޒީރާގެ ނޫސްވެރިޔާ ނޫރު ޢޯދާ ވިދާޅުވި ގޮތުގައި، ލުބުނާނުގެ ސަރަޙައްދީ ބޯޑަރުން 70 ކިލޯމީޓަރު ދުރުގައި ހުރި ތަނަކަށް އަމާޒުކޮށް ޑްރޯން އެއް ފޮނުވާ، އިތުރު އެއްވެސް އިންޒާރެއް ނުލިބި، އަމާޒުކުރެވުނު ތަނަށް ހަމަލާ ދެވުމުން އިޒްރޭލުގެ ސަލާމަތީ ބާރުތަކުގެ މެދުގައި ބޮޑު ކަންބޮޑުވުމެއް އުފެދިފައިވާ ކަމަށެވެ. އޭނާ އިތުރަށް ވިދާޅުވި ގޮތުގައި، ބޮޑުވަޒީރު ނަތަންޔާހޫގެ ގެކޮޅަށް ހަމަލާ ދިނުމަށްޓަކައި، ގިނަ އަދަދެއްގެ ރޮކެޓު ލުބުނާނުން ފޮނުވާފައިވާ ކަމަށާއި، މިއީ އިޒްރޭލު އަސްކަރިއްޔާގެ ސަމާލުކަން އެހެން ތަނަކަށް އަނބުރާލުމަށްޓަކާ ކުރިމަކެވެ. އަދި މި ހަމަލާތަކާ ގުޅިގެން، ގަލީލީ އަދި ހައިފާ ފަދަ ބޮޑެތި ސަރަހައްދުތައް ވެސް ހިމެނޭ ގޮތަށް އިޒްރޭލުގެ އުތުރު ސަރަޙައްދުގެ އެކި ހިސާބުތަކުގައި، ސަލާމަތީ ސައިރަންތައް އަޅަމުންދާ ކަމަށް އޭނާ ފާހަގަކުރައްވާފައިވެއެވެ.

ނަތަންޔާހޫގެ ގެކޮޅަށް މި ހަމަލާ އަމާޒުވެފައި މިވަނީ ބުރާސްފަތި ދުވަހު އިޒްރޭލުން ހަމާސްގެ ލީޑަރު ޔަހްޔާ ސިންވާރު މަރާލާފައިވަނިކޮށެވެ. އަދި އިޒްރޭލުން ލުބުނާނުގެ އެތަންމިތަނަށް ބޮން އަޅާ، މެދުއިރުމަތީގެ މަސްރަހު ވަރަށް ބޮޑަށް ގޯސްވެފައި ވަނިކޮށެވެ.

ލުބުނާނުގެ ޞިއްޙީ ވުޒާރާއިން ބުނާގޮތުގައި އިޒްރޭލުން ލުބުނާނަށް ހަމަލާދޭން ފެށިފަހުން ގާތްގަނޑަކަށް 2,350ށް ވުރެ ގިނަ މީހުން ވަނީ މަރުވެފައެވެ. ހަމައެއާއެކު، ސެޕްޓެމްބަރު މަހުގެ މެދުތެރެއިން ފެށިގެން މުޅި ޤައުމުގައި މަދުވެގެން 1,740 މީހުން މަރުވެފައިވާ ކަމަށާއި، ލުބުނާނުގެ ދެކުނާއި އިރުމަތީ ސަރަޙައްދުތަކުގައި އެއް މިލިއަނަށްވުރެ ގިނަ މީހުން އެމީހުންގެ ގެދޮރު ދޫކޮށް ފިލަން މަޖުބޫރުވެފައިވާ ކަމަށްވެސް ބުނެފައިވެއެވެ.