ރައީސް މުއިއްޒުއަށް ބައްޕާފުޅުގެ ފަރާތުން ޤުރުއާން ވާރުތަވާނަމަ، ދޮން މަންމައަށް މުދާވެސް ވާރުތަވާނެ - ޖަމީލް

ރައީސް ޑރ. މުހައްމަދު މުއިއްޒުގެ ބައްޕާފުޅުގެ ފަރާތުން އެމަނިކުފާނަށް ޤުރުއާން ވާރުތަވާނަމަ، ދޮން މަންމައަށް މުދާވެސް ވާރުތަވާނެ ކަމަށް ކުރީގެ ނައިބުރައީސް ޑރ. މުހައްމަދު ޖަމީލް ވިދާޅުވެއްޖެއެވެ.

ޕިއެންއެފް ފްރަންޓް އޮފިސް ޖަލްސާފައި ވާހަކަ ދައްކަވަމުން ޖަމީލް ވިދާޅުވީ، އިންތިހާބުން ފެށިގެން މިއަދާ ހަމައަށް ވެސް ރައީސް ޑރ. މުހައްމަދު މުއިއްޒުގެ އަމަލުތަކުން ފެނިގެން ދިޔައީ އެއް މަންޒަރެއް ކަމަށެވެ. ވަރަށް ގިނަ ވައުދުތަކެއް ވެވަޑައިގެންނެވި ކަމަށާއި، ރާއްޖޭގެ އެކި ކަންކޮޅުތަކަށް ގޮސްވެސް އެކި ވާހަކަތައް ދެއްކެވި ކަމަށާއި، މަޖިލިސް އިންތިހާބުގައިވެސް ފެނިގެންދިޔައީ އެ މަންޒަރު ކަމަށެވެ.

ޖަމީލް ވިދާޅުވީ ޕީޕީއެމް 5 އަހަރު ތެރޭގައި ކުރި މަސައްކަތުގައި ހިމެނިގެން ދިޔައީ ރާއްޖޭގެ ސިޔާދަތަށް އޮތް ގޮންޖެހުމުގެ ވާހަކައާއި ގެއްލިގެން އުޅުނު ކަނޑުގެ މައްސަލަ ކަމަށެވެ. ރައީސް މުއިއްޒަކީ މިފަހުން ފެނުނު އެންމެ ވިޔާނުދާ ވެރިޔާ ކަމަށް ޖަމީލް ވިދާޅުވިއެވެ. ޖަމީލް ވިދާޅުވީ މިހާރު މި ފެންނަ މަންޒަރަކީ އެއްވެސްގޮތަކަށް ތަސައްވުރުކުރި މަންޒަރެއް ނޫން ކަމަށާއި، މީހަކު މިވަރަށް ނުބައިވެ، ދޮގުހަދާ، މީހަކު މިވަރަށް ދެ މޫނުގެ ވެރިޔަކަށް ވެދާނެކަމަށް އަދި ބަހާއި އަމަލާއި ދިމާނުވެދާނެކަމަށް ތަސައްވުރު ނުކުރެވޭ ކަމަށެވެ.

ވެރިކަން ކުރެއްވި ރައީސުންނަށް އިޝާރާތްކުރައްވާ ޖަމީލް ވިދާޅުވީ ރައީސް މައުމޫނަކި މިއަދުވެސް ރާއްޖޭގައި ތިބި އަރަބި ބަސް ދަންނަ ބޭޅުންގެ ތެރެއިން މޮޅު 3 ބޭފުޅުންގެ ތެރޭގައި ހިމެނިވަޑައިގަންނަވާނެ ބޭފުޅެއް ކަމަށެވެ. އެއީ އެ ދާއިރާއިން ދީނީ ތައުލީމު އުނގެނިވަޑައިގެން ހުންނެވި ރައީސެއް ކަމަށާއި، ރައީސް މައުމޫނަށް ލިބިވަޑައިގެން ހުންނެވި ތައުލީމާއި، ރާއްޖޭގެ ހާލަތާއި ކަންކަމުގެ މައްޗަށް ރިއާޔަތްކޮށް ރައީސް މައުމޫން ކީރިތި ގުރުއާނާއި ހަދީސްތަކުން ދަލީލު ނަންގަންވަމުން ގެންދެވިކަމަށް ޖަމީލް ވިދާޅުވިއެވެ.

ޖަމީލް ވިދާޅުވީ އެއްވެސް ބޭފުޅަކު އާޔަތެއް ހަދީސެއް ކިޔާތީ އުނދަގޫވެގެން އުޅެނީ ނޫން ކަމަށާއި، ނަމަވެސް މުއިއްޒަކީ އަރަބި ކަލާމުގެ މަދުރަސާއެއްގެ ދަށުންވެސް ހިންގެވި ބޭފުޅެއް ނޫން ކަމަށާއި، ވަޑައިގެންނެވީ މަޖީދިއްޔާ އަދި އޭގެ ފަހުން އިނގިރޭސިވިލާތަށް ކަމަށެވެ. ޖަމީލް ވިދާޅުވީ ރައީސް މުއިއްޒުގެ ބައްޕާފުޅުގެ ޑީއެންއޭ ގައިގައި ހިނގާތީ ކީރިތި ގުރުއާން ވާރުތަވާކަމުގައިވާނަމަ މުދަލާ އެހެން އެއްޗެހިވެސް ދޮން މަންމައަށް ވާރުތަވާންޖެހޭ ކަމަށެވެ.

ޖަމީލް ވިދާޅުވީ ބަހާއި އަމަލާއި ދިމާނުވާ ވެރިޔަކު އައިސް، މިއަދު އިންޑިއާއަށް ގޮސް އެ ދައްކާ ވާހަކަތަކަކީ އެކަމުގެ އެއް ހެކި ކަމަށެވެ.