އިޒްރޭލު ސިފައިން ޣައްޒާގެ ސްކޫލަކަށް ހަމަލާދީ 22 މަރު
14 އޮކްޓޯބަރު 2024 | ހޯމަ 01:05ހުސްވި އަހަރުގެ އޮކްޓޯބަރު މަހުން ފެށިގެން ދެމުންދާ އިޒްރޭލުގެ ހަމަލާތަކުގައި ޣައްޒާގައި މަދުވެގެން 42،227 މީހުން މަރުވެ، 98،464 މީހުން ޒަޚަމްވެފައިވޭ
އަލް އަގްސާ މާޓިއާރސް ހޮސްޕިޓަލުގެ ގޯތިތެރޭގައި ޖަހާފައިވާ ޓެންޓުތަކަށް އޮކްޓޯބަރ 14، 2024 ގައި އިޒްރޭލުން ބޮން އެޅުމުން ސަރަހައްދުގައި ރޯވެފައި
ޣައްޒާގެ މެދުތެރޭގައި އޮންނަ ނުސެއިރާތުގައި ހުރި، ގެދޮރު ގެއްލިފައިވާ ފަލަސްޠީނު މީހުންނަށް ބޯހިޔާވަހިކަން ދިނުމަށް ބޭނުންކުރާ ސްކޫލަކަށް އިޒްރޭލު ޓޭންކުތަކުން ހަމަލާދިނުމުން 22 މީހުން މަރުވެ، މަދުވެގެން 80 މީހުން ޒަޚަމްވެއްޖެއެވެ.
އޭގެ އިތުރުން ހޯމަ ވިލޭރޭ ޣައްޒާގެ ދީރުލް-ބަލާހުގައި ހުރި އަލް-އަޤްސާ ޝަހީދުންގެ ހޮސްޕިޓަލުގެ ގޯތިތެރޭގައި ފަލަސްޠީނުގެ ރެފިއުޖީންނަށް ޖަހާފައިވާ ޓެންޓުތަކަށް އިޒްރޭލުގެ ހަނގުރާމަ ޖެޓު މަތިންދާބޯޓުތަކުން ބޮން އަޅައިފިކަމަށް ވަފާ ނިއުސް އެޖެންސީން ރިޕޯޓުކޮށްފިއެވެ.
ހާދިސާ ހިނގި ސަރަޙައްދުގައި ތިބި ސިއްހީ މަސްދަރުތަކުން ބުނެފައިވަނީ ޓެންޓުތަކުގައި އަލިފާން ރޯވެފައިވާ ކަމަށެވެ.
ވަފާގެ ރިޕޯޓުގައިވާ ގޮތުން ހޮސްޕިޓަލުގެ ރިސެޕްޝަން އޭރިއާ ވަނީ ޒަޚަމްވެފައިވާ މީހުންނާއި މަރުވެފައިވާ މީހުންގެ ހަށިގަނޑުތަކުން ފުރިފައިވެއެވެ.
އުތުރު ޣައްޒާގެ ސަރަހައްދުތަކަށް އިޒްރޭލު ސިފައިން ދެމުންދާ ހަމަލާތަކަށް 9 ވަނަ ދުވަހަށް ދެމިގެން ގޮސްފައިވާއިރު، ކާނާއާއި ފެން ހުސްވަމުންދާ ކަމަށް ރިޕޯޓްތައް ބުނެއެވެ.
އިޒްރޭލުން އެއްގަމު މަގުންނާއި ވައިގެ މަގުން ދެމުންދާ ހަމަލާތަކުގެ ސަބަބުން އެތައް ހާސް ބަޔަކު ޣައްޒާގެ އުތުރު ސަރަހައްދުގައި ބަންދުވެފައި ތިބިއިރު، އިޒްރޭލު ސިފައިންގެ ހަމަލާތަކުގައި މަދުވެގެން 300 މީހުން މިހާތަނަށް ވަނީ އެ ސަރަހައްދުން މަރުވެފައެވެ.
2023 ވަނަ އަހަރުގެ އޮކްޓޯބަރު މަހުން ފެށިގެން ދެމުންދާ އިޒްރޭލުގެ ހަމަލާތަކުގައި ޣައްޒާގައި މަދުވެގެން 42،227 މީހުން މަރުވެ، 98،464 މީހުން ޒަޚަމްވެފައިވެއެވެ.
