ސްރީ ލަންކާގެ މަސްވެރިންނަށާއި ދަނޑުވެރިންނަށް ސަބްސިޑީ އެހީ ދިނުމަށް އެގައުމުގެ އައު ރައީސް އަނޫރާ ކުމާރާ ޑިސެނަޔަކަ ނިންމަވައިފިއެވެ.

ރައީސް ޑިސެނަޔަކަގެ މީޑީއާ ޑިވިޜަނުން ބުރާސްފަތި ދުވަހު އާންމުކުރި ބަޔާނެއްގައި ބުނެފައިވަނީ 1 އޮކްޓޯބަރުން ފެށިގެން މަސްވެރިންނާ ދަނޑުވެރިންނަށް އެހީދިނުމަށް ރައީސް ނިންމަވާ އެ ގައުމުގެ މާލީ ވުޒާރާއަށް އެކަން އަންގަވާފައިވާ ކަމަށެވެ.

އިގްތިސާދީ ބޮޑެތި ގޮންޖެހުންތަކެއް ކުރިމަތިވެ، އިގްތިސާދު ހީނަރުވެފައިވާ ސްރީ ލަންކާގެ އައު ސަރުކާރުން ފުރަތަމަ ނިންމި ނިންމުންތަކުގެ ތެރޭގައި މަސްވެރިންނާއި ދަނޑުވެރިންނަށް އެހީދިނުން ހިމެނޭކަން ފާހަގަ ކުރެވެއެވެ.

ސްރީ ލަންކާގެ ސަރުކާރުން ނިންމާފައިވަނީ ދަނޑުވެރިންނަށް ދޭ ފައިސާގެ އެހީ ސީދާ އެ ފަރާތެއްގެ އެކައުންޓަށް ޖަމާކޮށްދޭ ގޮތަށެވެ. އޭގެ މަގްސަދެއް ކަމުގައި ބުނެފައިވަނީ އަވަހަށް އެހީގެ ބޭނުން ހިފޭނެ ގޮތް ތަނަވަސްކޮށް ދިނުން ކަމުގައެވެ.

ސްރީ ލަންކާގެ މަސްވެރިކަން ކުރިއެރުވުމަށް މަސްވެރިންނަށް އޮކްޓޯބަރު މަހުގެ ފުރަތަމަ ދުވަހުން ފެށިގެން ދިނުމަށް ހަމަޖެއްސީ ތެލުގެ ސަބްސިޑީ ކަމަށް ސަރުކާރުން ބުނެއެވެ. މި ގޮތުން ދުވަހު މަސްވެރިކަމުގައި އުޅޭ ފަރާތްތަކަށާއި ގިނަ ދުވަހު މަސްވެރިކަމުގައި ކަނޑުމަތީގައި އުޅޭ ފަރާތްތަކަށްވެސް އެހީދޭ ގޮތައް ވަނީ ހަމަޖައްސާފައެވެ. ސްރީލަންކާގެ އައު ރައީސް ނިންމަވާފައިވަނީ މަސްވެރިންނަށް ދޭ ސަބްސިޑީ ފައިސާވެސް މަސްވެރިންގެ އަމިއްލަ އެކައުންޓަށް ޖަމާކޮށްދޭ ގޮތައް ކަމުގައި ރައީސްގެ މީޑީއާ ޑިވިޜަނުން ބުނެފައިވެއެވެ.