ބަންކަރިންގެ ޚިދުމަތުން 400 މިލިއަން ޑޮލަރުގެ އާމްދަނީއެއް ލިބޭނެ ޒަމާނެއް ސާފުކޮށްދޭން ޖެހޭ: އަމްރު
ބޯޓުތަކެއް ގެނެސް ޚިދުމަތް ދޭން ފެށުމުން އެކަމުގައި ހަގީގީ ފައިދާ ރާއްޖެއަށް ނުލިބޭނެ
އެސްޓީއޯގެ ކުރީގެ މެނޭޖިން ޑިރެކްޓަރ ހުސެން އަމްރު
ރާއްޖެއަށް މުހިންމީ ޓްރާސްޝިޕްމަންޓް ޕޯޓެއް ކަމަށާއި، މިސަރުކާރުން ބަންކަރިންގެ ޚިދުމަތް ފަށާފައިވާ ގޮތުން 400 މިލިއަން ޑޮލަރުގެ އާމްދަނީއެއް ލިބޭނެ ޒަމާނެއް ސާފުކޮށްދޭން ޖެހޭ ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު ވިދާޅުވެއްޖެއެވެ.
ބަންކަރިންގެ ޚިދުމަތާއި ގުޅޭގޮތުން ރާއްޖެޓީވީގެ ފަލަސުރުހީ ޕްރޮގްރާމްގައި އަމްރު ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ބަންކަރިންގެ ޚިދުމަތް ފެށުމަށް ޕްލޭންތައް ހަދާފައިވާ ކަމަށާއި، ބައިނައިލްއަގުވާމީ ގިނަ ކުންފުނިތަކާ މަޝްވަރާކޮށްފައިވާ ކަމަށެވެ. އަދި ގިނަ ކުންފުނިތަކުން އެކަމުގެ ޝައުގުވެރިކަން ފާޅުކޮށްފައިވާ ކަމަށް އޭނާ ވިދާޅުވިއެވެ.
އަމްރު ވިދާޅުވީ ރާއްޖެއަށް އެންމެ ފައިދާވާ ގޮތަށް ބަލާއިރު، އެންމެ ރަނގަޅީ ޓްރާސްޝިޕްމަންޓް ޕޯޓެއް ތަރައްގީކޮށް އެސްޓީއޯއިން އެތަނުގައި ފިއުލް ސްޓޯރޭޖެއް ހަދައިގެން އެތަނުން ތެޔޮ ވިއްކުން ކަމަށެވެ. ނަމަވެސް މިސަރުކާރުން ބޯޓުތަކެއް ގެނެސް ޚިދުމަތް ދޭން ފެށުމުން އެކަމުގައި ހަގީގީ ފައިދާ ރާއްޖެއަށް ނުލިބޭނެ ކަމަށް އަމްރު ވިދާޅުވިއެވެ.
ބަންކަރިންގެ ޚިދުމަތުން 400 މިލިއަން ޑޮލަރުގެ އާމްދަނީ ހޯދޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެފައިވާތީ އެކަމަށް އިޝާރާތް ކުރައްވައި އަމްރު ވިދާޅުވީ މިއީ ދެކޮޅު ޖެހޭ ވާހަކައެއް ނޫން ކަމަށެވެ. 20 މިލިއަން ޑޮލަރު އިންވެސްޓް ކުރިކަމަށް މިސަރުކާރުން ބުނާއިރު، އިންވެސްޓު ކުރި އެއްޗަކާއި، 400 މިލިއަން ޑޮލަރު ލިބެނީ ކޮން ޒަމާނަކުންތޯ އަމްރު ސުވާލު އުފެއްދިއެވެ. އަދި ވިދާޅުވީ މިކަމުގެ ސާފު މައުލޫމާތު ރައްޔިތުންނަށް ހާމަކުރަންޖެހޭ ކަމަށެވެ.
އެސްޓީއޯއިން ބުނީ އޮފްޝޯ ޚިދުމަތެއްގެ ގޮތުގައި އިންޓަނޭޝަނަލް ބަންކަރިން ފެށިއިރު އެ ޚިދުމަތް ފޯރުކޮށްދިނުމަށް ފުރަތަމަ ބޭނުންކުރާނީ ދެ ބޯޓެއް ކަމަށެވެ. އެެއީ 3،258 ޓަނުގެ އެމްޓީ މެރިން އޭންޖަލް އާއި 3،929 ޓަނުގެ އެމްޓީ މެރިން ބެލާ އެވެ. މި ދެބޯޓަކީ މިފަދަ ޚިދުމަތް ފޯރުކޮށްދިނުމަށް ފަރުމާކޮށް ބަނދެފައިވާ، ސަލާމަތީ ގޮތުންނާއި ރައްކާތެރިކަމުގެ ގޮތުން ބައިނަލް އަގުވާމީ މިންގަޑުތަކަށް ފުރިހަމައަށް ފެތޭކަމުގެ ސެޓްފިކެޓްތައް އެލް އާރ ކްލާހުންނާއި ފްލެގް ސްޓޭޓުން ދޫކޮށް ފައިވާ ބޯޓުފަހަރު ކަމަށެވެ.
މި ދެ ބޯޓަކީ އެސްޓީއޯ އާއި ވިޓޯލްއާ ގުޅިގެން ބަންކަރިން ހިދުމަތަށް އެސްޓީއޯގެ ފުރިހަމަ ރައިޓްސްއާއެކު ބެއާ ބޯޓް ޗާޓާ ކޮންސެޕްޓަށް ދެ އަހަރުތެރޭ އެއްކޮށް މިލްކުވާގޮތަށް ހޯދާފައިވާ ދެ ބޯޓެވެ.
ބައިނަލް އަގްވާމީ ބަންކަރިންގެ ޚިދުމަތް އިހަވަންދިއްޕޮޅުގައި ސަރުކާރުން ފެށި ނަމަވެސް، މިކަމުގެ އެއްވެސް ތަފްސީލެއް މިހާތަނަށް ހާމަ ކޮށްފައެއް ނުވެއެވެ. ވިޓޯލް އާއި އެސްޓީއޯ ދެމެދު ހެދި އެއްބަސްވުމުގެ ދަށުން ރާއްޖެއިން ޚަރަދު ކުރާ މިންވަރެއް އަދި ރާއްޖެއަށް ފައިދާ ލިބޭ ގޮތެއްވެސް ސަރުކާރުން ހާމަކޮށްފައެއް ނުވެއެވެ.
