ނެދަލެންޑްސް ސަލާމަތްކޮށްދިނީ ޑަމްފްރީސް

ޔުއެފާ ނޭޝަންސް ލީގު އޭގެ ގުރޫޕު ތިނެއްގައި ހަންގޭރީއާ ދެކޮޅަށް ކުޅުނު މެޗުން ނެދަލެންޑްސް އެއްވަރުވެއްޖެ އެވެ.

މި ދެ ޓީމު ބައްދަލު ކުރި މެޗު އެއްވަރުވެފައި ވަނީ 1-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ހަންގޭރީ އިންނެވެ. ނަމަވެސް ނެދަލެންޑްސް އިން ވަނީ މެޗުގެ ފަހު ވަގުތުގައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ 32 ވަނަ މިނެޓުގައި ހަންގޭރީ އަށް ލީޑު ނަގައިދިނީ ރޮލާންޑް ސަލާއީ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ސޮލްޓް ނަގީ އެވެ. މެޗުގައި ނެދަލެންޑްސް އަށް އެންމެ ބޮޑު ގެއްލުމެއް ދެއްކީ 79 ވަނަ މިނެޓުގައި ދެ ވަނަ ރީނދޫ ކާޑާއެކު އެ ޓީމުގެ ޑިފެންޑަރު ވާޖިލް ވެން ޑައިކް އަށް ރަތް ކާޑު ދައްކައި ދަނޑުން ފޮނުވާލުމުންނެވެ. އެއް ކުޅުންތެރިޔަކު މަދުން ކުޅުނު ނެދަލެންޑްސް އިން ވަނީ މެޗުގެ 83 ވަނަ މިނެޓުގައި ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ޑެންޒެލް ޑަމްފްރީސް އެވެ.

ނަތީޖާއާ އެކު ނެދަލެންޑްސް ދެ ވަނައިގައި އޮތީ މިހާތަނަށް ކުޅުނު ތިން މެޗުން ފަސް ޕޮއިންޓާ އެކު އެވެ. އެ ޓީމު އެއް މެޗުން މޮޅުވެފައިވާއިރު، އަނެއް ދެ މެޗުން ވަނީ އެއްވަރުވެފަ އެވެ. ލީގުގައި ނެދަލެންޑްސް އިން ދެން ނިކުންނާނީ ޖަރުމަނާ ދެކޮޅަށެވެ.