ބަންދު މުރާޖަޢާކުރުމަށް އެދި 539 ޝަކުވާ
އެ އޮފީހުން ނިންމާ ގޮތެއް ހުށަހެޅި ފަރާތްތަކާ ޙިއްޞާކުރާނެ
ޕްރޮސެކިއުޓަރ ޖެނެރަލް އައްބާސް ޝަރީފް
ދަޢުވާތަކާއި، ބަންދު މުރާޖަޢާކުރުމަށް އެދި 539 ފޯމު ހުށަހަޅާފައިވާ ކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެފިއެވެ.
ޕްރޮސެކިއުޓަރ ޖެނެރަލްގެ އޮފީހުން ބުނީ އެ އޮފީހުން ކޯޓަށް ހުށަހަޅައި ހިނގަމުންދާ ދަޢުވާތަކާއި، އިސްތިއުނާފުކޮށް ހިނގަމުންދާ އިސްތިއުނާފްތަކާއި، މައްސަލަތަކުގައި ހައްޔަރުކޮށްފައި އަދި ބަންދުކޮށްފައި ތިބި މީހުންގެ ބަންދާ ގުޅޭގޮތުން ޝަކުވާ ހުށަހެޅުމަށް ހުޅުވާލި ފުރުޞަތުގައި، ޖުމްލަ 539 ޝަކުވާ ހުށަހަޅާފައިވާ ކަމަށެވެ.
ހުށަހަޅާފައިވާ ޝަކުވާތަކާއި، މުރާޖަޢާކުރުމަށް އެދި ހުށަހަޅާފައިވާ ހުށަހެޅުންތަކާ ގުޅިގެން މި އޮފީހުން ބަލަންޖެހޭ ބެލުންތައް ބަލަމުންދާ ކަމަށާއި، އަދި ބަލަންޖެހޭ ބެލުންތައް ބަލައި މުރާޖަޢާކުރުމަށްފަހު، އެ އޮފީހުން ނިންމާ ގޮތެއް ހުށަހެޅި ފަރާތްތަކާ ޙިއްޞާކުރާނެ ކަމަށެވެ.
ކޯޓަށް ހުށަހަޅާފައިވާ ދަޢުވާތައް މުރާޖަޢާކުރުމަށް ނުވަތަ އެކި އެކި ސަބަބުތަކާހުރެ ހައްޔަރުކޮށްފައި ނުވަތަ ބަންދުކޮށްފައި ތިބި މީހުންގެ ބަންދު މުރާޖަޢާކުރުމަށް އެދި ހުށަހެޅުމުގެ ފުރުޞަތު ހުޅުވާލީ މި މަހުގެ 1 ވަނަ ދުވަހުއެވެ.
ޕްރޮސެކިއުޓަރ ޖެނެރަލްގެ އޮފީހުން ބުނީ އެކިއެކި ސަބަބުތަކާހުރެ ހައްޔަރުކޮށް، ނުވަތަ ބަންދުކޮށް ނުވަތަ މިނޫންވެސް ގޮތަކުން މީހެއްގެ މިނިވަންކަން ހިފެހެއްޓޭނެ ޙާލަތްތަކާއި، ޝަރުޠުތައް މުޠާލިޢާކުރުމާއި މުރާޖަޢާކުރަމުން ގެންދިއުމަކީ ދިވެހި ޖުމްހޫރިއްޔާގެ ޤާނޫނުއަސާސީގެ 223 ވަނަ މާއްދާގެ (ބ) ގެ ދަށުން ޕްރޮސިކިއުޓަރ ޖެނެރަލްއާ މަތިކޮށްފައިވާ ޒިންމާއެއް ކަމަށެވެ. އަދި ޖިނާއީ ކުށަކާ ގުޅިގެން ދަޢުވާ އުފުލުމަށް ނުވަތަ ދަޢުވާ ނުއުފުލުމަށް ނިންމާ ނިންމުންތައް މުރާޖަޢާކޮށް، އެނިންމުން ބަދަލުކުރުމަކީ އެ މާއްދާގެ (އ) ގެ ދަށުން ޕްރޮސިކިއުޓަރ ޖެނެރަލްގެ މަސްޢޫލިއްޔަތުތަކާއި ބާރުތަކުގެ ތެރޭގައި ހިމެނޭ ކަމެއް ކަމަށެވެ.
މީގެ އިތުރުން ޤާނޫނުއަސާސީގެ މި މާއްދާތަކުގެ ދަށުން ޕްރޮސިކިއުޓަރ ޖެނެރަލްއާ މަތިކޮށްފައިވާ މަސްޢޫލިއްޔަތުތަކާއި، ޒިންމާތައް އަދާކުރުމަށް ޕްރޮސިކިއުޓަރ ޖެނެރަލްއަށް އެހީތެރިވުމުގެ ގޮތުން އެ އޮފީހުގައި އެކަމަށް ޚާއްޞަ މުރާޖަޢާ ކޮމިޓީއެއް ޕްރޮސިކިއުޓަރ ޖެނެރަލް އެކުލަވާލައްވާލާފައިވާ ކަމަށެވެ. އަދި މިހާރު ކޯޓަށް ހުށަހަޅާފައިވާ ދަޢުވާތައް މުރާޖަޢާކުރުމަށް ނުވަތަ އެކި އެކި ސަބަބުތަކާހުރެ ހައްޔަރުކޮށްފައި ނުވަތަ ބަންދުކޮށްފައި ތިބި މީހުންގެ ބަންދު މުރާޖަޢާކުރުމަށް އެދި ހުށަހެޅުމުގެ ފުރުޞަތު އަދި އެ ކަންކަމާ ގުޅިގެން ޝަކުވާ ހުށަހެޅުމުގެ ފުރުޞަތު 1 އޮކްޓޫބަރު 2024 އިން ފެށިގެން 20 ދުވަހުގެ މުއްދަތެއް ދީފައިވެއެވެ.
ޕީޖީ އޮފީހުން ބުނީ މުރާޖަޢާ ކޮމިޓީގެ މައިގަނޑު މަސައްކަތަކީ މިހާރު ކޯޓަށް ހުށަހެޅިފައިވާ ދަޢުވާތަކާއި، ޖިނާއީ ކުށްތަކާ ގުޅިގެން ހައްޔަރުކޮށް ނުވަތަ ބަންދުކޮށްފައި ތިބި މީހުންގެ ބަންދު މުރާޖައާކުރުމަށް އެދި ހުށަހަޅާ ހުށަހެޅުންތަކާމެދު ޤާނޫނުއަސާސީއާއި، ޤާނޫނާއި، ކަމާ ގުޅުންހުރި ގަވާއިދުތަކުގެ އިމުގެ ތެރެއިން ގޮތެއް ނިންމައި، އެކަންކަމުގައި ޢަމަލުކުރަންވީ ގޮތުގެ ލަފާ ޕްރޮސިކިއުޓަރ ޖެނެރަލްއަށް އެރުވުމެވެ. އަދި އެ ނިންމުންތައް ބަދަލުކުރަންޖެހޭނަމަ އެކަން ކުރުމެވެ. މި ކޮމިޓީގެ މަސައްކަތްތައް ހިނގާނީ ސީދާ ޕްރޮސިކިއުޓަރ ޖެނެރަލްގެ ބެއްލެވުމުގެ ދަށުންނެވެ.
ޕީޖީ އޮފީހުން ބުނީ މުރާޖަޢާކުރުމަށް އެދި ހުށަހަޅާ ހުށަހެޅުންތަކާމެދު އެކަށީގެންވާ އަވަސްމިނެއްގައި ގޮތެއް ނިންމާނެކަމަށެވެ.
