ސިޓީ އާއި ޕީއެސްޖީ އަށް ބަދަލުވާން ފުރުސަތު ލިބުނު: ބޮނޫޗީ

މެންޗެސްޓަރ ސިޓީ އާއި ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވާން ފުރުސަތު ލިބުނު ކަމަށް، އިޓަލީގެ ލެޖެންޑް ލިއޮނާޑޯ ބޮނޫޗީ ބުނެފި އެވެ.

އޭނާ މިހެން ބުނީ ސްކައި ނޫހާ ވާހަކަ ދައްކަމުންނެވެ. އެގޮތުން ބޮނޫޗީ ބުނީ ޔުވެންޓަސް ދޫކޮށްލަން 2017 ވަނަ އަހަރު އޭނާ ނިންމުމާއެކު، ސިޓީ އާއި ޕީއެސްޖީން ހުށަހެޅުން ލިބުނު ކަމަށެވެ. އެގޮތުން އެ ދެ ކުލަބުން ވަނީ ފައިނޭންޝިއަލް ޕްރޮޕޯސަލް ވެސް އޭރު ފޮނުވާފައި ކަމަށް އޭނާ ބުންޏެވެ. އެހެން ނަމަވެސް އޭނާ ބޭނުންވީ އިޓަލީގައި މަޑު ކުރަން ކަމަށާއި، އެހެންވެ އޭސީ މިލާނަށް ބަދަލުވާން ނިންމީ ކަމަށް ވެސް ބޮނޫޗީ ބުންޏެވެ.

މީގެ އިތުރުން ބޮނޫޗީ ބުނީ އޭނާ ގެންދިޔުމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ވަރަށް ބޮޑަށް މަސައްކަތް ކުރި ކަމަށެވެ. ޚާއްސަކޮށް 2016 ވަނަ އަހަރުގެ ތެރޭގައި އެ މަސައްކަތް ގާޑިއޯލާ ކުރި ކަމަށާއި، އެހެން ނަމަވެސް އެކަމާ ބޮނޫޗީ ދެކޮޅު ހެދީ ކަމުގައި ވެސް އޭނާ ވަނީ ބުނެފަ އެވެ،

2017 ވަނަ އަހަރު ޔުވެންޓަސް ދޫކޮށްލުމަށްފަހު ބޮނޫޗީ ބަދަލުވީ އޭސީ މިލާނަށެވެ. އެ ކުލަބުގައި އެއް އަހަރު ހުރުމަށްފަހު، 2018 ވަނަ އަހަރު އަނެއްކާ ވެސް ބޮނޫޗީ ވަނީ ޔުވެންޓަސް އަށް ބަދަލުވެފަ އެވެ. އޭގެ ފަހުން 2023 ވަނަ އަހަރު އޭނާ ވަނީ ޔުވެންޓަސް ދޫކޮށްލުމަށްފަހު ޔޫނިއަން ބާލިން އަށް ބަދަލުވެފަ އެވެ. އަދި މިއަހަރުގެ ޖަނަވަރީ މަހުގެ ތެރޭގައި ވަނީ ފެނާބަޗޭ އަށް ބަދަލުވެފަ އެވެ. އެ ކުލަބުގައި ހުރުމަށްފަހު މިއަހަރުގެ މެއި މަހުގެ ތެރޭގައި ބޮނޫޗީ ވަނީ ޕްރޮފެޝަނަލް ފުޓުބޯޅަ އިން ރިޓަޔާވާން ނިންމައިފަ އެވެ.

އުމުރުން މިހާރު 37 އަހަރުވެފައިވާ ބޮނޫޗީ ވަނީ ގިނަ އަހަރުތަކެއް ވަންދެން އިޓަލީ ޤައުމީ ޓީމަށް ވެސް ކުޅެފަ އެވެ. ޤައުމީ ޓީމާ އެކު ހޭދަކޮށްފައިވާ 14 އަހަރުގެ ތެރޭގައި ބޮނޫޗީ ވަނީ ޤައުމީ ޓީމަށް ކުޅެދިން 121 މެޗުގައި އަށް ލަނޑު ޖަހައިފަ އެވެ. އިޓަލީ އާއެކު އޭނާ ވަނީ 2020 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބު ކޮށްފަ އެވެ.