މިނިސްޓަރު ސައީދަށް އެނގޭ އެކައްޗެއް ވެސް ނެތީތަ؟ ބަންކަރިން އިން ލިބުނު އާމްދަނީ ނޭނގުނުތާ ދެވުނު ވަޒީފާގެ އަދަދު ވެސް ނޭނގުނު!
އިންޓަރނޭޝަނަލް ބަންކަރިން ޚިދުމަތް ފަށަން ކަމަށް ވިދާޅުވެ އިހަވަންދިއްޕޮޅުގެ ރަށްތަކަށް ވަޑައިގެން އެންމެ ކުރީ ސަފުގައި ހުންނަވާ ރައްޔިތުންނަށް ފޮނި ހުވަފެން ދައްކަވަން އުޅުއްވި ސައީދަށް މިއަދު ބަންކަރިންނާ ބެހޭ ގޮތުން އެނގޭ އެކައްޗެއް ވެސް ނެތެވެ.
ބަންކަރިންގ ޚިދުމަތުން ޓެކުހުގެ ގޮތުގައި 1.1 މިލިއަން ޑޮލަރު ލިބިފައިވޭ
މިނިސްޓަރު މުހައްމަދު ސައީދު އާއި ބަންކަރިން
ބަންކަރިން އިން އިހަވަންދިއްޕޮޅަށް ލިބުނު އާމްދަނީ ނޭނގުނު އިރު އެ ޚިދުމަތުގެ ސަބަބުން އުފެދުނު ވަޒީފާތަކުގެ އަދަދު ވެސް ނޭނގޭ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މަޖިލީހުގެ ކަނޑިތީމު ދާއިރާގެ މެމްބަރު އަމީން ފައިސަލް ކުރެއްވި ސުވާލަކަށް ޖަވާބު ދެއްވަމުން ސައީދު ވިދާޅުވީ އެ ޚިދުމަތާއެކު އުފެދުނީ ކިތައް ވަޒީވާކަން އެނގޭނީ އެސްޓީއޯ އަށް ކަމަށެވެ.
އަހަރަކު 400 މިލިއަން ޑޮލަރުގެ އާމްދަނީއެއް ލިބޭނެ ކަމަށް ބުނެ ފެށި ބަންކަރިންގެ ޚިދުމަތުން އިއްޔެއާ ހަމައަށް ލިބުނީ 12.46 މިލިއަން ޑޮލަރު ކަމަށް ސައީދު ވިދާޅުވިއެވެ. އަދި ވިދާޅުވީ އެ މުއްދަތުގެ ތެރޭގައި ޓެކުހުގެ ގޮތުގައި އެ ޚިދުމަތުން 1.1 މިލިއަން ޑޮލަރު ލިބުނު ކަމަށެވެ.
އޭގެ ސަބަބުން އުފެދުނީ ކިތައް ވަޒީފާކަމާއި އޭގެ ސަބަބުން ކިތައް ބޯޓު އައިސްފިކަމާއި މި ހުރިހާ އެއްޗެއް، އަޅުގަނޑު ވާހަކަ ފަށަމުން ވެސް މި ދެންނެވީ މި ހިދުމަތް ދިނުމަށް އެސްޓީއޯއަށޭ އެއޮތީ ހަވާލުކޮށްފައި، އެ ބޭފުޅުން އަތްޕުުޅުގައި ހުންނާނެ ތި ހުރިހާ ތަފުސީލެއް،އިކޮނޮމިކް މިނިސްޓަރު މުހައްމަދު ސައީދު
އަންގާރަ ދުވަހުގެ ޖަލްސާގައި ސައީދުގެ ވާހަކަތައް ބައްޓަން ކުރައްވާފައި ވަނި ހަގީގަތް އޮޅުވާލުމަށް ކަން ފާހަގަ ކުރެވުނެވެ. އެގޮތުން ވަޒީރުގެ ވާހަކަ އިން އިންޓަރނޭޝަނަލް ބަންކަރިން ފެށީ މި ސަރުކާރުން ކަމަށް ދޭހަވި ނަމަވެސް ރާއްޖޭގައި ބަންކަރިންގެ ޚިދުމަތް ދޭތާ އެތައް ޒަމާނެއް ވަނީ ވެފައެވެ.
އެކަމުގައި އެސްޓީއޯގެ އިތުރުން އަމިއްލަ ކުންފުނިތައް ވެސް ބައިވެރިވެއެވެ. މިނިސްޓަރ މަޖިލީހުގައި ހާމަކުރެއްވި އަދަދުތަކަކީ ބަންކަރިންގެ ޚިދުމަތުން ލިބިފައިވާ ޖުމްލަ އަދަދު ކަމަށް ވެދާނެއެވެ. އެހެން ކަމަށްވާ ނަމަ އޭގެ ބޮޑު ބައެއް ލިބިފައި އޮންނާނީ ބަންކަރިން ޚިދުމަތް ޒަމާނުއް ސުރެ އެންމެ ބޮޑަށް ދެމުން އަންނަ މާލޭ ސަރަހައްދަށެވެ. މެމްބަރު އަމީން ސުވާލުކުރައްވާފައި ވަނީ އިހަވަންދިއްޕޮޅުގެ ބަންކަރިން އިން ލިބުނު އާމްދަނީ އާ ބެހޭ ގޮތުންނެވެ.
އިންޓަރނޭޝަނަލް ބަންކަރިން ޚިދުމަތް ފަށަން ކަމަށް ވިދާޅުވެ އިހަވަންދިއްޕޮޅުގެ ރަށްތަކަށް ވަޑައިގެން އެންމެ ކުރީ ސަފުގައި ހުންނަވާ ރައްޔިތުންނަށް ފޮނި ހުވަފެން ދައްކަވަން އުޅުއްވި ސައީދަށް މިއަދު ބަންކަރިންނާ ބެހޭ ގޮތުން އެނގޭ އެކައްޗެއް ވެސް ނެތެވެ. އޭރު ހުރިހާ ކަމެއް ވެސް އެނގިވަޑައިގަންނަވަނީ މި މަނިކުފާނަށެވެ. މިހާރު ވިދާޅުވަނީ ކަންކަން އެނގޭނީ އެސްޓީއޯ އަށް ކަމަށެވެ.
