ހުކުރު ދުވަހު ޣައްޒާއަށް އިޒްރޭލުން ދިން ވައިގެ ހަމަލާތަކުގައި މަދުވެގެން 34 ފަލަސްތީނު މީހުން ޝަހީދުވެއްޖެއެވެ.

ރަފަހް ސިޓީގައި، މިސްބާހް ސަރަޙައްދުގައި ހުރި ދެ ގެއަކަށް އިޒްރޭލުން ދިން ވައިގެ ހަމަލާގައި ތިން ކުޑަކުދިން ހިމެނޭ ގޮތަށް މަދުވެގެން 13 ފަލަސްތީން މީހުން ޝަހީދުވެފައިވާ ކަމަށް ސިއްހީ އޮފިޝަލުން އަލްޖަޒީރާއަށް މަޢުލޫމާތު ދީފައިވެއެވެ.

މިސްރުގެ ބޯޑަރާ ގާތުގައިވާ ރަފަހްގެ ސިޓީއަށް ވައިގެ މަގުން ހަމަލާދެމުންދާއިރު އިޒްރޭލު ސިފައިން އެއްގަމު މަގުން ޓޭންކުތަކުގައި ދަނީ ވަންނަމުންނެވެ.

ޣައްޒާގެ މެދުތެރޭގައިވާ ދީރުލް-ބަލާހް ގައި ހުރި އަލްޖަޒީރާގެ ރިޕޯޓަރު ޠާރިޤު އަބޫ ޢައްޒޫމް ބުނި ގޮތުގައި، މި ހަމަލާގައި އެ ދެ ގެ ވަނީ މުޅިން ސުންނާފަތި ވެފައެވެ.

ހަމާސްގެ ހަނގުރާމަވެރިންނާއި އިޒްރޭލް ސިފައިންނާ ދެމެދު މި ސަރަހައްދުގައި ހަމަލާތައް ބަދަލު ކުރެވެމުންދާއިރު، ފަލަސްތީނުގެ ސިވިލް ޑިފެންސް އޮފިޝަލުން ގެންދަނީ ހަމަލާދިން ދެ ގެ ހުރި ސަރަހައްދަށް ވާސިލް ވުމަށް މަސައްކަތް ކުރަމުން ކަމަށް އަލްޖަޒީރާގެ ރިޕޯޓަރ ބުނެފައިވެއެވެ.

އަލްޖަޒީރާގެ ރިޕޯޓަރ ބުނާ ގޮތުގައި ފުނޑުވި އިމާރާތުގެ ދަށުގައި މީހުން ތިބިކަމަށް ވަނީ ބެލެވިފައެވެ.

ރޮއިޓަރސް ނިއުސް އޭޖެންސީއަށް ފަލަސްތީނުގެ އާންމުން މައުލޫމާތު ދީފައިވާ ގޮތުގައި، ރަފަހްގެ ހުޅަނގު އުތުރު ސަރަޙައްދަށް އިޒްރޭލުގެ ޓޭންކުތަކުން އަރަމުން ދާއިރު، މަތިންދާ ބޯޓުތަކުން ޓޭންކްތައް އަންނަނީ އެހީތެރިވަމުންނެވެ.

ހަމާސް މީޑިއާ އިން ބުނާ ގޮތުގައި އެ ސަރަހައްދުގައި ބާރުގަދަ ގޮވުންތަކުގެ އަޑު ކެނޑިނޭޅި ދަނީ އިވެމުންނެވެ. އިޒްރޭލު ސިފައިން މި ސަރަހައްދުގެ އެތައް ގެއަކަށް ހަމަލާދީ ވަނީ ގޮއްވާލާފައެވެ.

ރަފަހްގެ ތަންނޫރު ސަރަޙައްދަށް ވަތް އިޒްރޭލު ސިފައިންނާ ހަމާސްގެ ހަނގުރާމަވެރިން ކުރިމަތިލާ ވަރުގަދަ ހަމަލާތަކެއް އިޒްރޭލު ސިފައިންނަށް ދެމުންދާ ކަމަށް ހަމާސް އިން ނެރުނު ބަޔާނެއްގައި ބުނެފައިވެއެވެ.

މީގެ އިތުރުން، ފަލަސްޠީނުގެ ސިއްޙީ އޮފިޝަލުން ބުނާ ގޮތުގައި، ޣައްޒާގެ މެދުތެރޭ ސަރަޙައްދުގައިވާ ނުސައިރާތު ރެފިއުޖީ ކޭމްޕަށް އިޒްރޭލުގެ ޓޭންކުތަކުން ދިން ހަމަލާއެއްގައި 8 މީހުން ޝަހީދުވެ، އެތައް ބަޔަކު ޒަޚަމްވިއެވެ. އަދި ޣައްޒާ ސިޓީގައި ހުރި ގެއަކަށް ދިން ވައިގެ ހަމަލާއެއްގައި އިތުރު 6 މީހުން ޝަހީދުވިއެވެ.

އުތުރުގެ ބައިތު ހަނޫންގައި، ކާރަކަށް އިޒްރޭލުން ދިން ހަމަލާއެއްގައި ބަޔަކު މަރުވެ އެތައް ބަޔަކު ޒަޚަމްވެފައިވާ ކަމަށް ސިއްހީ އޮފިޝަލުން ބުނެފައިވެއެވެ.

އިޒްރޭލުގެ ސިފައިންގެ ބަޔާނެއްގައި ބުނެފައިވަނީ، ފާއިތުވި ހަފްތާތަކުގައި ރަފަހްގައި ހަރަކާތްތެރިވި އަސްކަރީ ބާރުތަކުން އެތައް ސަތޭކަ ފަލަސްތީނުގެ ހަނގުރާމަވެރިން މަރާލައި، ބިންގަރާސްތަކާއި، ގޮވާ ތަކެތި ހޯދައި، އަދި އަސްކަރީ އިންފްރާސްޓްރަކްޗަރ ހަލާކުކޮށްފައިވާ ކަމަށެވެ.

ހުކުރު ދުވަހު އިޒްރޭލުން ޣައްޒާ އަށް ވަރުގަދަ ހަމަލާތައް ހުއްޓުމެއްނެތި ދެމުން ދިޔައިރު، ލުބްނާންގެ ޙިޒްބުﷲ ގެ ހަނގުރާމަވެރިންނާ އިޒްރޭލާ ދެމުދު ލުބުނާނު-އިޒްރޭލު ބޯޑަރު ސަރަޙައްދުގައި ހަނގުރާމަ އިތުރަށް ގަދަވަމުން ދިޔަކަން ފާހަގަ ކުރެވެއެވެ.

އޮކްޓޯބަރު 7 ގެ ފަހުން އިޒްރޭލުން ގެނަދަނީ ގާޒާއަށް ހުއްޓުމެއް ނެތި ހަމަލާދެމުންނެވެ. މިގޮތުން، ފަލަސްތީނުގެ ސިއްޙަތާ ބެހޭ މިނިސްޓްރީގެ ހިސާބުތަކުން 41,000ށް ވުރެ ގިނަ ފަލަސްޠީނު މީހުން ވަނީ ޝަހީދުވެފައެވެ. ޣައްޒާގެ، 2.3 މިލިއަން މީހުންގެ އާބާދީގެ ގާތްގަނޑަކަށް އެންމެން ކަހަލަ ގޮތަކަށް އެމީހުންގެ ގެދޮރުން ނެރެ، ކާބޯތަކެއްޗަށް ޖެހި ބަނޑުހައިހޫނުކަން މުޅި ޣައްޒާގެ އާބާދީއަށް ވަނީ ފެތުރިފައެވެ. ދުނިޔޭ ކޯޓުން ތުހުމަތު ކޮށްފައިވަނީ ޣައްޒާގައި އިޒްރޭލުން ހިންގަމުންދަނީ ފަލަސްތީނުގެ ނަސްލު ނައްތާލުމުގެ ހަނގުރާމައެކެވެ. އިޒްރޭލުން މިކަން ވަނީ ދޮގުކޮށްފައެވެ.