ރައީސް ޔާމީންގެ ޕަރސަނަލް ވަކީލެއްގެ ގޮތުގައި މަސައްކަތްކުރެއްވި ހަނދާނެއް ނެތް - ޕީޖީ
1 އޮކްޓޯބަރު 2024 | އަންގާރަ 14:22މަސައްކަތް ކުރައްވާފައި ހުންނަވާނީ ޕާޓީގެ ލޯޔަރެއްގެ ގޮތުގައި
ޕީޖީ އައްބާސް ޝަރީފް
ކުރީގެ ރައީސް އަބްދުﷲ ޔާމީންގެ ޕަރސަނަލް ވަކީލެއްގެ ގޮތުގައި މަސައްކަތްކުރެއްވި ހަނދާނެއް ނެތް ކަމަށް ޕްރޮސެކިއުޓަރ ޖެނެރަލް އައްބާސް ޝަރީފް ވިދާޅުވެއްޖެއެވެ.
ނޫސްވެރިންނާއެކު ބޭއްވި ބައްދަލުވުމުގައި ޕީޖީ ވިދާޅުވީ ކުރީގެ ރައީސް އަބްދުﷲ ޔާމީންގެ ޕަރސަނަލް ވަކީލެއްގެ ގޮތުގައި މަސައްކަތްކުރެއްވި ހަނދާނެއް ނެތް ކަމަށާއި، ނަމަވެސް ރެކޯޑްތައް ބައްލަވާލައްވަންޖެހޭނެ ކަމަށެވެ. އަދި މަސައްކަތް ކުރައްވާފައި ހުންނަވާނީ ޕާޓީގެ ލޯޔަރެއްގެ ގޮތުގައި ކަމަށާއި، ކޯޓަށްވެސް ގޮސްފައި ހުންނާނީ ޕާޓީގެ ލޯޔަރެއްގެ ގޮތުގައި ކަމަށެވެ. އަދި ޕާޓީގެ އެންމެ އިސްވެރިޔާގެ ހައިސިއްޔަތުން ރައީސް ޔާމީނާއި އެކު އުޅުއްވި ކަމަށާއި، ނަމަވެސް ރައީސް ޔާމީންގެ ވަކީލެއްގެ ހައިސިއްޔަތުގެ ކޯޓަށް ގޮސްފައިވާކަމުގެ ހަނދާނެއް ނެތް ކަމަށެވެ.
ޕީޖީ ވިދާޅުވީ ރެކޯޑްތައް ބައްލަވާނެ ކަމަށާއި، އަދި ރައީސް ޔާމީންގެ ވަކީލެއްގެ ގޮތުގައި ކޯޓަށް ގޮސްފައި ހުރިނަމަ، އެ މައްސަލައިން ތަނާޒުންވާންޖެހޭ ހާލަތު އަންނާނެ ކަމަށެވެ. އަދި އެ ހާލަތުގައި އެ މައްސަލައަކުން ތަނާޒުންވާނެ ކަމަށާއި، އޮފީހުގައި ސިސްޓަމެއް ގާއިމްކުރެވިފައިވާ އިރު އެ ސިސްޓަމުގެ ތެރޭގައި ފިޔަވަޅު އަޅާނެ ގޮތްތަކެއް ހިމެނޭ ކަމަށާއި އުސޫލަށްވެސް އިތުބާރު އެބައޮތް ކަމަށެވެ.
ރައީސް ޔާމީންގެ ވަކީލަކަށް މަސައްކަތް ނުކުރައްވާކަމަށް ޕީޖީ އައްބާސް ޝަރީފް ވިދާޅުވިއިރު، 2018 ވަނަ އަހަރުގެ ރިޔާސީ އިންތިހާބުގެ މައްސަލައިގައި ރައީސް ޔާމީންގެ ފަރާތްޕުޅުން އިންތިހާބުގެ ނަތީޖާ ބަލައިނުގަނެ އިންތިހާބު ބާތިލުކޮށްދިނުމަށް އެދި ހުށަހެޅި މައްސަލައިގައި ވަކީލަކަށް އައްބާސް ޝަރީފް ވަނީ މަސައްކަތްކުރައްވާފައެވެ.
މީގެ އިތުރުން ޕީޕީއެމްގެ ފަރާތުން އެކި ކަންކަމުގައި ކޯޓުގައި އައްބާސްވަނީ ކުރިން މަސައްކަތްކުރައްވާފައެވެ.
