އިޒްރޭލުން ސްކޫލް އިމާރާތަކަށް ބޮން އަޅާ މަދުވެގެން 7 ފަލަސްތީން މީހުން ޝަހީދު ކޮށްލައިފި
ޣައްޒާ އަށް އިޒްރޭލް ސިފައިން މިދިޔަ އަހަރުގެ އޮކްޓޯބަރު 7 ވަނަ ދުވަހން ފެށިގެން ހުއްޓުމެއްނެތި ދެމުންދާ ހަމަލާތަކުގައި ފަލަސްތީނުން ޝަހީދުވި މީހުންގެ އަދަދު މަދުވެގެން 41،391 ށް ވަނީ އަރާފައި
އިޒްރޭލުން ބޮންއަޅާ ފުނޑުކޮށްލާފައިވާ ސުކޫލް އިމާރާތެއްގެ ތެރޭގައި ފަލަސްތީން ބަޔަކު ހަރަކާތްތެރިވަނީ
އާދިއްތަ ދުވަހު އިޒްރޭލުން ފަލަސްތީނުގެ ސްކޫލް އިމާރާތަކަށް ބޮން އަޅާ މަދުވެގެން 7 މީހުން ޝަހީދު ކޮށްލައިފި ކަމަށް ފަލަސްތީނުގެ ސިވިލް ޑިފެންސުން ބުނެފިއެވެ.
ސްކޫލް އިމާރާތައް ހަމަލާ ދިނުމަށްފަހު އިޒްރޭލުން ބުނީ ހަމަލާ އަމާޒުކޮށްފައިވަނީ ހަމާސްގެ ހަނގުރާމަވެރިންނަށް ކަމަށެވެ.
އާންމުން ދިރިއުޅޭ އިމާރާތްތަކުގައި ހަނގުރާމަވެރިން ނުތިބޭނެ ކަމަށް ތަކުރާރުކޮށް ހަމާސް އިން އަންނަނީ ބުނަމުންނެވެ.
ސިވިލް ޑިފެންސް އޭޖެންސީގެ ތަރުޖަމާން މަޙްމޫދު ބައްސާލް އާ ހަވާލާދީ ރިޕޯޓްތައް ބުނެފައިވާ ގޮތުގައި އިޒްރޭލުން ހަމަލާދިނީ އަލް-ޝާޠީ ރެފިއުޖީ ކޭމްޕްގައި ހުރި ކަފްރު ޤާސިމް ސްކޫލަށެވެ. ހަމަލާގައި ގިނަ އަދަދެއްގެ އާންމުންނަށް އެކިވަރުގެ ޒަޚަމްތައް ލިބިފައިވާ ކަމަށްވެސް އޭނާ ވަނީ ހާމަކޮށްފައެވެ.
ތަރުޖަމާނު ބުނިގޮތުގައި ހަމަލާދިން އިމާރާތަކީ ގެދޮރު ގެއްލިފައިވާ އެތައް ސަތޭކަ މީހުން ހިޔާވަހިކަން ހޯދަމުންދާ ތަނެކެވެ.
ސިވިލް ޑިފެންސް އޭޖެންސީން ބުނެފައިވަނީ ހޮނިހިރު ދުވަހު ވެސް ޣައްޒާ ސިޓީގައި ހުރި ވަގުތީ ހިޔަލެއްގެ ގޮތުގައި ބޭނުން ކުރާ ސްކޫލަކަށް އިޒްރޭލުން ބޮން އަޅާފައިވާ ކަމަށެވެ. އެ ހަމަލާގައި، މަދުވެގެން 21 މީހުން ވަނީ ޝަހީދުވެފައެވެ.
ޣައްޒާ އަށް އިޒްރޭލް ސިފައިން މިދިޔަ އަހަރުގެ އޮކްޓޯބަރު 7 ވަނަ ދުވަހން ފެށިގެން ހުއްޓުމެއްނެތި ދެމުންދާ ހަމަލާތަކުގައި ފަލަސްތީނުން ޝަހީދުވި މީހުންގެ އަދަދު މަދުވެގެން 41،391 ށް ވަނީ އަރާފައެވެ. މީގައި ގިނައިން ހިމެނެނީ އަންހެނުންނާއި ކުޑަކުދިންނާއި އާންމުން ކަމަށް ޣައްޒާގެ ސިއްހަތާ ބެހޭ ވުޒާރާއިން ހާމަކޮށްފައިވެއެވެ.
