އަހަރެއްވީއިރު ބަންކަރިންގެ ހިދުމަތުން ލިބުނީ، ރައީސް މުއިއްޒު އަންދާޒާކުރެއްވި އަދަދުގެ 3 އިންސައްތަ
ބަންކަރިންގެ ހިދުމަތް ފަށައިގެން ފުރަތަމަ އަހަރު ނިމޭއިރުވެސް ރާއްޖޭގެ ޖީޑީޕީ އަށް 400 މިލިއަން ޑޮލަރު އިތުރުވެގެންދާނެކަމަށް 2024 ވަނަ އަހަރުގެ މިނިވަން ދުވަހުގެ ރަސްމީ ޖަލްސާގައި ރައީސް މުޢިއްޒު ވަނީ ވިދާޅުވެފަ
2024 ވަނަ އަހަރުގެ މިނިވަން ދުވަހުގެ ރަސްމީ ޖަލްސާގައި ރައީސް މުޢިއްޒު ވާހަކަ ދައްކަވަނީ؛ މިޖަލްސާގައި ބަންކަރިންގެ ހިދުމަތުން އަހަރަކު 400 މިލިއަން ޑޮލަރު ލިބޭނެކަމަށް ރައީސް މުއިއްޒު ވަނީ ވިދާޅުވެފަ
އަހަރަކު 400 މިލިއަން ޑޮލަރުގެ އާމްދަނީ އެއް ލިބޭނެކަމަށްބުނެ އިހަވަންދިއްޕޮޅުގައި 2024 ވަނަ އަހަރު ސަރުކާރުން ފެށި އިންޓަރނޭޝަނަލް ބަންކަރިންގެ ހިދުމަތުން، އަހަރަަކަށް ވުރެ ގިނަދުވަސްވީ އިރުވެސް ލިބުނީ 12 މިލިއަން ޑޮލަރުކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. މިއީ މި ހިދުމަތް ފެށުމުގެ ކުރިން އާމްދަނީއެއްގެ ގޮތުގައި އަހަރަކު ލިބޭނެކަމަށް ރައީސް މުއިއްޒު އަދި ވަޒީރު ސައީދުވެސް ވިދާޅުވި އާމްދަނީގެ އެންމެ 3 އިންސައްތައެވެ.
ރައްޔިތުންގެ މަޖިލީހުގައި މެންބަރުންގެ ސުވާލުތަކަށް ޖަވާބު ދެއްވަމުން ވަޒީރު ސަޢީދު ވިދާޅުވީ ސެޕްޓެމްބަރު 2024 ގައި އިންޓަނޭޝަނަލް ބަންކަރިންގެ ހިދުމަތްފެށި ހިސާބުން މިހާތަނަށް ލިބުނީ 192،149،939 ރުފިޔާ (12.4 މިލިއަން ޑޮލަރު) ގެ އާމްދަނީއެއް ކަމަށެވެ. އަދި ބަންކަރިންގެ ހިދުމަތް މި މުއްތަދުގައި ހޯދި ފަރާތްތަކުން ޓެކްސްގެ ގޮތުގައި 17 މިލިއަން ރުފިޔާ (1.1 މިލިއަން ޑޮލަރު) ސަރުކާރަށް ދައްކާފައި ވާކަމަށްވެސް ސަޢީދު ވިދާޅުވިއެވެ.
މިސަރުކާރުން އިހަވަންދިއްޕޮޅުގައި ބަންކަރިންގެ ހިދުމަތް ފޯރުކޮށްދެން ފެށިފަހުން އަހަރެއް ވީއިރު މިހާ ކުޑަ އާމްދަނީއެއް ލިބުނު އިރު، ބަންކަރިންގެ ހިދުމަތް ފަށައިގެން ފުރަތަމަ އަހަރު ނިމޭއިރުވެސް ރާއްޖޭގެ ޖީޑީޕީ އަށް 400 މިލިއަން ޑޮލަރު އިތުރުވެގެންދާނެކަމަށް 2024 ވަނަ އަހަރުގެ މިނިވަން ދުވަހުގެ ރަސްމީ ޖަލްސާގައި ރައީސް މުޢިއްޒު ވަނީ ވިދާޅުވެފައެވެ.
މި އަންނަ މަހު އިރާދަކުރެއްވިއްޔާ ފެށޭނެ [ބަންކަރިންގެ ހިދުމަތް]. [ބަންކަރިންގެ ހިދުމަތް] ފެށުނީމާ މިވަނީ ކޮން ކަމެއްތޯ؟ ފެށުނީމަ މިވާގޮތަކީ، ފުރަތަމަ އަހަރު ނިމޭއިރުވެސް،ަރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
މީގެ އިތުރުން މި ހިދުމަތް ފެށުމުގެ ކުރިން 2024 ވަނަ އަހަރު މިނިސްޓަރު ސައީދު ވިދާޅުވީ، ރާއްޖޭގެ ޖީޑީޕީއަކީ މިހާރު 6.5 ބިލިއަން އެމެރިކާ ޑޮލަރުކަމަށާއި، ބަންކަރިންގެ ޚިދުމަތް ފެށުމުން އޭގެ ތެރެއަށް މުޅިން އަލަށް އަހަރަކު 400 މިލިއަން ޑޮލަރު ވަދެގެންދާނެކަމަށެވެ. މިއާއެކު ހަ ބިލިއަން ދިވެހި ރުފިޔާ މުޅިން އާ ސިނާއަތެއް އުފެދޭނެކަމަށް ސަޢީދު ވިދާޅުވިއެވެ. އަދި މިދިޔަ އަހަރު ޖުލައި މަހުގެ ތެރޭގައި ޕީއެންސީގެ ހަރުގޭގައި ބޭއްވި ޖަލްސާއެއްގައި ބަންކަރިންގެ ހިދުމަތުން އަހަރެއްގެ ތެރޭގައި 400 މިލިއަން ޑޮލަރު ލިބޭނެކަމުގެ ޔަގީންކަން ސަޢީދު ވަނީ ދެއްވާފައެވެ.
ނަމަވެސް ބަންކަރިންގެ ހިދުމަތް އިހަވަންދިއްޕޮޅުގައި ފަށައިގެން ރައްޔިތުންނަށް ހަގީގަތް ހާމަވާން ފެށުމުން ވަޒީރު ސައީދު ވެސް ވަނީ މިކަމާ ގުޅިގެން ކުރިން ދެއްކެވި ވާހަކަތާކާ ހަވާލުވުމަށް ދެކޮޅު ހައްދަވާފައެވެ. އެގޮތުން މިއަހަރުގެ އެޕްރިލް މަހުގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސައީދު ވިދާޅުވީ ބަންކަރިންގެ ހިދުމަތް ފަށައިގެން އަހަރެއްވާއިރު 400 މިލިއަން ޑޮލަރު ލިބޭނެއޭ ވިދާޅުވެފަ ނުވާނޭކަމަށާއި، ކުރިން ވެސް ވިދާޅުވެފައިވާނީ 400 މިލިއަން ޑޮލަރު ހޯދުމުގެ ޓާގެޓާ ހަމައަށް ދިޔުމަށް މަސައްކަތް ކުރައްވާނެ ވާހަކަ ކަމަށެވެ. ސައީދު ވިދާޅުވީ ބަންކަރިންގެ ހިދުމަތަކީ ދުނިޔޭގެ ބޮޑު ވިޔަފާރިއެއް ކަމަށާއި އެތައް ބިލިއަން ޑޮލަރުގެ މި ވިޔަފާރީގެ ތެރެއިން ރާއްޖޭގެ އުތުރާއި ދެކުނުގެ ކަނޑުއޮޅިތަކުގައި ހިނގާ ވިޔަފާރިތަކުގެ އެއް ޕަސެންޓަކީ 400 މިލިއަން ޑޮލަރު ކަމަށް ވިދާޅުވެފައިވާނެ ކަމަށެވެ.
އިހަވަންދިއްޕޮޅުގައި ސަރުކާރުން ފެށި ބަންކަރިންގެ ހިދުމަތަކީ އެކަމުގައި ވަރަށްބޮޑު އޮލުވާލުންތަކެއް ހިމެނޭ، އެއްވެސް ރޭވުން ތެރިކަމެއް ނެތި ހަމަ އެކަނި ދައްކާލުމުގެ ގޮތުން ފަށައިގަތް ކަމެއްކަމަށް ސަރުކާރާ އިދުކޮޅު ފަރާތްތަކުގެ އިތުރުން މިދާއިރާގެ ތަޖުރިބާކާރުންވެސް ފާހަގަކުރެއެވެ. ވަސީލަތް ފުރިހަމަ ނުކޮށް، ތެޅިގަނެގެން ބަންކަރިންގ ވަރުގެ މޮޅު މަޝްރޫޢު އެއް ނެތްކަމަށް ދައްކާ، މި މަޝްރޫޢު ފެށީ ރައްޔިތުންގެ ލޮލުގަ ކޮން އަނދުނެއް އަޅުވަންތޯ މިއަދު ރައްޔިތުން ދަނީ ސުވާލު އުފައްދަމުންނެވެ.
