މިދިއަ ހަފްތާގައި ވައިޓް ހައުސްގެ ގޯތިތެރެއަށް ވަދެގެން އުޅުނު މީހާއާ ބެހޭ އިތުރު ތަފްސީލް ސީކްރެޓް ސާވިސްއިން ހާމަކޮށްފިއެވެ.

އޭނާ ފެނިފައި ވަނީ މައި އިމާރާތަށް ވަދެވަދެ ހުއްޓައި ކަމަށް ސީކްރެޓް ސާވިސްއިން ވަނީ ބުނެފައެވެ.

އުމުރުން 26 އަހަރުގެ ޖޮނަތަން ޓްރާން ހައްޔަރު ކުރުމުގެ ކުރިން ވައިޓްހައުސްގެ ގޯތިތެރޭގައި އޭނާ 16 މިނިޓް ހޭދަކޮށްފައި ވެއެވެ.

އޭނާއަށް އެންމެ ދިގު މުއްދަތުގެ ހުކުމަކަށް އަންނާނީ 10 އަހަރުގެ ޖަލު ހުކުމެކެވެ.

ރައީސް ޓްރަމްޕް ވެސް ވައިޓް ހައުސްގައި އުޅުއްވަނިކޮށް ޓްރާން ވަދެފައިވާއިރު، އޭނާ އެކަން ކުރީ އެއްވެސް ފަރާތެއްގެ ހުއްދަ ނެތިއެވެ.

ކޯޓުގެ ލިޔެކިއުންތަކުން އެނގޭ ގޮތުގައި ވައިޓްހައުސްއަށް ވަނީ ޓްރަމްޕްގެ ދައުވަތަކަށް ކަމަށް އޭނާ ބުނެފައި ވެއެވެ. އަދި އޭނާއަކީ ޓްރަމްޕްގެ ރައްޓެއްސެއް ކަމަށް ކޯޓުގައި އޭނާ ބުނެފައި ވެއެވެ.

ރައީސް ޓްރަމްޕްވަނީ ސީކްރެޓް ސާވިސްއިން އޭނާ ހުއްޓުވުމަށް އަދާކޮށްފައިވާ ދައުރު ފާހަގަކޮށް ތައުރީފް ކޮށްފައެވެ.

ވައިޓް ހައުސްއަށް ވަނުމަށް ޓްރާން އެންމެ ފުރަތަމަ ފުންމާލާފައި ވަނީ ވައިޓްހައުސްއާ އިންވެގެން ހުންނަ ޓްރެޝަރީ ޑިޕާޓްމަންޓްގެ ކައިރީ ހުންނަ ފަސް ފޫޓުގެ ފާރު މަތިންނެވެ. އޭގެ ފަހުން 8 ފޫޓް އުސް، ވެހިކަލް ވައްދާ ގޭޓާއި އޭގެ ފަހުން އިރުމަތީ ފަރާތުން ތިރި ފެންސް މަތިން ވަނީ ފުންމާލާފައެވެ.

އެތަނުގައި ގިނަ ސެންސެރތަކެއް ހަރުކުރެވިފައި ހުރި ނަމަވެސް އޭނާ ވަނީ އެތަކެއްޗައް ނާރާ އެތެރެވެފައެވެ.