ބޭހުގެ ކަޅު ބާޒާރެއް އުފެދި ފުޅާ ވަނީ!
ބޭހުގެ މައްސަލައަށް ދާއިމީ ހައްލެއް ގެނެސްދޭނެ ކަމަށް ސަރުކާރުން ތަފާތު ތާރީހުތައް ދިން ނަމަވެސް މިއަދާ ހަމައަށް މިމައްސަލައަށް ހައްލެއް ގެނެވިފައިނުވެއެވެ. ބޭސް ގައުމުގެ ކުންފުޏެއް އުފެއްދުން ފިޔަވައި، ރައްޔިތު މީހާގެ ޖީބަށް ރައްޔިތު މީހާ އުފުލަންޖެހޭ ތަކުލީފަށް ލުޔެއް ނުލިބެއެވެ. ނުވިތާކަށް ސަރުކާރުގެ މި އަމަލުތަކުގެ ސަބަބުން ކަޅުބާޒާރުގައި ބޭހުގެ ވިޔަފާރީގެ ޑިމާންޑު ބޮޑުވެ ދަނީ ފުޅާ ވަމުންނެވެ.
ސަރުކާރުގައި މައި ހޮސްޕިޓަލް އައިޖީއެމްއެޗް ސަރަހައްދުގައި ހުންނަ ފާރމަސީތައް.
ރައީސް ޑރ.މުހައްމަދު މުއިއްޒުގެ ވެރިކަމަށް ވަޑައިގެންނެވީ ދިވެހި އެންމެހައި ރައްޔިތުންނަށް ރަނގަޅު ފެންވަރުގެ ސިއްހީ ޚިދުމަތާއި، ކޮލެޓީ ބޭސް ލިބޭނެ ގޮތް ހައްދަވައިދެއްވާނެ ކަމުގެ ވައުދުފުޅާ އެކުއެވެ. ވެރިކަމަށް ވަޑައިގަންނަވާ ވެސް ކޮލެޓީ ބޭހާއި ގުޅޭގޮތުން ގިނަ ވާހަކަތަކެއް ދައްކަވައި، ރައްޔިތުންނަށް އެތައް އުންމީދެއް ގެނެސްދެއްވިއެވެ.
ނަމަވެސް މިސަރުކާރުގައި މިހާތަނަށް އައިރު، ސިއްހީ ޚިދުމަތުގެ ފެންވަރު ދުވަހަކު ވެސް ނުދާ މިންވަރަށް ދަށްވެ، މީގެ ކުރިން ވަރަށް ފަސޭހައިން ލިބެމުންދިޔަ އާސަންދަ ޚިދުމަތް ހޯދުމަށް ރައްޔިތުންނަށް ވަނީ ތުރާލަކަށްވެފައެވެ. ސަރުކާރުގެ ބޮޑުން ގާތުގައި ސަލާން ނުޖަހައި އާސަންދަ ޚިދުމަތެއް ނުލިބެއެވެ. އަދި ރާއްޖެ އިން ބޭރުގެ ހޮސްޕިޓަލަކުން އާސަންދަ ޚިދުމަތް ހޯދަން އުޅުމަކީ އިތުރަށް މީހާ ބަލިކޮށްލާނެ ތަކުލީފު ބޮޑު ކަމެކެވެ.
މީގެ އިތުރުން ފާމަސީތަކުން ފަސޭހައިން ލިބުނު ބޭސްތައް ވެސް ނުލިބޭތާ މިހާރު ވަނީ އެތައް ދުވަހެއް ވެފައެވެ. މާލެ އިން ބޭސް ލިބުން ދަތިވެ، ރާއްޖެ އިން ބޭރުން އަމިއްލަ އަށް ބޭސް ގެނައުމަށް ރައްޔިތުންނަށް ވަނީ މަޖުބޫރުވެފައެވެ. އަދި ރަށްރަށުގެ އެސްޓީއޯ ފާމަސީތަކުން ވެސް ބޭސް ނުލިބޭއިރު، މިހާރު ރަށްރަށުގައި އަމިއްލަ ފަރުދުން އެބޭސް ގެނެސްގެން ބޭސް ވިއްކުމުގެ ވިޔަފާރި ވަނީ ފަށާފައެވެ.
ކޮންމެ މީހަކީ ރާއްޖެ އިން ބޭރުން ބޭސް ގައުމުގެ ގާބިލްކަން ލިބިފައިވާ މީހެއް ނޫނެވެ. މަޖުބޫރީ ހާލަތުގައި އެމީހުން ބޭސް ގަންނަންޖެހެއެވެ. ނަތީޖާއެއް ގޮތުން މިއަދު ރާއްޖޭގައި ވަނީ ކަޅުބާޒާރުގައި ޑޮލަރު ވިއްކާ އުސޫލުން، ކަޅު ބާޒާރުގައި ދަނީ ބޭސް ވިއްކަމުންނެވެ. މިހާރު ރާއްޖޭގައި އެންމެ ޑިމާންޑް ބޮޑުވެފައިވާ އެއް ވިޔަފާރިއަކީ ވެސް ކަޅުބާޒާރުގައި ބޭހުގެ ވިޔަފާރިއޭ ބުންޏަސް ދޮގަކަށް ނުވާނެއެވެ.
ހާލަތު މިހެން އޮތްއިރު، ވިރަ ފޯމް ހުށަހަޅައިގެން ރާއްޖެއިން ބޭރުން ގެންނަންޖެހޭ ބޭސް ގެނައުން އެސްޓީއޯއިން ހުއްޓާލިކަމުގެ ޝަކުވާ ވަނީ ބޮޑުވެފައެވެ. ބަލި މީހުންނަށް ގުޅައި، އެކަން އަންގަމުންދާ ކަމަށާއި، އެހެން ފާމަސީއަކާ ގުޅިގެން ބޭސް ގެނައުމުން ބިލަށް އެންސްޕާއިން ފައިސާ ދޭނެ ކަމަށް އަންގަމުންދާ ކަމަށް ރާއްޖެއެމްވީއަށް މައުލޫމާތު ދިން ބަލި މީހުން ބުނެފައިވެއެވެ.
މިމައްސަލައާ ގުޅިގެން އެންސްޕާ އިން ބުނީ، ބައެއް ކޭސްތަކުގައި އެގޮތަށް އަމަލު ކުރަމުންދާ ކަމަށެވެ. ނަމަވެސް އިތުރު ތަފްސީލެއް އެ އެޖެންސީން ދީފައިނުވެއެވެ.
ވިރަ ފޯމް ހުށަހަޅައިގެން ބޭސް ހޯދުމަށް ގިނަ ވަގުތުތަކެއް ހޭދަ ކުރަންޖެހިފާއިވާއިރު، މިހާރު އެ ފޯމް ހުށަހެޅި ނަމަވެެސް ފަސޭހަ އިން ބޭސް ލިބޭނެ ކަމުގެ ޔަގީންކަމެއް ނެތެވެ. އެންސްޕާ އިން އެ ފޯމް ބަލައި، ދިރާސާ ކުރުމަށްފަހު ނިންމާ ނިންމުމަށް ބަލި މީހާ އިންތިޒާރު ކުރަން ޖެހެއެވެ. އަދި ފައިސާދޭ ގޮތަށް ނިންމާ ކަމަށް ވާނަމަ، އެހެން ފާމަސީއަކާ ގުޅިގެން ނުވަތަ ބޭސް ގެނެސްދޭ މީހަކާ ގުޅިގެން ބޭސް ގެނައުމަށްފަހު، އެ ބިލު އެންސްޕާ އަށް ހުށަހަޅައިގެން ފައިސާ ހޯދުމަށް ވެސް ރައްޔިތު މީހާއަށް މިއަދު އޮތީ ހާލެއްގައި އުޅެން މަޖުބޫރު ކުރުވާފައެވެ.
ބޭހުގެ މައްސަލައަށް ދާއިމީ ހައްލެއް ގެނެސްދޭނެ ކަމަށް ސަރުކާރުން ތަފާތު ތާރީހުތައް ދިން ނަމަވެސް މިއަދާ ހަމައަށް މިމައްސަލަ އަށް ހައްލެއް ގެނެވިފައިނުވެއެވެ. ބޭސް ގައުމުގެ ކުންފުޏެއް އުފެއްދުން ފިޔަވައި، ރައްޔިތު މީހާގެ ޖީބަށް ރައްޔިތު މީހާ އުފުލަންޖެހޭ ތަކުލީފަށް ލުޔެއް ނުލިބެއެވެ. ނުވިތާކަށް ސަރުކާރުގެ މި އަމަލުތަކުގެ ސަބަބުން ކަޅުބާޒާރުގައި ބޭހުގެ ވިޔަފާރީގެ ޑިމާންޑު ބޮޑުވެ ދަނީ ކުރިއަރަމުންނެވެ.
