މި ސަރުކާރުން ބޭނުންވެއްޖެނަމަ ވަގުތުން ޑޮލަރުގެ ރޭޓު 15 ރުފިޔާއަށް ދަށްކުރެވޭނެ: އަމްރު
27 ސެޕްޓެމްބަރު 2025 | ހޮނިހިރު 07:51ޑޮލަރުގެ ކަޅު ބާޒާރު ކޮންޓްރޯލް ކުރަނީ ސަރުކާރުން، މާކެޓުގައި ޑޮލަރު ދައުރެއް ނުކުރޭ
ރައީސް ޑރ.މުހައްމަދު މުއިއްޒު، މި ސަރުކާރުގައި ޑޮލަރުގެ ރޭޓު ވަނީ 20 ރުފިޔާއަށްވުރެ މައްޗަށް ގޮސްފައި
މި ސަރުކާރުން ބޭނުންވެއްޖެނަމަ ވަގުތުން ޑޮލަރުގެ އަގު ދަށް ކުރެވި، 15 ރުފިޔާއަށް ހެދޭނެ ކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކުރީގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އަމްރު ވިދާޅުވީ ޑޮލަރުގެ ކަޅު ބާޒާރު ކޮންޓްރޯލް ކުރަނީ ސަރުކާރުން ކަމަށާއި، ސަރުކާރުން ބޭނުންވެއްނަމަ މާދަމާ ވެސް ޑޮލަރުގެ އަގު 15 ރުފިޔާއަށް 14 ނުވަތަ 17 ރުފިޔާއަށް ވެސް ހެދޭނެ ކަމަށެވެ.
ރާއްޖޭގެ ރިސޯޓުތަކުން ބޭންކުތަކަށް ޑޮލަރު މާރުކުރަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވައިލައި އަމަލުކުރަން ފެށި ބޭރުފައިސާގެ ގަވާއިދުގެ ދަށުން ޑޮލަރު ވަންނަކަން ފާހަގަކުރައްވައި އަމްރު ވިދާޅުވީ އެ ޑޮލަރުތައް މާކެޓުގައި ދައުރު ނުކުރާ ކަމަށާއި، ހުރިހާ ޑޮލަރެއް ސަރުކާރުން ކޮންޓްރޯލްކޮށް ހިފަހައްޓަމުންދާ ކަމަށެވެ. އަދި މި ގަވާއިދަށް އަމަލުކުރަން ފެށުމުގެ ކުރިން ޑޮލަރު ރޭޓު ހުރީ 19 ރުފިޔާއަށް ކަމަށާއި، ނަމަވެސް މި ގަވާއިދާއެކު 21 ރުފިޔާއަށް ޖެހިފައިވާ ކަމަށް އޭނާ ވިދާޅުވިއެވެ.
މީގެ އިތުރުން އަމްރު ވިދާޅުވީ ބައެއް ރަށްރަށުގެ ކައުންސިލްތަކުން އަދި ބިން ހިއްކާފައިވާ ރަށްތަކުގެ ކައުންސިލްތަކުން ވެސް ފަޅު ތެރޭގައި ގެސްޓުހައުސް އެޅުމަށް މަސައްކަތް ކުރި ކަމަށާއި، ނަމަވެސް ގެސްޓުހައުސް ވިޔަފާރި ހިންގުމުގެ ހުއްދަ ދޫނުކޮށް ހިފަހައްޓާފައިވާ ކަމަށެވެ. މަގުސަދަކީ ރަށުގެ ތެރޭގައި ޑޮލަރު ދައުރުވުން ހުއްޓުވުން ކަމަށް އަމްރު ވިދާޅުވިއެވެ.
އެއީ ސަރުކާރުން ހުރިހާ ޑޮލަރެއް މިގެންދަނީ ގެންގޮސްފައި ސަރުކާރުގައި އެހުރީ. އެ އާއްމުންނަށް އެ ދޫކުރާ ވަރަކުން ތިރިއަށްދާނީ. އެހެންވީމަ ސަރުކާރުން ނޫންތޯ އެ ކޮންޓްރޯލް ކުރަނީ. ޑޮލަރުގެ ގަވާއިދެއް އެ ހެދިއިރު ތި ވިދާޅުވިހެން އަޑަށް ބާރުލައްވާފައި އެވިދާޅުވިއިރު ހުރީ 19 ރުފިޔާއަށް. އެކަން ކުރީމަ މިހާރު 21 ރުފިޔާއަށް. އެހެންވީމަ އަޅުގަނޑަކަށް ނުފެނޭ މިސަރުކާރުން ޑޮލަރުގެ އަގު ތިރިކުރަން މަސައްކަތް ކުރާތަނެއް. ވީހާ ވެސް ބޮޑު ކޮށްފައި ބަހައްޓަން ބޭނުންވަނީ. ދެން އިތުރަށް ތި ވިދާޅުވިހެން ޑޮލަރު ލިބޭނެ އިތުރު ގޮތްތައް ބަންދުކުރަން ބޭނުންވަނީ. ރައްޔިތުންގެ ޖީބާ ހިސާބުން. ސަރުކާރަށް ލިބެން ޖެހޭނީ. ހައްގު ކޯޕްރޭޝަނުން އެހެންވީމަ މި ނިކުންނަނީ ގެސްޓުހައުސް އަޅަން. ދެން އެހެން ބަޔަކަށް ގެސްޓްހައުސް އެޅިގެން ނުވާނެ. ކައުންސިލްތަކުން ވެސް ގެސްޓްހައުސްތައް އަޅައިގެންތާ އެމީހުންނަށް ވެސް އާމްދަނީ އެއް މިލިބެނީ. އެކަމަށް ފެސިލިޓޭޓެއް ނުންތޯ ކޮށްދޭންޖެހެނީ. އެކަމަށް ބޭނުންވާ ހުރިހާ އެހީތެރިކަމެއް ދޭން ޖެހޭނެއްނުންތޯ. އެކަމަކު އޭގެ ބަދަލުގައި ހުއްދަ ވެސް ނުދީގެން އެއުޅެނީ.އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު
އަމްރު ވިދާޅުވީ އަދިވެސް ސަރުކާރުން މަސައްކަތް ކުރަނީ ޑޮލަރުގެ ރޭޓު މަތިކޮށް، ރައްޔިތުންނަށް ޑޮލަރު ލިބޭނެ އިތުރު ގޮތްތައް ބަންދުކުރުމަށް ކަމަށެވެ. އެ ސިޔާސަތުގެ ދަށުން ސަރުކާރުގެ ހިއްސާ އޮންނަ ކުންފުނިތަކުން ގެސްޓުހައުސް ވިޔަފާރި ފެށުމަށް މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
