ޣައްޒާ ހަނގުރާމަ އަށް އެއް އަހަރު: ޣައްޒާގެ 814 މިސްކިތައް އިޒްރޭލުން ބޮން އަޅައިފި
އިޒްރޭލުގެ ސިފައިން ވަނީ ޣައްޒާގެ 19 ގަބުރުސްތާނަށް ގެއްލުންދީ ހަލާކުކޮށް، މަރުވެފައިވާ މީހުންގެ ހަށިތައް ވަޅުން ނަގައި، އެ ގަބުރުތަކަށް ލާއިންސާނީ ޢަމަލުތައް ހިންގާފައިވޭ
ޣައްޒާގެ އަލް އަގްސާ މާޓިއާރޒް މިސްކިތައް އިޒްރޭލުން ބޮން އަޅާ ފުނޑުފުނޑު ކޮށްލާފައި
ޣައްޒާއަށް ހުސްވި އަހަރުގެ އޮކްޓޯބަރު މަހުގެ 7 ވަނަ ދުވަހު އިޒްރޭލު ސިފައިން އަރާ ފެށި ހަނގުރާމައަށް އެއް އަހަރު ފުރުނު އިރު ޣައްޒާގެ 814 މިސްކިތައް އިޒްރޭލު ސިފައިން ބޮން އަޅައިފިއެވެ.
ޣައްޒާ ސްޓްރިޕްގެ އެންޑޯވްމަންޓްސް އަދި ދީނީ ކަންތައްތަކާބެހޭ މިނިސްޓްރީން މިދިޔަ ހަފްތާގެ ހޮނިހިރު ދުވަހު ނެރުނު ބަޔާނެއްގައި ބުނެފައިވަނީ އިޒްރޭލުން ބޮންއަޅާ 814 މިސްކިތް ފުނޑުކޮށްލާފައިވާ ކަމަށާއި، އަދި އިތުރު 148 މިސްކިތަށް ބޮޑެތި ގެއްލުންތައް ދީފައިވާ ކަމަށެވެ.
މީގެ އިތުރުން، އިޒްރޭލުގެ ސިފައިން ވަނީ ޣައްޒާގެ 19 ގަބުރުސްތާނަށް ގެއްލުންދީ ހަލާކުކޮށްލާފައިވާ ކަމަށް ދީނީ ކަންތައްތަކާ ބެހޭ މިނިސްޓްރީން ބުނެފައިވެއެވެ.
މިނިސްޓްރީން އިތުރަށް ބުނެފައިވަނީ އިޒްރޭލުގެ ސިފައިން ގަބުރުސްތާނުތަކަށް ވަދެ ގަބުރުތަކުގެ ހުރުމަތް ކަނޑާ، މަރުވެފައިވާ މީހުންގެ ހަށިތައް ވަޅުން ނަގައި، އެ ގަބުރުތަކަށް ލާއިންސާނީ ޢަމަލުތައް ހިންގާފައިވާ ކަމަށެވެ. މީގެ ތެރޭގައި މަރުވެފައިވާ މީހުންގެ ހަށިތަކުގެ ބައިތައް ވަގަށް ނެގުމާއި އެ ހަށިތަކަށް ގެއްލުން ދިނުން ހިމެނެއެވެ.
ޣައްޒާގެ ދީނީ ކަންތައްތަކާ ބެހޭ މިނިސްޓްރީން އިތުރަށް ބުނެފައިވަނީ އެ މިނިސްޓްރީގެ ދަށުގައިވާ 11 އިދާރީ އަދި ތަޢުލީމީ މަރުކަޒު ހަލާކުކޮށްލާފައިވާ ކަމަށެވެ. މިއީ ޣައްޒާގައި ހުރި މިފަދަ މަރުކަޒުތަކުގެ 79 އިންސައްތައެވެ. އަދި އެ ވުޒާރާގެ އެސެޓަށް އިޒްރޭލުން ދިން ގެއްލުމުގެ އަގު ގާތްގަނޑަކަށް 350 މިލިއަން ޑޮލަރަށް އަރާ ކަމަށް ވެސް ބުނެފައިވެއެވެ.
މިނިސްޓްރީން އިތުރަށް ބުނެފައިވަނީ އިޒްރޭލުގެ ސިފައިން ވަނީ އެ މިނިސްޓްރީގެ 238 މުވައްޒަފުން މަރާލާފައިވާ ކަމަށާއި، ޣައްޒާއަށް އެއްގަމުން ވަދެ ހިންގި ހަމަލާތަކުގައި 19 މުވައްޒަފުން ހައްޔަރުކޮށްފައިވާ ކަމަށެވެ.
