ކުރީގެ މަޝްހޫރު ބޯއި ބޭންޑް ވަން ޑިރެކްޝަންގެ ލަވަކިޔުންތެރިޔާ ލިޔަމް ޕޭން އާޖެންޓީނާގެ ވެރިރަށް ބުއެނޯސް އައިރެސްގައި މަރުވެއްޖެ ކަމަށް މީޑިއާ ރިޕޯތުތައް ބުނެފިއެވެ.

ބުދަ ދުވަހު މީޑިއާ ރިޕޯޓުތައް ބުނެފައިވަނީ 31 އަހަރުގެ ބްރިޓިޝް މިއުޒިޝަން ލިޔަމް އޭނާ ހުރި ހޮޓަލުގެ ތިންވަނަ ފަންގިފިލާއިން ވެއްޓި މަރުވެފައިވާ ކަމަށެވެ.

އާޖެންޓީނާގެ ނަން މަޝްހޫރު ނޫސްތަކުގެ ތެރެއިން ލަ ނަސިއޯން އަދި ކްލަރިން އިން ރިޕޯޓުކޮށްފައިވާ ގޮތުގައި، މި ހާދިސާ ހިނގާފައިވަނީ އާޖެންޓީނާގެ ވެރިރަށް ބުއެނޯސް އައިރެސްގެ ޕަލެރްމޯ ސަރަޙައްދުގައި ހުރި ހޮޓަލެލެއް ކަމުގައިވާ 'ކަސަސުރް'ގައެވެ.

އިސް އޮފިޝަލުންނާ ހަވާލާދީ މި ނޫސްތަކުން ބުނެފައިވަނީ، ފުލުހުން އެ ހޮޓަލަށް ގޮސްފައިވަނީ "މަސްތުވާތަކެއްޗާއި ބަނގުރާ ބޮއެގެން މީހަކު" ހުރި ކަމަށް ބުނެ ހުށަހެޅުނު މައްސަލައަކާއި ގުޅިގެންނެވެ. އެއަށްފަހު ސިއްހީ ޚިދުމަތްތެރިން އޭނާގެ މަރު ކަށަވަރުކޮށްދީފައިވާ ކަމަށްވެސް މީޑިއާ ރިޕޯޓުތައް ބުނެއެވެ.

ދާދިފަހުން ލިޔަމް ވަނީ މީޑިއާގައި އޭނާގެ އެޑިކްޝަން އާ ބެހޭގޮތުން ވާހަކަދައްކާ ރިހެބިލިޓޭޝަން ފެސިލިޓީއެއްގައި ވަގުތު ހޭދަކޮށްފައިވާކަން ހާމަކޮށްފައެވެ.

ލިޔަމް ޕޭން އަކީ ކުރީގެ މަޝްހޫރު ބޯއީ ބޭންޑް ވަން ޑިރެކްޝަންގެ މެންބަރެކެވެ. މި ބޭންޑަކީ އޭރު ދުނިޔޭގެ އެންމެ މަޤުބޫލު ބޭންޑުތަކުގެ ތެރެއިން އެއް ބޭންޑެވެ.

މި ބޭންޑު އުފެދުނީ 2010 ވަނަ އަހަރު ބްރިޓިޝް އެކްސް ފެކްޓަރ މިއުޒިކް މުބާރާތުގައި ތިންވަނަ ހޯދުމަށްފަހުއެވެ. ނަމަވެސް 2016 ވަނަ އަހަރު ބޭންޑުގެ މެންބަރުން އެކި މަސައްކަތްތަކަށް އަމާޒު ހިފުމާއެކު ބޭންޑު ރޫޅާލިއެވެ. ލިޔަމްގެ އިތުރުން ވަން ޑިރެކްޝަންގައި އުޅުނު މަޝްހޫރު ލަވަކިޔުންތެރިންގެ ތެރޭގައި ހެރީ ސްޓައިލްސް، ޒެއިން މަލިކް، ނައިލް ހޯރަން އަދި ލުއީ ޓޮމްލިންސަން ހިމެނެއެވެ.

ލިޔަމްގެ މަރާ ގުޅިގެން ދުނިޔޭގެ އެކި ކަންކޮޅުތަކުގައި ތިބި އޭނާގެ ފޭނުން އަންނަނީ ހިތާމަ ފާޅުކުރަމުންނެވެ.

އޭނާގެ މަރުގެ ތަހުގީގު ފުލުހުން ކުރަމުން އަންނަ ކަމަށް ރިޕޯޓުތައް ބުނެއެވެ.