އަލް-މަވާސީ ކޭމްޕަށް އިޒްރޭލުން ދިން އަނިޔާވެރި ހަމަލާ ދުނިޔޭގެ ލީޑަރުން ކުށްވެރި ކޮށްފިއެވެ.
މަވާސީ ކޭމްޕަކީ ފަލަސްތީންގެ ރެފިއުޖީން ދިރިއުޅޭ "ރައްކައުތެރި" ސަރަހައްދެއްގެ ގޮތުގައި އިޒްރޭލުން ކަނޑައަޅާފައިވާ ސަރަހައްދެކެވެ.
ސެޕްޓެމްބަރު 10 ވަނަ ދުވަހު ޔަހޫދީ ސިފައިން ރެފިއުޖީ ކޭމްޕްގައި މީހުން ނިދާފައި ތިއްބާ ދަންވަރު ދިން އަނިޔާވެރި ހަމަލާގައި ޝަހީދުވި މީހުންގެ އަދަދު 19ށް އަރާފައިވާއިރު އަދިވެސް މި އަދަދު މައްޗަށް ދާނެ ކަމަށް ވަނީ ބެލެވިފައެވެ.
ހަމަލާގައި 60 ށް ވުރެ ގިނަ މީހުން ވަނީ ޒަޚަމްވެފައެވެ.
އަލްޖަޒީރާ އިން ކޮށްފައިވާ ތަހުގީގުން ބެލެވެނީ މި ހަމަލާގައި އިޒްރޭލުން ބޭނުންކޮށްފައިވަނީ އެމެރިކާ އިން އުފައްދާފައިވާ އެމްކޭ-84 ބޮމެވެ.
ޣައްޒާގެ އޮފިޝަލުން ބުނެފައިވާ ގޮތުގައި 2000 ޕައުންޑް (900 ކިލޯގްރާމް) ގެ ބޮން އާންމުގެ ތެރެއަށް އޮއްސާލުމުގެ ނަތީޖާއެއްގެ ގޮތުން ހަމަލާ އަމާޒުވި މީހުންގެ ހަށިތައް ވަނީ ވިރިގެން ގޮސްފައެވެ.
އަލްޖަޒީރާގެ ތަހުގީގު ރިޕޯޓްގައި ބުނެފައިވަނީ، ބޮންއެޅި ސަރަހައްދަކީ މީހުން ބޯކޮށް ދިރިއުޅޭ ސަރަހައްދެއް ކަމަށާއި އެތަނުގައި މަދުވެގެން މީހުން އުޅޭ 60 ޓެންޓް ހުރި ކަމަށެވެ.
ސެޓެލައިޓް ފޮޓޯ އިން ފެންނަ ގޮތުގައި ބޮން އެޅުމުގެ ސަބަބުން ސަރަހައްދުގައި ގާތްގަނޑަކަށް 15 މީޓަރުގެ ފުޅާ ވަޅުގަނޑެއް އުފެދިފައިވާ ކަމަށްވެސް އަލްޖަޒީރާ އިން ބުނެއެވެ.
ޖުލައި މަހުގެ 13 ވަނަ ދުވަހު ވެސް އިޒްރޭލު ސިފައިން މަވާސީ ކޭމްޕަށް ހަމަ މިހާ ބާރުގަދަ ބޮންއަޅާފައިވެއެވެ. އެ ހަމާލާގައި ހަމާސްގެ އަސްކަރީ ކޮމާންޑަރު މުހައްމަދު ދީފް ޝަހީދު ކޮށްލި ކަމަށް އިޒްރޭލުން ވަނީ ބުނެފައެވެ. އެހެން ނަމަވެސް ހަމާސް އިން އެކަން ކަށަވަރުކޮށްދީފައެއް ނުވެއެވެ.
.
ޣައްޒާގައި ކުރިއަށްދާ ޕޯލިއޯ ވެކްސިން ޕްރޮގްރާމަށް އިޒްރޭލު ސިފައިންގެ ދުއްތުރާތައް ކުރިމަތިވި ނަމަވެސް އުތުރުގެ ސަރަހައްދުގައި ޕްރޮގްރާމް ކުރިއަށްދާ ކަމަށް އދ އިން ބުނެފައިވެއެވެ. ވެކްސިން ދިނުމުގައި ހަރަކާތްތެރިވާ އދ ގެ އޮފިޝަލުންނާ ދިމާލަށް އިޒްރޭލު ސިފައިންގެ މީހަކު ބަޑި ޖަހާ އަދި އިޒްރޭލުގެ ބުލްޑޯޒަރުތަކުން އޮފިޝަލުންގެ އުޅަނދުތަކަށް ގެއްލުންދީފައިވާ ކަމަށް އަންރްވާ ގެ ވެރިޔާ ވަނީ ވިދާޅުވެފައެވެ.
އަނެއްކޮޅުން ހުޅަނގު އައްސޭރީގެ ތޫބާސް އަށް އިޒްރޭލު ސިފައިން އަރާ އެ ސަރަހައްދުގައި ކާފިއު އިއުލާން ކޮށްފައިވާ ކަމަށް ވަފާ ނިއުސް އޭޖެންސީން ބުނެފައިވެއެވެ.
ޑްރޯންތަކާއި ހެލިކޮޕްޓަރުތައް ތޫބާސް ސިޓީގެ މަތިން އުދުހެމުންދާކަމަށާއި އެތަނުގައި ހުންނަ ޓާކިޝް ގަވަރމެންޓް ހޮސްޕިޓަލް ބަންދުކޮށް އެ ސަރަހައްދުގެ ވަށައިގެން އޮންނަ ހިސާބުވެސް އިޒްރޭލް ސިފައިން ބަންދުކޮށްފައިވާ ކަމަށްވެސް ވަފާ ނިއުސް އޭޖެންސީން ބުނެއެވެ.
ހިފާފައިވާ ހުޅަނގު އައްސޭރީގެ ނާބުލްސް އާއި ތުލްކަރިމްގެ ނޫރް ޝަމްސް ކޭމްޕްގައި ވެސް އިޒްރޭލް ސިފައިން ގެންދަނީ ރެއިޑް ކުރަމުންނެވެ.
އިޒްރޭލުން ޣައްޒާ އަށް ހުއްޓުމެއް ނެތި ދެމުންދާ ހަމަލާތަކުގައި މިހާތަނަށް ޝަހީދުވި މީހުންގެ އަދަދު 41،020ށް ވަނީ އަރާފައެވެ. އަދި ހަމަލާތަކުގައި 94،925 މީހުން ޒަޚަމްވެފައިވެއެވެ
